Esiwo No Eta Okpe-emevra Na

“[Jihova] oma riẹ o re ti siwi omẹ no ẹta okpe-emevra.”—OLEZI 91:3.

1. Ono họ “okpe-emevra” na, kọ fikieme ma jẹ yọrọ oma kẹe?

ILELEIKRISTI uzẹme kpobi a rẹriẹ ovao dhe ojihẹ jọ nọ o wo areghẹ gbe ẹghẹ vi ahwo-akpọ. A se rie “okpe-emevra” eva Olezi 91:3. Ono họ ọwegrẹ nana? Anwọ ukere June 1, 1883 ze, emagazini nana o bi ro dhesẹ inọ ọwegrẹ nana họ Setan Ẹdhọ na. Avọ ẹghẹ, ọwegrẹ ọgaga nana ọ be daoma re ọ viẹ ahwo Jihova họ jẹ kpahe ẹta kẹ ai wọhọ epanọ okpe-emevra o re ru na.

2. Fikieme a jẹ rọ Setan dhesẹ okpe-emevra?

² Evaọ oke anwae, a jẹ hai mu emevra fiki ile awere rai, erru ibekpe rai, rọkẹ emu othere hayo idhe-idhe. Rekọ, emevra e rẹ fiọfiọ ẹro gaga, a rẹ kaki kie ẹta ha. Fiki onana, ikpe-emevra erọ etoke nọ a ro kere Ebaibol na, a jẹ hae kaki wuhrẹ iruemu oghẹrẹ evra sa-sa nọ a gwọlọ mu. Kẹsena, a ve ru eta nọ a rẹ kaki rri mu hu nọ a re ro mu ai. Nọ Ebaibol ọ rehọ Setan dhesẹ okpe-emevra, o bi fi obọ họ k’omai re ma riẹ ereghẹ riẹ. Ẹdhọ o re wuhrẹ oghẹrẹ nọ mai omomọvo ọ rrọ. O re muẹrohọ uruemu mai, ọ vẹ lẹlẹ kpahe eta nọ o re ro mu omai ọkpokpọ. (2 Timoti 2:26) Obọ riẹ u te te omai yọ ọ raha usu mai kugbe Ọghẹnẹ no, yọ onana o rẹ sai su kpohọ ọraha ibẹdẹ. Fikiere, re ma siọ ẹta riẹ ba ekie ruọ, u fo re ma vuhu eghẹ sa-sa erọ “okpe-emevra” na.

3, 4. Okevẹ eghẹ Setan e rẹ rọ jọ wọhọ erọ okpohrokpo hayo arao-omuomu?

³ Ọso-ilezi na o dhesẹ re inọ eghẹ Setan e wọhọ erọ ọmọ okpohrokpo hayo arao-omuomu. (Olezi 91:13) Wọhọ okpohrokpo, ẹsejọ Setan ọ rẹ bọwo oma sa wọso ahwo Jihova ẹkwoma ukpokpoma hayo izi ọgbahọ nọ a re fihọ rọ gwọlọ whaha iruẹru rai. (Olezi 94:20) Ọwọsuọ ọgaga otiọye na o sai ru ahwo jọ zoruẹ. Rekọ evaọ ẹsibuobu, ọwọsuọ otiọnana, e rẹ wha ewoma ze jẹ lẹliẹ ahwo Ọghẹnẹ wo okugbe viere. Kọ ẹvẹ kpahe ọwọsuọ Setan nọ ọ wọhọ erọ arao-omuomu nọ a rẹ kaki rri mu hu?

⁴ Ẹdhọ ọ rẹ rọ ereghẹ ikpehru riẹ vẹ ruọ omai wọhọ epanọ arao-omuomu ọ rẹ họrọ no oria nọ u siomano ze na. Ọ rehọ enẹ nua iroro idibo Ọghẹnẹ jọ no, jẹ viẹ ai họ bi ru oreva riẹ ikpenọ a re ru oreva Jihova, ọ tẹ be rọ enẹ gele ai fihọ enwoma. Eva e were omai inọ ma rrọ igbori eghẹ Setan he. (2 Ahwo Kọrint 2:11) Enẹna joma t’ẹme kpahe eta iyoma ene jọ erọ “okpe-emevra” na.

