Rọ Aro Kele Imishọnare Nọ Ọ Mae Rro Na
“Wha rọ aro kele omẹ, wọhọ epanọ mẹ rọ aro kele Kristi.”—1 KỌR. 11:1.
1. Fikieme ma jẹ raro kele Jesu Kristi?
PỌL ukọ na ọ raro kele Jesu Kristi, imishọnare nọ ọ mae rro na. Pọl ọ tẹ jẹ tuduhọ ibe Ileleikristi riẹ awọ inọ: “Wha rọ aro kele omẹ, wọhọ epanọ mẹ rọ aro kele Kristi.” (1 Kọr. 11:1) Okenọ Jesu ọ wozẹ ikọ riẹ awọ ro dhesẹ oware nọ omaurokpotọ o rrọ no, ọ tẹ ta kẹ ae nọ: “Mẹ kẹ owhai oriruo no, re wha ru epanọ me ru k’owhai na re.” (Jọn 13:12-15) Mai Ileleikristi ọgbọna, o gb’omai họ inọ ma rẹ raro kele Jesu Kristi evaọ ẹme gbe uruemu.—1 Pita 2:21.
2. O tẹ make rọnọ Ugboma Esuo na o ri vi owhẹ wọhọ imishọnare he, didi ẹzi who re wo?
2 Evaọ uzoẹme nọ o vrẹ na, ma wuhrẹ inọ imishọnare yọ ohwo nọ a vi re ọ nyae ta usiuwoma. Pọl ọ nọ uvi enọ jọ kpahe onana. (Se Ahwo Rom 10:11-15.) Muẹrohọ inọ ukọ na ọ nọ inọ: “Ẹvẹ a re ro yo ababọ ọtusiuwoma?” Ọ tẹ rehọ ẹme no eruẹaruẹ Aizaya ze inọ: “Kinọ eru awọ ahwo nọ a be ta usiuwoma!” (Aiz. 52:7) O tẹ make rọnọ a ri wuhrẹ je vi owhẹ wọhọ imishọnare kpohọ orẹwho ọfa ha, whọ rẹ sai wo ẹzi ọtausiuwoma, whọ rẹ sae jọ ọtausiuwoma ọwhọ wọhọ Jesu. Ukpe n’ukpo, iwhowho Uvie nọ i bu te 6,957,852 a “ru iruo ọta-usiuwoma” evaọ ekwotọ 236.—2 Tim. 4:5.
“Ma Siọ Eware Kpobi Ba Ma te Lele Owhẹ”
3, 4. Eme Jesu ọ nya seba evaọ obọ odhiwu, kọ eme ma re ru hrọ re ma ruẹse jọ ilele riẹ?
3 Re ọ sai ru iruo nọ a kẹ riẹ evaọ otọakpọ na gba, Jesu “o se omariẹ gbe oware ovo ho, ọ tẹ rehọ oghẹrẹ oma odibo,” ọ tẹ nya siọ orro gbe uzuazọ nọ o yeri evaọ obọ odhiwu ba. (Fil. 2:7) Ma rẹ sae rehọ eware nọ ma nya seba evaọ akpọ nana rọ wawọ enọ Jesu ọ nya seba ha evaọ okenọ o no odhiwu ziọ otọakpọ. Rekọ ma rẹ sai kru oma ga wọhọ ilele riẹ, jẹ kpairoro vrẹ eware nọ ma nya seba no evaọ akpọ Setan.—1 Jọn 5:19.
