Enọ I bi Se Ebe Mai A Nọ Inọ

Fikieme Ọghẹnẹ Ọ Rọ Kuvẹ Kẹ Uye-oruẹ?

Orọnikọ Ọghẹnẹ ọ be wha uye-oruẹ ahwo-akpọ ze he. Ebaibol e ta nọ: “O rẹ bẹbẹ kẹ Ọghẹnẹ re o ru umuomu.” (Job 34:10) O tẹ rrọ ere, kọ ono họ ugogo ohwo nọ ọ wha uye-oruẹ ze?

Jesu o se Setan “okpohwo [hayo, osu] akpọ ọnana.” (Jọn 14:30) Uzẹme, Jihova họ Osu Ehrugbakpọ. O re si obọ no ọkwa yena kẹ omọfa vievie he. Dede na, Ọghẹnẹ ọ kẹ Setan uvẹ nọ o bi ro su ahwo-akpọ buobu evaọ ubroke.—1 Jọn 5:19.

Oghẹrẹ osu vẹ Setan ọ rrọ? No oke ọsosuọ ze nọ o ro dhomahọ uzuazọ ahwo-akpọ, Setan ọ rọ rrọ ojihẹ gbe ọviẹahwohọ. Setan ọ be wha idabolo se ahwo-akpọ evaọ idhere sa-sa. Jesu ọ ta kpahe iẹe nọ: “Nọ emuhọ ze ọrọ ojihẹ, ọ rọ evaọ uzẹme he, epanọ uzẹme ovo orọ eva riẹ hẹ. Nọ ọ ta erue, ọ ta erọ obọ riẹ, keme ọ ye họ ọterue gbe ọsẹ riẹ.” (Jọn 8:44) Jesu ọ ta re nọ ahwo nọ a jẹ gbẹgwae epanọ a re ro kpei na yọ emọ Setan, ojihẹ ọsosuọ na. A ru oma rai họ emọ riẹ keme uruemu rai u tho orọ Setan.

Setan ọ gbẹ be kọ iroro ojihẹ fihọ ahwo-akpọ udu. Wọhọ oriruo, R. J. Rummel, nọ ọ jọ profẹsọ evaọ Yunivasiti Hawaii, U.S.A., ọ ta nọ no umuo 1900 rite 1987, egọmeti sa-sa a kpe ahwo 169,198,000 evaọ etoke esuo-ohrowo, ikpakpe otu, gbe oghẹrẹ ozighi efa sa-sa. U te no enana nọ ma fodẹ na no, a kpe ima ahwo gbidigbidi efa evaọ ẹmo etoke ọvona.

Otẹrọnọ Ọghẹnẹ ọ be wha uye-oruẹ ze he, kọ fikieme ọ rọ kẹe uvẹ? Fikinọ eme-avro jọ nọ i kpomahọ ehrugbakpọ na soso nọ a kpare ze oke krẹkri nọ u kpemu o gwọlọ ekuhọ. Joma ta ẹme kpahe ovo rai jọ.

Evaọ emuhọ ikuigbe ohwo-akpọ, Adamu avọ Ivi a rọwo eme Setan, je ruọ abọ riẹ. A siọ esuo Ọghẹnẹ jẹ salọ nọ a re su omobọ rai, a je kiotọ kọ, otọ esuo Setan.— Emuhọ 3:1-6; Eviavia 12:9.

Utee uvi-oziẹ Jihova o gwọlọ nọ oke lelehie o rẹ vrẹ re imuẹro na e ruẹsi dhesẹ oma via vevẹ. Eme imuẹro na i dhesẹ via no? Uye-oruẹ ọvo esuo ohwo-akpọ nọ Ẹdhọ ọ be kpọ o rẹ wha ze. Evaọ uzẹme, oke nọ Ọghẹnẹ ọ kẹ na o wha erere se ahwo-akpọ no. Evaọ oghẹrẹ vẹ? Ahwo nọ a kiẹ imuẹro nana jẹ rọwo ai a wo uvẹ nọ a re ro dhesẹ inọ u no rai eva ze re Ọghẹnẹ o su ai. Ahwo nọ a wuhrẹ itee Ọghẹnẹ jẹ be rria lele ai a wo ẹruore uzuazọ ebẹdẹ bẹdẹ.—Jọn 17:3; 1 Jọn 2:17.

Uzẹme, akpọ na ọ rrọ otọ esuo omuomu Setan enẹna. Rekọ onana u bi ti nwene kẹle. Kẹlena, Jihova ọ be te rehọ Ọmọ riẹ “raha iruo ukumuomu na.” (1 Jọn 3:8) Wọhọ epanọ Jihova ọ ta kẹe nọ o ru, Jesu o ti si edada iroro gbe ebẹbẹ efa nọ ahwo a ruẹ uye rai no. Ọ te kpare ima-idu ahwo buobu nọ a ruẹ uye je whu ikpe buobu nọ e vrẹ no zihe ziọ uzuazọ.—Jọn 11:25.

Ẹkparomatha Jesu yọ oriruo ọrọ obọ nọ Ọghẹnẹ ọ kpare vi iruo Ukumuomu na—ẹmẹvo ọrọ eware nọ ahwo-akpọ nọ a salọ esuo Ọghẹnẹ a te reawere rai. (Iruẹru 17:31) Ebaibol na i si iroro mai kpohọ okenọ eme omosasọ nana i ti ro rugba: “[Ahwo-akpọ] gbe Ọghẹnẹ oma riẹ a gbẹ te jọ, ọ vẹ te jọ Ọghẹnẹ rai. Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.”—Eviavia 21:3, 4.