Kọ “Ọvọ Anwae” Na O Gbe Wiruo Nẹnẹ?

EVAỌ 1786, ohwo French jọ nọ ọ rrọ ọbo-imu o kere obe nọ u wo uzoẹme na Traité d’anatomie et de physiologie (Oruvẹ Kpahe Ugboma na gbe Oghẹrẹ nọ U re Ru Iruo). A rri rie wọhọ obe nọ o mae gba kpaobọ eva oke yena nọ o ta ẹme kpahe iriẹ-oma na, yọ ovojọ obe yena nọ a thobọ ruẹ evaọ oke mai na o ghare te enaera ima-esa gbe ubro! Dedena, umutho ahwo gheghe ọvo nọ a gwọlọ usiwo-imu nẹnẹ a rẹ sai fi eva họ ọbo-imu nọ ọ rẹroso eriariẹ obe nọ u kri te ere no. Ghele epanọ obe na o viodẹ te gbe epanọ a rri rie ghare te evaọ oke yena kẹhẹ, o rrọ bẹbẹ re obe utioye na u wiruo kẹ ohwo nọ ọ be mọ nẹnẹ.

Ere ahwo buobu a bi roro kpahe abọ Ikereakere na nọ a bi se Ọvọ Anwae na. A wo ovuhumuo kẹ ikuigbe emọ Izrẹl gbe emamọ eme-ọketa nọ e rrọ eva riẹ. Rekọ, u mu rai ẹro ho inọ o rrọ oware areghẹ re a lele ekpọvio nọ a kere fihotọ vrẹ ikpe 2,400 nọ i kpemu no nẹnẹ. Ewuhrẹ otokiẹ-eriariẹ, ekiọthuọ, gbe uzuazọ uviuwou dede i wo ohẹriẹ gaga no epanọ o jọ eva oke nọ a ro kere Ebaibol na. Philip Yancey nọ ọ jọ omọvo enọ i je kere emagazini na Christianity Today, o kere evaọ obe jọ nọ uzoẹme riẹ o rrọ The Bible Jesus Read inọ: “Rọkẹ ahwo jọ, ẹsibuobu ikuigbe Ọvọ Anwae na e rẹ wọhọ oware nọ o kare iroro, yọ makọ evaọ ofẹ nọ a jọ ruẹ iroro evaọ ẹme na dede, a rẹ rehọ iẹe wọhọ oware nọ a sai lele eva oke mai na ha. Fiki onana gbe ẹjiroro efa, ẹsibuobu ahwo a re se Ọvọ Anwae na ha, nọ o rrọ abasa nọ a tẹ ghale oma Ebaibol na kpohọ abane.” Nẹnẹ eriwo yena o muhọ họ.

Nọ Jọn ukọ na o whu no evaọ oware wọhọ 100 C.E., u te ikpe 50 he nọ ọdafe ọmoha jọ nọ a re se Marcion ọ rọ ta nọ u fo re Ileleikristi a siọ Ọvọ Ọkpokpọ na. Ogbiku jọ nọ a re se Robin Lane Fox nọ ọ rrọ ohwo Oyibo ọ ta kpahe Marcion inọ ọ jẹ hae ta nọ: “ ’Ọghẹnẹ’ nọ a fodẹ evaọ Ọvọ Anwae na yọ ‘ohwo ọgeva nọ o rovie aro ho,’ nọ o you egbulegbu gbe otu ugbarugba wọhọ Devidi, ovie Izrẹl anwae na. Eva abọdekọ riẹ, Kristi yọ Ọghẹnẹ okpehru nọ ọ wha enwene ọkpokpọ ze.” Fox o kere nọ a tẹ te rehọ odẹ ọzae nana “se iwuhrẹ riẹ inọ ‘Marcionism,’ o te mu ilele họ ewo maero kọ evaọ ofẹ ovatha-ọre Syria, re ruọ ikpe-udhusoi avene.” Ahwo jọ a gbẹ rọwo oghẹrẹ uwuhrẹ yena nẹnẹ. O wha riẹ ze nọ dedenọ ikpe 1,600 e vrẹ no, wọhọ epanọ Philip Yancey o kere, “Ileleikristi a bi gele iwuhrẹ Ọvọ Anwae na họ akotọ te epanọ a rọ joma kpairoro vrẹ ai no evaọ oke mai na.”

Kọ a rehọ ọfa nwene Ọvọ Anwae na no? Ẹvẹ ma sae rọ ta nọ otoriẹ nọ ma wo kpahe Jihova wọhọ “ỌNOWO Ogbaẹmo” evaọ Ọvọ Anwae na o rọwokugbe oghẹrẹ nọ a dhesẹ i rie evaọ Ọvọ Ọkpokpọ na wọhọ “Ọghẹnẹ uyoyou avọ udhedhẹ”? (Aizaya 13:13; 2 Ahwo Kọrint 13:11) Kọ whọ sai wo erere no Ọvọ Anwae na ze nẹnẹ?