4 Ẹdẹjọ o jariẹ nọ Pita ukọ na ọ ta kẹ Jesu nọ: “Ri, ma siọ eware kpobi ba ma te lele owhẹ.” (Mat. 19:27) Nọ Jesu o zizie Pita, Andru, Jemis, gbe Jọn, a tẹ nwane nya siọ ẹriri rai ba. A tẹ nya siọ okọ iyei-ikpe rai ba, a tẹ rehọ odibọgba na wọhọ iruo rai. Wọhọ epanọ Luk o kere, Pita ọ ta nọ: “Ri ma se iwou mai ba, ma te lele owhẹ.” (Luk 18:28) Ibuobu mai a re du nya siọ ‘iwou rai ba’ re a te ti lele Jesu hu. Rekọ ma rẹ ‘vro oma mai’ re ma sae jọ ilele Jesu jẹ jọ idibo Jihova nọ e rehọ oma rai kpobi kẹe. (Mat. 16:24) Uzuazọ utioye na o wha eghale buobu ze no. (Se Matiu 19:29.) Ma te wo ọwhọ kẹ iruo usiuwoma ota na wọhọ Kristi o rẹ wha oghọghọ s’omai, maero o tẹ make rọnọ ma w’obọ kakao evaọ ohwo jọ nọ a fiobọhọ kẹ si kẹle Ọghẹnẹ gbe Ọmọ oyoyou riẹ.
5. Gbiku jọ onọ u dhesẹ oware nọ ahwo nọ a kpohọ ukane a rẹ sai ru nọ a te kurẹriẹ.
5 Valmir, ohwo Brazil nọ ọ jẹ rria ẹmẹwho jọ evaọ Suriname, o wo oria nọ a rẹ jọ tọ gwọlọ igoru. Ọ jọ ọgbidi gbe ogbọfariẹ. Okenọ ọ kwa kpohọ okpẹwho jọ, Isẹri Jihova a te je wuhrẹ Ebaibol kugbei. Kẹdẹ kẹdẹ a je wuhrẹ kugbei, o te ti ru inwene buobu, u kri hi ọ tẹ họ-ame. Nọ ọ ruẹ inọ iruo na i bi ru ei bẹbẹ kẹe re o fi eware nọ o wuhrẹ evaọ Ebaibol họ iruo, ọ tẹ zẹ oria nọ a rẹ jọ gwọlọ igoru na no, jẹ kwa zihe kpobọ Brazil re o fiobọhọ kẹ uviuwou riẹ kuomagbei gọ Ọghẹnẹ. Ahwo buobu nọ i kurẹriẹ evaọ erẹwho efa nọ igho e dafia nọ a ro kpohọ ukane, a nya siọ ekọ rai ba no je zihe kpohọ ewho nọ a noze re a fiobọhọ kẹ imoni rai gbe amọfa gọ Jihova. Iwhowho-uvie nana a dhesẹ uvi ẹzi etausiuwoma no.
6. Eme ma rẹ sai ru otẹrọnọ ma rẹ sae kwa kpohọ oria nọ a mae jọ gwọlọ iwhowho Uvie he?
6 Isẹri Jihova buobu a kwa kpohọ ewho nọ a mae jọ gwọlọ iwhowho Uvie no. Ejọ e tubẹ kwa kpohọ erẹwho efa no nyae ta usiuwoma. Ẹsejọhọ o te nwane lọhọ re ma kwa ha, rekọ ma rẹ sae raro kele Jesu ẹkwoma utho ẹgba mai nọ ma re ru evaọ odibọgba na.