Ozodhẹ Ohwo-Akpọ

5. Fikieme o rrọ lọhọ gaga re a kie kẹ ẹta “ozodhẹ ohwo-akpọ”?

⁵ “Okpe-emevra” na ọ riẹ nọ ohwo-akpọ ọ gwọlọ ajiri gbe ọjẹrehọ amọfa. Ileleikristi a wo ẹgwọlọ ọyena re, a rrọ ahwo nọ a rẹ daezọ iroro amọfa ha ha. Fikinọ Ẹdhọ ọ riẹ onana, ọ rẹ gwọlọ rehọ awaọruọ oghẹrẹ nọ amọfa a ti rri rai rọ ruọ Ileleikristi oma. Wọhọ oriruo, ọ rẹ viẹ idibo Ọghẹnẹ jọ họ kie ruọ ẹta “ozodhẹ ohwo.” (Itẹ 29:25) Idibo Ọghẹnẹ a tẹ rọ fiki ozodhẹ ohwo-akpọ bi lele amọfa ru oware nọ Jihova ọ rẹ ghọ, hayo siọ oware nọ Ebaibol ọ ta ba eruo, yọ a kie ẹta “okpe-emevra” na no.—Izikiẹl 33:8; Jemis 4:17.

6. Oriruo vẹ o dhesẹ oghẹrẹ nọ ọmoha ọ sai ro kie ruọ ẹta “okpe-emevra” na?

⁶ Wọhọ oriruo, uzoge ọ sai kie kẹ otunyẹ ibe emọ isukulu riẹ, o ve vovo isigareti. Ẹsejọhọ isigareti ivovo e ziọ iroro riẹ vievie he taure o te ti kpohọ isukulu ẹdẹ yena. O je ti rri hi, o duomahọ oware nọ o rẹ dha Ọghẹnẹ eva jẹ tubẹ wha ẹyao sei no. (2 Ahwo Kọrint 7:1) Ẹvẹ o ro kie ruọ odawọ na? Ẹsejọhọ o kuomagbe ikpehre egbẹnyusu, ọ tẹ be dhozọ eva nọ o re ru dha ae. Whai izoge, wha jọ “okpe-emevra” na ọ bẹbẹ owhai ruọ ẹta riẹ hẹ! Re ọ siọ owhai ba emu ọkpokpọ, wha whaha ekie kẹ edawọ esese. Yoẹme kẹ unuovẹvẹ Ebaibol na kpahe ekpehre usu.—1 Ahwo Kọrint 15:33.

7. Ẹvẹ Setan ọ sai ro ru esẹgbini jọ rọ oma kẹ ẹgwọlọ abọ-iwo siọ ọrọ abọ-ẹzi ba?

⁷ Esẹgbini Ileleikristi a se owha-iruo rai nọ a rẹ rọ rẹrote iviuwou rai evaọ abọ-iwo gboja gaga wọhọ epanọ Ikereakere na e ta. (1 Timoti 5:8) Dede na, ẹjiroro Setan họ re o ru Ileleikristi raha oke thesiwa kẹ ẹgwọlọ eware eyero akpọ na. Ẹsejọhọ iwuhrẹ i bi vo ai kẹse kẹse fikinọ enọ a bi ruiruo kẹ a gwọlọ nọ a raha oke vi epanọ a gbẹ tamu. Ozọ o sai tube mu ai re a yare uvẹ nọ a re ro kpohọ abọ kpobi ọrọ okokohọ ubrotọ nọ a rẹ jọ kuomagbe inievo rai gọ Jihova. ‘Ẹrorọsuọ Jihova,’ oye o rẹ thọ omai no ẹta nana. (Itẹ 3:5, 6) Ofariẹ, ma tẹ be kareghẹhọ inọ mai yọ ahwo uviuwou Jihova gbe inọ Jihova ọ riẹ nọ o wo owha-iruo re ọ rẹrote omai, u ti fi obọ họ k’omai jọ owowa. Kọ whai esẹgbini wha rọwo inọ Jihova ọ te rọ edhere jọ rẹrote owhai avọ iviuwou rai nọ wha te bi ru oreva riẹ? Manikọ, wha te kẹ Ẹdhọ uvẹ re o mu owhai ọkpokpọ ro ru oreva riẹ fiki ozodhẹ ohwo-akpọ? Ma tudu họ owhai awọ re wha roro jẹ lẹ kpahe enọ nana.

