Nọ A Te Bi Voro Ileleikristi Wọhọ Eka
KIỌKỌ omojọ re Jesu o te whu, ọ vẹvẹ ilele riẹ unu inọ: ‘Ri, Setan ọ yare re ọ rehọ owhai, re o voro owhai wọhọ eka.’ (Luk 22:31) Eme họ otofa ẹme riẹ na?
Evaọ edẹ Jesu, re a kọrọ eka o gwọlọ oke gbe omodawọ gaga. Orọ ọsosuọ, ewhẹrẹ na a rẹ kọrọ eka na no obọ ẹwọ ze. A vẹ rehọ ure tehe ae hayo rehọ ekpala nọ a tehe utehru fihọ nọ erao i re si rọ nya wariẹ rọ kpare ibi-eka na no igbe rai je si ehọrọ no ai oma. Kẹsena, ewhẹrẹ na a vẹ whẹ ibi-eka na kpehru nọ ofou o bi fo na. Ibi-eka na i ve kie zihe ziọ oria uwuhu-eka na, rekọ ofou na o ve fo ehọrọ na kufiẹ. A ve voro ibi-eka na re a si ibitho gbe erara efa kpobi no ai no.
Evaọ orugba ẹme Jesu, Setan ọ ginẹ wọso ilele Jesu evaọ okenọ u kpemu, yọ ọ be wọso omai nẹnẹ re. (Ẹf. 6:11) Uzẹme riẹ họ, orọnikọ Setan ọ be nwane wha ebẹbẹ kpobi nọ ma rẹriẹ ovao ku ze he. (Ọtausi. 9:11) Rekọ, Setan ọ be daoma gaga re ọ rehọ edhere kpobi ru omai siọ Ọghẹnẹ ba ẹgọ. Wọhọ oriruo, ọ rẹ sae dawo omai re ma kie lele efe, re ma salọ aruọzaha omawere nọ i fo ho, hayo re ma duomahọ uruemu ọfariẹ-ogbe. Ọ sae jẹ rọ ẹkwoma egbẹnyusu mai eva obọ isukulu hayo eva oria iruo mai gbe ẹkwoma imoni mai nọ e rọ ukoko ho ru omai re ma rehọ oke mai kpobi le eware akpọ. Ofariẹ, Setan ọ sae jẹ rọ ahwo kpokpo omai evaọ omodawọ riẹ re ma siobọno ẹgbakiete mai kẹ Ọghẹnẹ. Uzẹme o rrọ, idhere efa buobu e riẹ nọ Setan o bi ro voro omai, wọhọ odẹme.
Ẹvẹ ma sai ro mugba kẹ ọwegrẹ ọgaga nana? Ma sae rọ ẹgba obọmai ru onana ha. Setan ọ ga vi omai; rekọ, Jihova ọ ga vi ei kpekufiẹ. Ma te fi eva mai kpobi họ Jihova, lẹ sei re ọ k’omai areghẹ gbe udu nọ ma re ro thihakọ, jẹ rẹroso ọkpọvio riẹ, ọ te k’omai ẹgba nọ ma re ro mugba kẹ ọwọsuọ Setan.—Ol. 25:4, 5.
Nọ odawọ u te t’omai, u fo re ma wo ẹgba nọ ma rẹ rọ “hẹriẹ uwoma no uyoma” re eghẹ Setan e siọ omai ba e su thọ. (Hib. 5:13, 14) Jihova ọ rẹ sai fiobọhọ k’omai wo ẹgba yena. Fikiere, o make ga kẹhẹ, ma rẹ talamu oware uwoma uruo. Ma te bi lele ọkpọvio Jihova, o ti fiobọhọ k’omai evaọ ọtamuo mai nọ ma rọ gwọlọ ru oware uwoma.—Ẹf. 6:10.
Setan ọ sae daoma voro mai wọhọ eka. Rekọ evaọ ogaga Jihova, ma sai mudhe kẹe, dikihẹ ga eva orọwọ na. (1 Pita 5:9) Ẹhẹ, Ebaibol e tuduhọ omai awọ inọ: “Mudhe kẹ ẹzi ukumuomu ọ rẹ te dhẹ se owhẹ ba.”—Jem. 4:7.