Ẹrọwọ Oni Jọ O Lẹliẹ E Riẹ Dikihẹ Ga Evaọ OKE Okpẹtu

“Wha te bi se ileta nana, koyehọ me whu evaọ omobẹrọ na gbe nnọ mẹ gbẹ rrọ kugbe owhai hi.”

ENA họ eme emuhọ erọ ileta nọ Carmen, oni jọ nọ ọ rrọ omọvo Isẹri Jihova, o kere fihọ otọ kẹ emetẹ esa riẹ, ọmọtẹ ọsosuọ ọ rrọ ikpe 25, ọrọ avivẹ 19, ọrọ avesa 16. U yoma gaga inọ omobẹrọ na o jọ gaga, fikiere Carmen o te whu.

Re ohwo o whu siọ emetẹ esa ba uyero odada utioye na o rẹ kuye gaga. Ghele na, ẹrọwọ ọgaga nọ oni nana o fihọ Jihova gbe eyaa riẹ o lẹliẹ e riẹ dikihẹ ga evaọ oke okpẹtu na, onọ o kẹ riẹ udhedhẹ iroro nọ a rẹ sae jọ ileta riẹ nọ i mu urirẹ na ruẹ. Muẹrohọ eme nọ o kere fihọ otọ kẹ emetẹ riẹ.

“Mẹ gwọlọ kake j’owhai riẹ inọ me you owhai gaga . . . Whai yọ emetẹ nọ e mai woma nọ oni o re yẹ, yọ mẹ be rehọ owhai s’eha gaga.

“O hae were omẹ nọ ma gbẹ jọ kugbe bọwo akpọ ọkpokpọ nọ Ọghẹnẹ ọ yeyaa riẹ na . . . , rekọ fikinọ onana o lọhọ họ na, mẹ lẹ sei inọ o fi obọ họ kẹ owhai kru ẹrọwọ rai, wọhọ epanọ wha bi ru anwẹdẹ na. Ma thihakọ edawọ buobu kugbe no, yọ Jihova o ri vu omai wa ha. . . . Fikiere wha gbẹ hai fi eva họ uketha nọ ọ be rehọ ẹkwoma ukoko riẹ kẹ, re wha gbẹ hae tha ukoko na gbe ekpako na uke. Wha ta usiuwoma na te umuo nọ ẹgba rai o mu, je you inievo na kpobi.

“Omohẹriẹ nana u ti kri hi. . . . Ivie wha rọ vrẹ omẹ fiki eware nọ me ru owhai thọ kpobi gbe oke kpobi nọ me riwi oware uwoma nọ wha ru thọthọ hayo oke nọ mẹ rọ ta kẹ owhai hi inọ me you owhai gaga. . . . Mẹ riẹ inọ whai omomọvo wha wo ọvuọ ẹgwọlọ riẹ. Jihova ọ riẹ ẹgwọlọ rai vi owhai, yọ ọ te k’owhai eware nọ wha gwọlọ kpobi jẹ hwosa kẹ owhai fiki eware nọ wha thihakọ rai kpobi.

“Jọ ute rai o thọrọ owhai ẹro ho—uzuazọ evaọ akpọ ọkpokpọ na—re wha jẹ daoma ziezi re wha lei t’obọ. Ajọ Jihova ọ ghale owhai jẹ bọ owhai ga re wha sai thihakọ rite urere. . . . Wha kru udu ga, emetẹ eghaghae mẹ. Me you owhai.”

Okpẹtu ọ rẹ sai te ohwo kpobi oke kpobi. Solomọn ovie na o kere nọ: “Oke gbe eware idudhe e rẹ via kẹ ae kpobi.” (Ọtausiwoma Na 9:11, NW ) Rekọ enọ i fi ẹrọwọ ọgaga họ Ọghẹnẹ a rẹ sai wo ọkpọ imuẹro evona wọhọ Pọl ukọ na, ọnọ ọ ta nọ: “Umuomẹ ẹro nọ makọ uwhu, hayo uzuazọ, . . . hayo oware ovo eva emama na kpobi, no rẹ sae hẹriẹ omai no uyoyou Ọghẹnẹ evaọ Kristi Jesu Ọnowo mai na, ọ rọhọ.”—Ahwo Rom 8:38, 39; Ahwo Hibru 6:10.