Agbefẹ Ekwakwa-Efe

8. Edhere vẹ Setan ọ rẹ rọ rehọ ẹta ilale-efe ruiruo?

⁸ Setan ọ rẹ jẹ rehọ isiuru ilale-efe kpahe ẹta k’omai. Akpọ na ọ be tudu họ idhere nọ a re ro fe asohẹrioke, onana o sae viẹ idibo Ọghẹnẹ jọ họ. Ẹsejọ a rẹ tudu họ ahwo awọ nọ: “Kru obọ ga. Nọ who te fe no, who ve serihọ riakpọ kuoma. Oke yena whọ sai ru ọkobaro dede.” Eme itienana yọ eme ọ eriwo abọvo ọrọ otu nọ e rẹ gwọlọ rọ ibe eg’Ọghẹnẹ rai rọ kọ okọ. Dai roro ẹme nọ a be ta k’owhẹ na. Kọ i gbe dhesẹ oghẹrẹ iroro ọdafe “ogheghẹ” nọ Jesu ọ rọ kẹ ọtadhesẹ na?—Luk 12:16-21.

9. Fikieme Ileleikristi jọ a re ro kie ruọ ẹta egwọlagwọlọ?

⁹ Oghẹrẹ nọ Setan ọ be kpọ akpọ omuomu riẹ o be lẹliẹ ahwo wo isiuru kẹ ekwakwa akpọ na. Isiuru itieye na e rẹ sae rọ ẹmẹrera daruọ Oleleikristi oma, te epanọ i re ro duwu ẹme Ọghẹnẹ je ru ei jọ “ababọ ubi.” (Mak 4:19) Ebaibol e tudu họ omai awọ inọ ma te wo emuore gbe emuẹgọ jọ enana e d’omai ẹro. (1 Timoti 6:8) Ghele na, ibuobu i bi kie ẹta “okpe-emevra” na keme a bi fi ẹme nana h’iruo ho. Kọ o sae jọnọ omorro o be lẹliẹ ai roro nọ a gbe wo ekwakwa eyero jọ họ yọ a t’ahwo ho? Kọ ẹvẹ kpahe mai omamai? Kọ ma be rọ fiki eware jọ nọ ma gwọlọ wo gbabọkẹ egagọ uzẹme? (Hagai 1:2-8) O d’omai gaga inọ inievo jọ e jọ etoke ọbẹwẹ gbabọkẹ usu rai kugbe Jihova no re a sai gbe yeri uzuazọ akpọriọ nọ o rerie rai oma no. Nwanọ omarọkẹ ilale-efe utiona “okpe-emevra” na ọ gwọlọ!

Ẹta ọrọ Ighe-Iriwo nọ I Fo Ho

10. Ẹvẹ Oleleikristi ọ rẹ rọ kiẹ oma riẹ riwi?

¹⁰ Ẹta ọfa ọrọ “okpe-emevra” na họ re o ru ahwo kare utuoma kẹ oware uyoma. Oghẹrẹ iroro nọ ahwo nọ a jọ Sọdọm avọ Gomora a wo oye o be kpọ enọ i bi ru eware ugheriwo nẹnẹ. Makọ iyẹrẹ gheghe nọ a be nẹ evaọ etẹlivisiọno gbe ebe-usi, a be jarai fi erru họ ozighi gbe isiuru ọfariẹ-ogbe. Eware buobu nọ a be jọ ekwakwa awhusi dhesẹ i bi kpe ẹgba-iroro nọ ahwo a rẹ rọ “hẹriẹ uwoma no uyoma.” (Ahwo Hibru 5:14) Rekọ, kareghẹhọ ẹme nọ Jihova ọ ta ẹkwoma Aizaya inọ: “Uye u re te enọ i re se eyoma ewoma, gbe ewoma eyoma!” (Aizaya 5:20) Kọ “okpe-emevra” na ọ lẹlẹ rehọ ugheriwo etọtọ raha iroro ra no? U fo re ma kiẹ oma mai riwi.—2 Ahwo Kọrint 13:5.

