Wha Wuhrẹ Emọ Rai Re A You Jihova
“Wọhọ ese eva obọ ogbaẹmo ere emọ otu uzoge na e rọ.”—OLEZI 127:4.
1, 2. Ẹvẹ emọ e rọ wọhọ “ese eva obọ ogbaẹmo”?
OHWO nọ ọ rẹ sa ose ọ be ruẹrẹ oma kpahe re ọ sa oware jọ. Ọ roma totọ fi ose na họ uzei no, kẹsena o te si ei kekeke re ọ ruẹsi si obọ noi. Ghelọ epanọ u keke i rie obọ te, ọ roma totọ be ma oware nọ ọ gwọlọ sa na. Kẹsena o te si obọ noi! Kọ ose na u ti kie oware nọ ọ gwọlọ sa na? Uyo na o roma hwa eware buobu, ejọ họ, epanọ ohwo na ọ riẹ ose ẹsa te, oghẹrẹ nọ ofou o bi fou rri, gbe oghẹrẹ nọ ose na o liọ te.
2 Solomọn ovie na ọ rehọ emọ dhesẹ “ese eva obọ ogbaẹmo.” (Olezi 127:4) Muẹrohọ epanọ ọtadhesẹ nana o ro kie kpahe ẹme nọ ma be ta na. Oke nọ ose na o rẹ jọ uzei na krite evaọ obọ ohwo nọ ọ te sae na o rẹ kpẹkpẹ. Re o sai kie oware nọ ọ gwọlọ sa na, o re si obọ noi ofu-ọvo. Epọvo na re, esẹgbini a wo etoke kpẹkpẹ nọ a sae rọ bọ uvi uyoyou kẹ Jihova họ udu emọ rai. Nọ ikpe jọ kakao ọvo e tẹ vrẹ no, emọ na e vẹ te whẹro te epanọ a re ro no uwou. (Matiu 19:5) Kọ a te sai te ute na—kọ emọ na a ti gbe you Ọghẹnẹ jẹ gọe nọ a tẹ ruọ orọ obọrai no? Uyo na o roma hwa eware buobu. Eware esa jọ nọ uyo na o roma hwa họ, ona ọsẹ hayo oni na, okegbe nọ a jọ yọrọ emọ na, gbe oghẹrẹ nọ emọ na a jẹ uwuhrẹ nọ a kẹ rai rehọ te. Jo ma roma totọ kiẹ eware nana riwi ọvuọvo. Ma te kake ta kpahe eware nọ a re ro vuhu ọyewọ nọ o wo ona uwuhrẹ ziezi.
Esẹgbini nọ I Wo Ona Uwuhrẹ A re Fi Emamọ Oriruo họ Otọ
3. Fikieme u je fo nọ esẹgbini a ru lele ẹme rai?
3 Jesu o ru lele eware nọ o wuhrẹ, ọ tẹ rọ ere fi oriruo họ otọ kẹ esẹgbini. (Jọn 13:15) Evaọ abọdekọ riẹ, Jesu o brukpe otu Farisi nọ i je “ru epanọ a ta ha.” (Matiu 23:3) Re a ruẹsi ru emọ rai wo uyoyou kẹ Jihova, o gba esẹgbini họ inọ a re ru lele ẹmeunu rai. U re wo iruo ho nọ esẹgbini a gbe bi ru lele ẹme rai hi, o rẹ wọhọ uzei nọ u wo ufi hi.—1 Jọn 3:18.
4. Didi enọ u fo nọ esẹgbini a rẹ nọ oma rai, kọ fikieme?
4 Fikieme oriruo esẹgbini o ro wuzou tere? Wọhọ epanọ ahwo nọ a kpako no a rẹ sai wuhrẹ epanọ a re ro you Ọghẹnẹ ẹkwoma ẹromuhọ oriruo Jesu na, ere emọ e rẹ sai wuhrẹ epanọ a re ro you Jihova ẹkwoma emamọ oriruo esẹgbini rai nọ a rẹ raro kele. Ahwo nọ ọmọ o re lele nya usu a rẹ sae bọe ga hayo “raha uruemu ezi” riẹ. (1 Ahwo Kọrint 15:33) Evaọ abọ ologbo ọrọ uzuazọ ọmọ, maero etoke ikpe nọ o bi ro wo areghẹ ze na, ọsẹgboni riẹ họ egbẹnyusu ekpekpe nọ e rẹ mai kpomahọ uzuazọ riẹ. Fikiere, u fo re esẹgbini a nọ oma rai nọ: ‘Oghẹrẹ vẹ usu mẹ kugbe ọmọ mẹ u bi kpomahọ iẹe? Kọ oriruo mẹ o bi fi obọ họ kẹ ọmọ mẹ wo emamọ uruemu? Didi oriruo me bi fihọ otọ evaọ ofẹ olẹ gbe uwuhrẹ Ebaibol nọ i wuzou gaga na?’