Jihova O Bi Wuhrẹ Ahwo Riẹ
7. Isukulu vẹ e riẹ nọ a be jọ wuhrẹ enọ e gwọlọ wo ẹnyaharo evaọ ona usiuwoma ota rai?
7 Wọhọ epanọ Ọghẹnẹ o wuhrẹ Jesu na, ma rẹ sai wo erere no ewuhrẹ nọ Jihova o bi wuhrẹ ahwo riẹ ze nẹnẹ. Jesu omariẹ ọ ta nọ: “A kere họ eva eruẹaro na nọ, ‘Ai kpobi Ọghẹnẹ o re ti wuhrẹ.’” (Jọn 6:45; Aiz. 54:13) Nẹnẹ, a ruẹrẹ isukulu họ nọ a re jo wuhrẹ omai enọ e rrọ iwhowho Uvie. Ababọ avro, mai kpobi ma jọ Isukulu Odibọgba Esuo-Ọghẹnẹ nọ a rẹ jọ ikoko mai ru na wo erere no. Ekobaro a wo uvẹ-ọghọ nọ a re ro kpohọ Isukulu Ekobaro Oke-Kpobi na. Ahwo buobu nọ i kri iruo ọkobaro na no, a wariẹ kpohọ isukulu na orọ avọ isiava no. Ekpako gbe idibo iruiruo a kpohọ Isukulu Odibọgba Uvie na no re a wo ẹnyaharo evaọ ona ewuhrẹ rai, gbe epanọ a re ro fiobọhọ kẹ ibe eg’Ọghẹnẹ rai. Ekpako gbe idibo iruiruo buobu nọ e re rọo ho a kpohọ Isukulu Ewuhrẹ Odibọgba na no, onọ a bi jo wuhrẹ epanọ a re ro fiobọhọ kẹ ahwo evaọ odibọgba na. Yọ inievo emezae gbe erọ emetẹ buobu nọ a wuhrẹ evaọ Isukulu Ebaibol ọ Giliad ọrọ Watchtower a vi rai kpohọ iruo imishọnare no evaọ erẹwho efa.
8. Eme u dhesẹ inọ inievo jọ a rri ewuhrẹ nọ Jihova o bi wuhrẹ ahwo riẹ ghaghae?
8 Isẹri Jihova buobu a nya siọ eware sa-sa ba no re a sai kpohọ isukulu enana. Re ọ sai kpohọ Isukulu Ewuhrẹ Odibọgba na, Yugu o no iruo nọ ọ jọ no fikinọ ọga iruo riẹ ọ se inọ ọ rẹ kẹe uvẹ nọ o re ro kpohọ isukulu na ha. Yugu ọ ta nọ: “Mẹ vioja oware nọ o via na ha. Evaọ uzẹme, a hae kẹ omẹ uvẹ na, a hai rẹro inọ mẹ te jọ ekọmpene na ribri ro dhesẹ nnọ uvẹ nọ a k’omẹ na o da omẹ ẹro. Rekọ enẹna mẹ ruẹrẹ oma kpahe no kẹ oria kpobi nọ Jihova ọ gwọlọ vi omẹ nya.” Ahwo buobu a rọ unevaze si obọ no eware nọ e jọ ikpeware kẹ ae no re a sai wo erere no ewuhrẹ nọ Ọghẹnẹ o bi wuhrẹ ahwo riẹ ze.—Luk 5:28.
9. Kẹ oriruo jọ nọ o dhesẹ erere nọ o re no uwuhrẹ Ikereakere na gbe osegboja ze?
9 Ewuhrẹ Ikereakere na kugbe osegboja u re fiobọhọ gaga. (2 Tim. 3:16, 17) Roro kpahe oriruo Saulo nọ ọ rrọ obọ Guatemala. Anwẹnọ a ro yẹi ọ rọ ko evaọ iroro, yọ owuhrẹ riẹ jọ ọ ta kẹ oni riẹ inọ ọ gbae họ re o wuhrẹ epanọ a re se obe he, keme ẹsiẹ u ti yoma. Saulo ọ riẹ epanọ a re se obe taure o te no isukulu hu. Rekọ Osẹri Jihova jọ ọ rehọ ibroshọ Apply Yourself to Reading and Writing (obe nọ a re ro wuhrẹ epanọ a re se je kere) wuhrẹ Saulo epanọ a re se obe. Ẹmẹrera na Saulo o te ti wo ẹnyaharo te epanọ o je ro ru ẹme evaọ Isukulu Odibọgba Esuo-Ọghẹnẹ. Ẹdẹjọ nọ oni Saulo ọ jọ usiuwoma, ọ tẹ nya ku iticha ọmọ riẹ na. Nọ iticha na o yo inọ Saulo ọ riẹ obe ese no, ọ tẹ ta kẹ oni riẹ inọ ọ whae lele oma ze evaọ oke ofa. Nọ Saulo o kpobọ uwou iticha na, iticha na ọ tẹ nọe nọ, “Eme who bi ti wuhrẹ omẹ?” Saulo o te mu edhe-ẹme jọ họ ese evaọ obe na Eme Ebaibol na O Gine Wuhrẹ? Iticha na ọ tẹ ta nọ: “Whẹ họ ohwo nọ o bi gine wuhrẹ omẹ na?” Avọ aro nọ i bi su ei ame, ọ tẹ gba Saulo.