11. Didi unuovẹvẹ Uwou-Eroro Na o kẹ no kpahe ighe-iriwo etẹlivisiọno jọ?

¹¹ Enwenọ ikpe 25 nọ e vrẹ, Uwou-Eroro Na o vẹvẹ idibo Ọghẹnẹ unu kpahe eware nọ a be jọ etẹlivisiọno dhesẹ.a A ta kpahe epanọ edrama nọ a be jọ iredio gbe etẹlivisiọno ru e rẹ rọ rehọ ẹmẹrera kpomahọ iroro ohwo inọ: “A be rehọ isiuru uyoyou wọhọ unoma kẹ uruemu ọfariẹ kpobi. Wọhọ oriruo, uzoge ọmọtẹ jọ nọ o gb’ọfariẹ jẹ rọ ere dihọ, ọ ta kẹ ogbẹnyusu riẹ nọ: ‘Me you Victor gaga. Mẹ daezọ oware nọ u re noi ze he. . . . Mẹ tẹ sai yẹ ọmọ kẹe ọvo dede u te kẹ omẹ!’ Ile awere nọ a bi kporo lele ẹme na u re ru ei bẹbẹ kẹ ohwo nọ ọ be gaviezọ re o roro nọ owojẹ riẹ na o thọ. Whẹ omara dede who ve ti mu emamọ ubiẹro họ ero rri Victor. Ohrọ ọmọtẹ na o vẹ te re owhẹ. Udu ra o vẹ te lọhọ. Ohwo jọ nọ ọ jẹ hai rri ighe itienana vẹre nọ o rri otọ mu uwhremuna, ọ ta nọ: ‘Oghẹrẹ nọ whọ rẹ rọ jẹ uruemu othọthọ rai rehọ u re gb’owhẹ unu. Ma riẹ nọ ọfariẹ-ogbe ọ thọ. . . . Rekọ mẹ tẹ te ruẹ nọ mẹ be jọ iroro mẹ kuomagbe ahwo na.’ ”

12. Eme ọ be via nọ u dhesẹ inọ unuovẹvẹ nọ a k’omai kpahe ighe-iriwo etẹlivisiọno na u kiehọ?

¹² Anwẹnọ a ro kere izoẹme yena, ighe-iriwo itieye na nọ i re gbe udu ohwo ku i bu vi epaọ ọsosuọ no. Evaọ eria buobu, taso tuvo a bi dhesẹ eware nana. Te ezae, te eyae, gbe emoha a be rehọ eware ẹkeriotọ nana kuọ iroro gbe idu rai kẹse kẹse. Rekọ, joma viẹ omai mai họ họ. O thọ re ma roro inọ eware nọ ma be rọ ẹro ruẹ kẹdẹ kẹdẹ evaọ akpọ na i yoma vi enọ a be jọ etẹlivisiọno dhesẹ dede. Kọ Oleleikristi ọ sae ta nọ u kiehọ re ọ gaviezọ kẹ hayo riwi ughe ahwo nọ o roro inọ ọ sai zizie ziọ uwou riẹ ẹdọvo ho?

13, 14. Irere vẹ ahwo jọ a ta inọ a wo no unuovẹvẹ nọ a kẹ kpahe ighe etẹlivisiọno ze?

¹³ Ibuobu nọ e gaviezọ kẹ unuovẹvẹ yena orọ ‘ọrigbo nọ o wo ẹrọwọ avọ areghẹ’ na a wo erere noi ze. (Matiu 24:45-47) Ejọ nọ i se ohrẹ uvevẹ yena nọ a rono Ebaibol ze na, a kere kpahe epanọ izoẹme na i kpomahọ ai.b Ọjọ ọ ta nọ: “Ikpe 13 soso me je rri ighe yena. Me je roro nọ i ti kpomahọ omẹ hẹ fiki iwuhrẹ Ileleikristi gbe usiuwoma ota nọ mẹ jẹ hae nya ẹsejọ. Rekọ ẹmẹrera na me te ti wo ọkpọ iroro ahwo nọ a bi dhesẹ evaọ ighe nana inọ ọzae ra ọ gbẹ be riẹ owhẹ ru hu hayo who te roro nọ o you owhẹ hẹ, who te bru-ẹnwae o thọ họ—ọye ọ soriẹ. Fikiere nọ mẹ ruẹ oware jọ jobọ kru no, me te bru-ẹnwae rọ ere raha uzi Jihova je ru ọzae mẹ thọ.” A si aye nana no ukoko. Uwhremuna, nọ ibiaro riẹ i totọ no, o te kurẹriẹ, a jẹ rehọ iẹe zihe ze. Izoẹme nọ a rọ vẹvẹ unu kpahe ighe etẹlivisiọno nana, e kẹ riẹ udu nọ ọ rọ siọ eware ẹkeriotọ kpobi nọ Jihova o mukpahe.—Emọs 5:14, 15.