Esẹgbini nọ I Wo Ona Uwuhrẹ A rẹ Lẹ Kugbe Emọ Rai
5. Eme emọ e rẹ sai wuhrẹ no elẹ ọsẹgboni ze?
5 Emọ ra e rẹ sai wuhrẹ eware buobu kpahe Jihova nọ a tẹ be gaviezọ kẹ elẹ ra. Eme a rẹ sai vuhumu nọ a tẹ be gaviezọ kẹ owhẹ nọ who bi yere Ọghẹnẹ re wha tẹ re emu, jẹ be hae lẹ taure who te mu iwuhrẹ Ebaibol họ? Onana o rẹ sae lẹliẹ ae vuhumu inọ Ọghẹnẹ họ ọnọ ọ be kẹ omai ẹgwọlọ abọ iwo mai—nọ u je fo nọ ma re yere iei—gbe nọ ọye o bi wuhrẹ omai uzẹme Ebaibol na. Enana yọ obọdẹ uwuhrẹ.—Jemis 1:17.
6. Ẹvẹ esẹgbini a sai ro fi obọ họ kẹ emọ rai vuhumu inọ Jihova o wo isiuru kpahe ai omomọvo?
6 Rekọ whọ tẹ be hae lẹ kugbe emọ ra evaọ oke ofa u te no etoke emuọriọ gbe uwuhrẹ Ebaibol no, jẹ be jọ elẹ ra ta kpahe ugogo eware nọ i kpomahọ owhẹ gbe emọ na, onana u ti fi obọ họ kẹ emọ ra ziezi. U ti fi obọ họ kẹ emọ ra ruẹ vuhumu inọ Jihova ọ rrọ abọjọ uviuwou na, inọ ọ be daezọ rai omomọvo. (Ahwo Ẹfẹsọs 6:18; 1 Pita 5:6, 7) Ọsẹ jọ ọ ta nọ: “No umuo okenọ ma ro yẹ ọmọtẹ mai ze ma ro mu ei họ ẹlẹ kugbe. Nọ ọ be kpako na, ma tẹ jẹ hae lẹ kpahe usu gbe eware efa nọ i kpomahọ iẹe. Bẹsenọ o ro kpohọ orọo, u wo ẹdẹ ọvuọvo nọ ma lẹ kugbei hi hi.” Kọ whọ gbẹ lẹ kugbe emọ ra kẹdẹ kẹdẹ? Kọ who gbe fi obọ họ kẹ ae rri Jihova wọhọ Ogbẹnyusu nọ o wo isiuru kpahe ọdawẹ iroro rai, orọnikọ ẹgwọlọ abọ-iwo gbe ọrọ abọ-ẹzi rai ọvo ọ be rẹrote he?—Ahwo Filipai 4:6, 7.
7. Re esẹgbini a sae lẹ kpahe ugogo ọdawẹ emọ rai, eme u fo nọ a rẹ riẹ?
7 Uzẹme, re whọ ruẹsi dhunu te igogo eware nọ i kpomahọ emọ ra evaọ olẹ, o gwọlọ nọ whọ rẹ riẹ uzedhe oware nọ o be via evaọ uzuazọ emọ na. Muẹrohọ ẹme nọ ọsẹ jọ nọ ọ yọrọ emọ ivẹ whẹro no ọ ta: “Mẹ rẹ nọ oma mẹ enọ ivẹ evaọ urere ẹkpoka kpobi inọ: ‘Eme ọ jọ ọdawẹ kẹ emọ mẹ evaọ oka nana? Eware iwoma vẹ e via evaọ uzuazọ nọ a yeri evaọ ẹkpoka nana?’ ” Esẹgbini, kọ wha sae nọ oma rai enọ itienana re wha fi eware nana jọ ba elẹ okenọ wha tẹ be lẹ kugbe emọ rai? Wha te ru enẹ, yọ wha bi wuhrẹ ai re a hae lẹ se Jihova—Ọnọ o re yo elẹ na—re a je you rie.—Olezi 65:2.
