Enọ Ahwo nọ A s’Ebe

Eme họ otofa eme ọ Pọl nọ e rrọ 1 Timoti 5:9 nọ ọ rọ t’ẹme kpahe oware nọ o gwọlọ re aye-uku ọ sai te kẹ obufihọ ukoko Ileleikristi na?

Evaọ ẹvẹrẹ Griki ọsosuọ, ẹme nọ otọ riẹ o rrọ “aye nọ o wo ọzae ọvo” oye a jọ Ebaibol Isoko fa nọ ‘ọnọ o kpo orọwo thọ ẹsiẹvo wa ha’ na. Nọ orọnọ ohwo nọ ọ rrọ aye-uku ọye Pọl ọ be ta ẹme kpahe na, koyehọ ẹme nana “aye nọ o wo ọzae ọvo” u bi dhesẹ epanọ aye na ọ jọ taure o te ti zihe ruọ aye-uku. Kọ o sae jọnọ otofa ẹme ẹvẹrẹ ọsosuọ nọ a rọ t’ẹme na họ aye-uku nọ ọ rọo vrẹ ẹsiẹvo ho, wọhọ epanọ a fa riẹ evaọ Ebaibol Isoko gbe efafa efa jọ na? Manikọ eme ọ Pọl na i bi dhesẹ oware ofa jọa?

Ahwo jọ a ta inọ Pọl ọ jẹ ta kpahe eyae-uku nọ e rọo ẹsiẹvo ọvo evaọ uzuazọ rai kpobi. Uzẹme o ginẹ rrọ inọ evaọ eria buobu, a jẹ rehọ emamọ ubiẹro rri aye-uku nọ ọ wariẹ kpohọ orọo ho. Rekọ, wọhọ epanọ eme nọ Pọl o kere evaọ ileta efa i dhesẹ, orọnikọ oware nọ o wo họ iroro evaọ etenẹ oye he. Wọhọ oriruo, o ru ẹme na vevẹ kẹ Ileleikristi obọ Kọrint inọ iroro riẹ họ eva e te mae were aye-uku otẹrọnọ ọ wariẹ rọo ho, rekọ o fibae inọ u te jei, ọ rẹ sae “rehọ ọzae nọ ọ were riẹ evaọ Ọnowo na.” (1 Ahwo Kọrint 7:39, 40; Ahwo Rom 7:2, 3) Ofariẹ, evaọ ileta riẹ se Timoti, Pọl ọ ta nọ: “Mẹ guọlọ nọ eyae-uku eboba a kpo orọwo.” (1 Timoti 5:14) Fikiere, aye-uku ọ thuzi hi ọ tẹ jiroro nnọ ọ rẹ wariẹ rọo.

Kọ, eme họ otofa eme ọ Pọl nọ o kere se Timoti na? Owọ Ebaibol nana ọvo eme Griki nọ i wo otofa “aye nọ o wo ọzae ọvo” na e jọ roma via. U fo oware nọ a re muẹrohọ inọ eme nana i tho eme efa jọ nọ Pọl ọ rọ t’ẹme unuẹse buobu evaọ ileta riẹ, eme wọhọ “aye ọvo o re wo,” hayo “ọzae nọ o wo aye ọvo,” wọhọ epanọ a dhesẹ i rie evaọ ẹvẹrẹ ọsosuọ na. (1 Timoti 3:2, 12; Taitọs 1:6) Pọl ọ fodẹ ẹme na “aye ọvo o re wo” evaọ okenọ o je dhesẹ itee rọkẹ enọ a re ro mu ekpako Ileleikristi gbe idibo iruiruo. Evaọ oria yena, otofa eme yena họ, re ohwo ọ sai te kẹ ọkwa-iruo evaọ ukoko Ileleikristi na, ọzae, otẹrọnọ o wo aye, ọ rẹ tẹrovi aye riẹ na ọvo, ọ rẹ rehọ oma lẹliẹ eyae efa ha.b Nọ o rrọ ere na, o tẹ wọhọ nọ otofa ovona eme nọ e rrọ 1 Timoti 5:9 na i wo: Re aye-uku o te ọnọ ukoko na u re fi obọ họ kẹ, ọ rẹ jọ aye nọ ọ roma kpotọ jẹ tẹrovi ọzae riẹ ọvo evaọ okenọ ọzae na ọ jọ uzuazọ, ọ rẹ jọ aye nọ ọ jẹ rehọ oma lẹliẹ ezae efa ha. Eware edekọ kpobi nọ Pọl ọ jọ awọ Ebaibol nọ i lele i rie fodẹ na e be riobọ họ oghẹrẹ aye-uku otiọye na.—1 Timoti 5:10.

[Oruvẹ-obotọ]