¹⁴ Omọfa nọ o wo erere no ehrẹ nana ze ọ ta nọ: “Mẹ viẹ nọ me se izoẹme nana no, keme me ti vuhumu inọ eva mẹ e gbẹ fo evaọ aro Jihova ha. Mẹ tẹ yeyaa kẹ Ọghẹnẹ mẹ inọ mẹ te gbẹ jọ ọrigbo kẹ ighe-iriwo nana ofa ha.” Enẹ oniọvo ọfa jọ nọ uruemu nana o reria obọ no ọ ta nọ o se izoẹme na no: “U gbe omẹ unu inọ . . . onana o sae raha usu mẹ kugbe Jihova. Ẹvẹ mẹ sae rọ jọ ogbẹnyusu Jihova nọ ahwo nana a tẹ rrọ egbẹnyusu mẹ?” Otẹrọnọ ighe etẹlivisiọno itieye na i gbe iroro ahwo ku ikpe 25 nọ e vrẹ, ẹvẹ i re kpomahọ ahwo te no nẹnẹ? (2 Timoti 3:13) Ma re muẹrohotọ kẹ agbefẹ Setan ọrọ koghẹrẹ koghẹrẹ ighe-iriwo etẹlivisiọno, erozaha igigidi ividio, gbe ile ọfariẹ nọ a be jọ ividio kporo.

Agbefẹ ọrọ Ẹbẹbẹ nọ Ọ Rẹ Jọ Udevie Ibe Ileleikristi

15. Ẹvẹ Ẹdhọ o ro mu ejọ ọkpokpọ no?

¹⁵ Setan ọ rẹ rehọ ẹbẹbẹ nọ ọ rẹ jọ udevie Ileleikristi ivẹ wọhọ agbefẹ nọ o re ro fi ohẹriẹ họ udevie idibo Jihova. Ma rẹ sai kie ẹta nana makọ uvẹ-iruo nọ ma wo evaọ egagọ Jihova kẹhẹ. Ẹdhọ o mu ejọ ekpokpọ no fikinọ a kuvẹ re ẹwhọ ọ raha okugbe avọ udhedhẹ gbe obọdẹ uyero abọ-ẹzi nọ Jihova ọ rọ ghale ahwo riẹ na.—Olezi 133:1-3.

16. Ẹkwoma ẹghẹ vẹ Setan ọ be rọ gwọlọ raha okugbe mai?

¹⁶ Nọ Ẹmo Akpọ I o je fi, Setan ọ daoma re ọ raha abọ otọakpọ ọrọ ukoko Jihova ẹkwoma ọwọsuọ ovao dhe ovao, rekọ ọ kparobọ họ. (Eviavia 11:7-13) Anwọ oke yena ze ọ tẹ be gwọlọ rọ ẹghẹ raha okugbe mai. Ma tẹ kẹ ẹbẹbẹ nọ ọ rẹ sae roma via evaọ udevie mai uvẹ re ọ raha okugbe mai, kiyọ ma gbẹ edhere kẹ “okpe-emevra” na no. Ma sae jẹ rọ ere kare ẹthẹ dhe ẹzi ọfuafo na evaọ uzuazọ mai gbe eva ukoko na. Oyena o tẹ via, oma u re muọ Setan keme ọ riẹ inọ oware jọ o tẹ raha udhedhẹ gbe okugbe ukoko na, u re kpomahọ iruo usiuwoma ota na.—Ahwo Ẹfẹsọs 4:27, 30-32.

17. Ẹvẹ enọ ẹbẹbẹ ọ rrọ udevie rai a rẹ sai ro ku ebẹbẹ itieye na họ?

¹⁷ Kọ eme who re ru otẹrọnọ ẹbẹbẹ ọ rrọ udevie ra avọ oniọvo jọ? Uzẹme, ebẹbẹ kpobi e sae nwane jọ oghẹrẹ ovo ho. Rekọ, dede nọ eware buobu e rẹ sae suọ ẹwhọ ze, ẹjiroro ọvo ọ riẹ hẹ nọ ma rẹ rọ seba ẹruẹrẹhọ. (Matiu 5:23, 24; 18:15-17) Ehrẹ Ebaibol na nọ a rọ ẹzi Ọghẹnẹ kere na e gbakiete. Nọ ma te fi ehri-izi Ebaibol h’iruo, i re fi obọ họ gaga. E rẹ kẹ erere ẹsikpobi!