Esẹgbini nọ I Wo Ona A rẹ Tuduhọ Uwuhrẹ Omobọ Ohwo orọ Ikẹse Kẹse
8. Fikieme u je wuzou re esẹgbini a fi obọ họ kẹ emọ rai wo uruemu orọ ewuhrẹ Ẹme Ọghẹnẹ?
8 Ẹvẹ uruemu nọ ọsẹ hayo oni o wo kpahe uwuhrẹ Ebaibol o rẹ sai kpomahọ usu nọ ọmọ o re wo kugbe Jihova? Re a sae yọrọ usu kpobi avọ evawere, o gba ahwo nọ a rrọ usu utioye na họ inọ a rẹ hae ta ẹme kugbe ẹsikpobi jẹ gaviezọ kẹ ohwohwo. Edhere jọ nọ ma rẹ rọ gaviezọ kẹ Jihova họ, ebe nọ “odibo oruọzewọ” na o bi kere nọ ma re ro wuhrẹ Ebaibol na. (Matiu 24:45-47; Itẹ 4:1, 2) Fikiere, re a sai fi obọ họ kẹ emọ rai wo usu uyoyou nọ o rẹ tọ kugbe Jihova, u fo nọ esẹgbini a rẹ ta udu họ ae awọ re a wo uruemu orọ ewuhrẹ Ẹme Ọghẹnẹ.
9. Ẹvẹ a sai ro fi obọ họ kẹ emọ wo emamọ uruemu ọrọ uwuhrẹ?
9 Ẹvẹ a sai ro fi obọ họ kẹ emọ wo emamọ uruemu orọ uwuhrẹ Ebaibol? Wọhọ epanọ ma ta no vẹre na, oriruo ọsẹgboni họ oware nọ o rẹ mai wuhrẹ emọ eva abọ nana. Kọ emọ ra a be hae ruẹ owhẹ nọ whọ be reawere isase hayo uwuhrẹ Ebaibol orọ omobọ ohwo ẹsikpobi? Uzẹme, o sae jọ nọ eware i bu owhẹ abọ gaga evaọ ọgbohrẹ epanọ whọ rẹ rọ rẹrote emọ ra, yọ whọ rẹ sai roro inọ kọ oke vẹ mẹ te sae ruẹ ro se Ebaibol je ru uwuhrẹ omobọ mẹ? Rekọ dae nọ oma ra nọ, ‘Kọ emọ mẹ a be ruẹ nọ etẹlivisiọne mẹ be hai rri ẹsikpobi?’ O tẹ rrọ ere, kọ whọ gbẹ sae rehọ oke jọ no oke yena ze ro fi emamọ oriruo uwuhrẹ omobọ ohwo họ otọ kẹ emọ na?
10, 11. Fikieme u je fo nọ esẹgbini a ru uwuhrẹ Ebaibol uviuwou ẹsikpobi?
10 Obọdẹ edhere ọfa nọ esẹgbini a sai ro wuhrẹ emọ rai re a gaviezọ kẹ Jihova họ, nọ a tẹ be hae ta ẹme kpahe Ebaibol kugbe kẹse kẹse. (Aizaya 30:21) O rẹ sai gbe ahwo jọ unu inọ, ‘Otẹrọnọ esẹgbini a be wha emọ rai kpohọ iwuhrẹ ileleikristi oke kpobi, fikieme o gbẹ rọ gwọlọ nọ a ru uwuhrẹ uviuwou kugbe ai?’ Ẹjiroro buobu e riẹ nọ onana u ro fo. Esẹgbini họ ahwo ọsosuọ nọ Jihova ọ rehọ owha-iruo ewuhrẹ emọ kẹ. (Itẹ 1:8; Ahwo Ẹfẹsọs 6:4) Ewuhrẹ Ebaibol uviuwou u re wuhrẹ emọ inọ Ọghẹnẹ ọgọ yọ abọjọ uzuazọ omomọvo uviuwou na orọnikọ oware nọ a rẹ jọ ẹgbede ọvo ru hu.—Iziewariẹ 6:6-9.
11 U te no ere no, uwuhrẹ uviuwou nọ a riẹ ru ziezi o rẹ sae kẹ esẹgbini uvẹ nọ a rẹ rọ riẹ iroro emọ rai kpahe eware abọ-ẹzi gbe oghẹrẹ nọ a rri ẹfuọ uruemu. Wọhọ oriruo, nọ emọ na a tẹ gbẹ rrọ emaha, esẹgbini a rẹ sae rehọ ebe wọhọ Wuhrẹ Mi Owuhrẹ Ologbo Na ru uwuhrẹ uviuwou kugbe ai.a A jọ enwenọ idhe-ẹme obe nana kpobi nọ emọ enọ nọ i re fi obọ họ kẹ ai ta iroro rai via kpahe oware nọ a bi wuhrẹ na. Ẹkwoma ikereakere nọ a fodẹ evaọ obe na nọ a rẹ rọ jiroro kugbe emọ rai, esẹgbini a sai fi obọ họ kẹ ai wuhrẹ ẹgba iroro rai “te epanọ a sae [rọ] hẹriẹ uwoma no uyoma.”—Ahwo Hibru 5:14.
12. Ẹvẹ esẹgbini a sai ro ru uwuhrẹ uviuwou lele ẹgwọlọ emọ, kọ eme whọ ruẹ inọ u bi ru iruo kẹ owhẹ ziezi evaọ abọ nana?
12 Nọ emọ rai e be whẹro na, wha hai ru uwuhrẹ uviuwou na lele ẹgwọlọ rai. Muẹrohọ oghẹrẹ nọ ọsẹgboni jọ a ro fi obọ họ kẹ emetẹ rai jẹ uvi iroro kpahe ehaa ile-igbe nọ a jọ obọ isukulu zizie ai. Ọsẹ na ọ ta nọ: “Ma ta kẹ emọ mai nọ eva abọjọ uwuhrẹ uviuwou mai notha, mẹ avọ oni rai ma ti ru wọhọ emọ uviuwou na, re ai omarai a ru wọhọ ẹsenọ a rrọ ọsẹgboni mai. Ma ta kẹ ae inọ a rẹ sae salọ ohwo nọ ọ te jọ ọsẹ gbe ọnọ ọ te jọ oni, rekọ aimava na a ti ru ekiakiẹ kugbe kpahe uzoẹme nọ o ta kpahe ehaa ile-igbe isukulu re a ruẹse kẹ omai ọkpọvio oware nọ u fo nọ ma re ru.” Eme o no onana ze? Ọsẹ na ọ ta nọ: “Orimuo nọ emetẹ mai (nọ a ru wọhọ ẹsenọ a rrọ ọsẹgboni mai) a dhesẹ u gbomai unu, nọ a je dhesẹ no Ebaibol na ze kẹ omai (wọhọ ẹsenọ ma rrọ emọ rai) oware nọ u gbe ro fo re ma kpohọ ile-igbe na ha.” O fibae nọ: “Oware ofa nọ u gbomai unu họ iroro efa nọ a jẹ kẹ omai kpahe iruẹru efa nọ i fo kẹ Oleleikristi nọ ma rẹ sai jo wobọ. Onana o kẹ omai otoriẹ ziezi kpahe oghẹrẹ iroro nọ a wo gbe isiuru rai.” Uzẹme, re a sai ru uwuhrẹ uviuwou ẹsikpobi je ru ei nya lele ẹgwọlọ uviuwou na o gwọlọ ithihakọ gbe eroro-didi, rekọ irere riẹ i wo umuo ho.—Itẹ 23:15.
Ru re Udhedhẹ O Jọ Uviuwou Na
13, 14. (a) Ẹvẹ esẹgbini a sai ro ru udhedhẹ evaọ uviuwou? (b) Erere vẹ ọ rẹ sai noi ze nọ ọsẹ hayo oni ọ tẹ rọwo ethobọ riẹ?