18. Ẹvẹ Jihova nọ ma rẹ raro kele u re ro fi obọ họ k’omai ku ẹwhọ họ?

¹⁸ Jihova ọ “vọ avọ . . . erọvrẹ.” (Olezi 86:5; 130:4) Ma tẹ be raro kele iei yọ ma bi dhesẹ nọ mai yọ emọ iyoyou riẹ. (Ahwo Ẹfẹsọs 5:1) Mai kpobi erahaizi yọ ma gwọlọ erọvrẹ Jihova gaga. Fikiere, joma rri otọ mu gaga otẹrọnọ o rrọ bẹbẹ k’omai re ma rọvrẹ ohwo jọ. Ogbẹrọ ere he, ma vẹ te jọ wọhọ ọrigbo nọ Jesu o ro bru ohare na, ọnọ ọ se inọ ọ rẹ rọ osa ibe ọrigbo riẹ rọ vrẹ riẹe he, dede nọ o jọ kakao nọ a tẹ rehọ iẹe wawo onọ olori riẹ ọ rọvrẹ ọyomariẹ. Nọ olori riẹ o yo oware nọ o via, o te gbolo ọrigbo nọ ọ kare erọvrẹ na fihọ uwou-odi. Jesu o ku ohare na họ nọ: “Ere Ọsẹ mẹ nọ ọ rọ obọ odhiwu o re ru owhai omomọvo u re, wha gbẹ rọ vrẹ ọvuọ omoni riẹ no eva ha.” (Matiu 18:21-35) Nọ ma te roro didi kpahe ọtadhesẹ yena je roro te unuẹse buobu nọ Jihova ọ rọ vrẹ omai no, u ti fi obọ họ k’omai evaọ okenọ ma tẹ be ruẹrẹhọ kugbe oniọvo mai!—Olezi 19:14.

Adhẹzọ Evaọ “Oria Oride Na”

19, 20. Ẹvẹ ma re rri “oria Oride na” gbe “otọ uwoho Erumeru na” evaọ etoke imuozọ nana?

¹⁹ Ma be rria etoke imuozọ. Ogbẹrọ fiki ọthọwẹ oyoyou Jihova ha, enẹ yọ Setan o kpe omai kpobi no. Re ma siọ ẹta “okpe-emevra” na ba ekie ruọ, ma rẹ daji oria adhẹzọ ẹwoho na, ma rẹ “ria oria Oride na,” koyehọ “otọ uwoho Erumeru na.”—Olezi 91:1.

²⁰ Joma rri ekpọvio gbe izi Jihova wọhọ ifi nọ a rọ gb’omai vievie he, rekọ joma rri rai wọhọ ọthọwẹ. Mai kpobi ma rẹriẹ ovao dhe ojihẹ nọ o wo ereghẹ vi ohwo-akpọ. Ababọ obufihọ Jihova, ohwo ọvo nọ o re kie ẹta riẹ hẹ ọ rrọ họ. (Olezi 124:7, 8) Fikiere joma lẹ se Jihova re ọ thọ omai no egbefẹ “okpe-emevra” na!—Matiu 6:13.

[Oruvẹ-obotọ]

Kọ Whọ Kareghẹhọ?

• Fikieme “ozodhẹ ohwo” o rọ rrọ ẹta oyoma?

• Ẹvẹ Ẹdhọ ọ be rọ rehọ isiuru efe ruiruo?

• Ẹvẹ Setan ọ rọ rehọ agbefẹ ugheriwo nọ i fo ho mu ahwo jọ no?

• Ẹta vẹ Ẹdhọ ọ rẹ rọ gwọlọ raha okugbe mai?

[Uwoho nọ o rrọ ẹwẹ-obe avọ 27]

Agbefẹ “ozodhẹ ohwo” o mu ejọ no

[Uwoho nọ o rrọ ẹwẹ-obe avọ 28]

Kọ whọ be gaviezọ kẹ je riwi eware nọ Jihova o mukpahe?

[Uwoho nọ o rrọ ẹwẹ-obe avọ 29]

Eme who re ru otẹrọnọ ẹbẹbẹ ọ rrọ udevie ra avọ ibe Oleleikristi jọ?