13 Ose o rẹ sai kie oware nọ a be rehọ iẹe sa nọ ohwo nọ ọ be sae na o te si obọ noi evaọ okenọ ofou ọgaga ọ rrọ họ. Epọvo na re, o rẹ mae lọhọ re emọ a wuhrẹ epanọ a re ro you Jihova otẹrọnọ esẹgbini a be hai ru udhedhẹ evaọ uviuwou rai. Jemis o kere nọ: “Ahwo nọ a rẹ ruẹrẹ ahwo họ a rẹ kọ ubi udhedhẹ a ve vu ẹrẹreokie.” (Jemis 3:18) Ẹvẹ esẹgbini a sai ro ru udhedhẹ evaọ uviuwou? O gwọlọ nọ ọzae-avọ-aye a re se ọgbakugbe orọo rai gboja ziezi. O rẹ mae lọhọ kẹ ọzae-avọ-aye nọ a you ohwohwo je wo adhẹẹ kẹ ohwohwo re a wuhrẹ emọ rai epanọ a re ro you jẹ rọ adhẹẹ kẹ amọfa, te Jihova re. (Ahwo Galesha 6:7; Ahwo Ẹfẹsọs 5:33) Adhẹẹ gbe uyoyou o rẹ wha udhedhẹ haro. O rẹ mae lọhọ kẹ imava-orọo nọ i wo udhedhẹ kugbe ohwohwo re a ku ebẹbẹ nọ e rẹ sae romavia evaọ uviuwou họ.
14 Uzẹme, epanọ a rẹ sae ruẹ imava-orọo nọ e gba re he na, ere a rẹ sae ruẹ uviuwou nọ o gba re eva akpọ inẹnẹ hẹ. Nọ a te bi yerikugbe emọ rai, oke jọ o rẹ sae jọ nọ esẹgbini a re dhesẹ ubi ẹzi na ha fiki sebaẹgba. (Ahwo Galesha 5:22, 23) Nọ o tẹ via ere, eme u fo nọ esẹgbini a re ru? Nọ a tẹ rọwo nọ oware o thọ rai obọ, kọ u ti ru nọ emọ rai a gbẹ te rọ kẹ ai adhẹẹ te epaọ ọsosuọ họ? Roro kpahe oriruo Pọl. Ọ jọ wọhọ ọsẹ abọ-ẹzi kẹ ahwo buobu. (1 Ahwo Kọrint 4:15) Ghele na, ọ rehọ unu riẹ ta nọ eware e rẹ thọe obọ re. (Ahwo Rom 7:21-25) O make rrọ ere na, omurokpotọ gbe oruọzewọ nọ o dhesẹ u ru nọ ma ro wo adhẹẹ kẹe viere, ukpenọ ma rri rie kuẹku. Ghelọ ethobọ riẹ, Pọl ọ sae ta avọ udu okenọ o je kere se ukoko obọ Kọrint inọ: “Wha rọ aro kele omẹ, wọhọ epanọ mẹ rọ aro kele Kristi.” (1 Ahwo Kọrint 11:1) Nọ whọ tẹ rọwo ethobọ ra re, o sae whae ze nọ emọ ra a te rọ kpairoro vrẹ ethobọ ra.
15, 16. Fikieme u ro fo re esẹgbini a wuhrẹ emọ rai re a you inievo Ileleikristi rai, kọ ẹvẹ a sai ro ru onana?
15 Eme ọfa esẹgbini a rẹ sai ru evaọ uviuwou, nọ o rẹ sai fi obọ họ kẹ emọ rro evaọ uyoyou nọ a re wo kẹ Jihova? Jọn ukọ na o kere nọ: “Re ohwo jọ ọtẹta nọ, ‘Me you Ọghẹnẹ,’ o te mukpahe omoni riẹ, ọyena họ ọterue, keme ọnọ o you omoni riẹ hẹ, ọnọ ọ rẹ ruẹ, ọsai you Ọghẹnẹ hẹ, ọnọ ọ rẹ ruẹ hẹ.” (1 Jọn 4:20, 21) Fikiere, nọ wha te bi wuhrẹ emọ rai re a you ibe Ileleikristi rai, yọ wha bi wuhrẹ ai re a wo uyoyou kẹ Ọghẹnẹ. U fo re esẹgbini a nọ oma rai nọ, ‘Oghẹrẹ eme vẹ e be hẹ mai no omẹ unu ze kpahe ukoko na, ẹme ọbọga manikọ obrukpe?’ Ẹvẹ whọ sae rọ riẹ? Hae gaviezọ ziezi nọ emọ ra a tẹ be ta ẹme kpahe iwuhrẹ gbe ahwo ukoko na. Ẹsejọhọ who ti yo etata ẹme ra evaọ unu emọ na.
16 Eme esẹgbini a rẹ sai ru ro fi obọ họ kẹ emọ rai you inievo Ileleikristi rai? Ọsẹ emezae ivẹ nọ a re se Peter ọ ta nọ: “Anwọ okenọ emọ mai a rọ jọ emaha, ma jẹ hai zizie Ileleikristi nọ i wo eriariẹ ukoko na kẹ emuọriọ, yọ a jẹ hae raha oke kugbe omai ziezi evaọ uwou mai, onana o jẹ hae kẹ omai evawere gaga. Evaọ udevie ahwo otiọna nọ a you Jihova na emezae mai a jọ whẹro, a tẹ te ruẹ vuhumu nọ re a gọ Ọghẹnẹ yọ edhere uzuazọ nọ o rẹ kẹ evawere.” Ọsẹ emetẹ isoi nọ a re se Dennis ọ ta nọ, “Ma ta udu họ emetẹ mai awọ re a mu usu kugbe ekobaro nọ e kpako no evaọ ukoko na, yọ ẹsikpobi nọ o tẹ lọhọ, ma jẹ hai dede esẹro ọnyawariẹ avọ eyae rai ziọ uwou mai.” Kọ who gbe wuhrẹ emọ ra re a rri inievo ukoko na wọhọ ahwo uviuwou ra jọ?—Mak 10:29, 30.
Owha-Iruo Ọmọ
17. Iroro vẹ emọ a rẹ jẹ kẹ omarai?
17 Wariẹ muẹrohọ oriruo ohwo nọ ọ rẹ sa ose na. Ohwo na ọ tẹ make riẹ ose ẹsa ziezi, ẹsejọhọ ose na o rẹ sai kie oware nọ ọ gwọlọ sa na ha otẹrọnọ o gẹle. Uzẹme inọ ọsẹgboni a te daoma liọ ose na, wọhọ odẹme, ẹkwoma iroro ethọthọ ọmọ rai nọ a rẹ daoma kpọvi. Rekọ o gba emọ na họ inọ a rẹ jiroro na kẹ oma rai sọ a te kuvẹ re akpọ nana ọ kpọ ai hayo a te kẹ Jihova uvẹ re ọ ‘kpọ idhere rai vi.’—Itẹ 3:5, 6; Ahwo Rom 12:2.
18. Ẹvẹ edhere uzuazọ nọ ọmọ ọ salọ o rẹ sai kpomahọ amọfa?
18 Dede nọ esẹgbini a wo owha-iruo ulogbo nọ a re ro ru emọ rai “yo ẹme je wuhrẹ ai orọ Ọnowo na,” emọ na họ enọ e rẹ jiroro na kẹ omobọ rai sọ a rẹ te jọ emamọ ahwo eva odẹ notha. (Ahwo Ẹfẹsọs 6:4) Fikiere, whai emaha na wha nọ oma rai nọ, ‘Kọ mẹ te jẹ ọkpọvio oyoyou nọ ọsẹgboni mẹ ọ be kẹ omẹ rehọ?’ Wha tẹ jẹ uwuhrẹ rai rehọ yọ edhere uzuazọ nọ ọ mai woma kpaobọ wha salọ na. Wha te ru ere, eva e te were ọsẹgboni rai gaga. Maero na, u ti ru nọ eva e te rọ were Jihova.—Itẹ 27:11.
[Oruvẹ-obotọ]
a Onọ Isẹri Jihova a kere.
Kọ Whọ Kareghẹhọ?
• Ẹvẹ esẹgbini a re ro fi emamọ oriruo họ otọ eva ofẹ olẹ gbe ewuhrẹ Ebaibol?
• Ẹvẹ esẹgbini a sae rọ wha udhedhẹ haro evaọ uviuwou?
• Ẹsalọ vẹ emọ a rẹriẹ ovao dhe, kọ ẹvẹ edhere uzuazọ nọ a salọ u re kpomahọ amọfa?
[Uwoho nọ o rrọ ẹwẹ-obe avọ 28]
Kọ who bi fi emamọ oriruo ọrọ uwuhrẹ omobọ ohwo họ otọ kẹ ọmọ ra?
[Uwoho nọ o rrọ ẹwẹ-obe avọ 29]
Udhedhẹ o tẹ rrọ uviuwou o rẹ wha evawere ze