Uwuhrẹ nọ U re Duobọte Udu
10. Emamọ obe vẹ ma wo nọ ma re ro wuhrẹ ahwo Ebaibol na?
10 Jesu ọ rehọ iwuhrẹ riẹ no eware nọ Jihova o wuhrẹ i riẹ je no Ikereakere na ze. (Luk 4:16-21; Jọn 8:28) Ma rẹ raro kele Jesu ẹkwoma efihiruo ohrẹ riẹ gbe Ikereakere na nọ ma rẹ rehọ iwuhrẹ mai no ze. Ma te bi ru enẹ, mai kpobi ma vẹ te t’ẹme je roro epọvo na, onana u ve fiba okugbe mai. (1 Kọr. 1:10) Eva e be were omai inọ ‘ọrigbo nọ o wo ẹrọwọ avọ areghẹ na’ o kere ebe nọ i bi fiobọhọ k’omai jọ okugbe evaọ eware nọ ma bi wuhrẹ amọfa, yọ ebe nana i bi je fiobọhọ k’omai ru iruo mai gba wọhọ etausiuwoma. (Mat. 24:45; 28:19, 20) Usu ebe nana họ obe Ebaibol Wuhrẹ na, onọ a fa fihọ evẹrẹ 179 no.
11. Ẹvẹ oniọvo-ọmọtẹ jọ evaọ obọ Ẹtiopia ọ rọ rehọ obe Ebaibol Wuhrẹ na fi ọwọsuọ kparobọ?
11 Re ma rehọ obe Ebaibol Wuhrẹ na ro wuhrẹ ahwo u re tube nwene iroro enọ e be wọso omai. Ẹdẹjọ ọ jariẹ nọ Lula, oniọvo-ọmọtẹ nọ ọ rrọ ọkobaro evaọ obọ Ẹtiopia o je wuhrẹ Ebaibol kugbe ohwo jọ, aye jọ nọ ọ rrọ omoni ohwo na o te thihi ruọ uwou na jẹ ta inọ a siọ uwuhrẹ na ba. Lula ọ tẹ rọ udu kpotọ rehọ ọtadhesẹ orọ igho iwhayo nọ ọ rrọ uzou avọ 15 orọ obe Ebaibol Wuhrẹ na jiroro kugbei. Aye na ọ tẹ r’udu kpotọ, kẹ ai uvẹ re a ru uwuhrẹ rai. Oke ọfa nọ a je ru uwuhrẹ na, aye nana ọ tubẹ keria gbae, jẹ yare inọ ọ gwọlọ inọ oniọvo nana o wuhrẹ obe kugbei, inọ ọ rẹ tubẹ hwosa fihọ uwuhrẹ na! A te ti mu uwuhrẹ na họ eru isiasa ẹkpoka, o te je wo ẹnyaharo ziezi.
12. Kẹ oriruo jọ nọ u dhesẹ epanọ emaha a bi ro wuhrẹ ahwo Ebaibol ziezi.
12 Emaha a rẹ sae rehọ obe Ebaibol Wuhrẹ na fiobọhọ kẹ amọfa. Okenọ Keanu, ọmọzae ikpe 11 jọ evaọ obọ Hawaii o je se obe nana, ọmọ-eklase riẹ jọ ọ tẹ nọe inọ, “Fikieme wha gbe ro koko edẹ-ehaa ha?’ Keanu o te se uyo na no uzoẹme na ze, “Kọ U Fo re Ma Koko Edẹ-Ehaa?” O te rovie kpohọ ẹwẹ-obe nọ a rẹ jọ ruẹ izoẹme nọ e rrọ obe na, ọ tẹ nọ ọmọzae na re ọ fodẹ uzoẹme nọ o mae were iẹe. A te mu uwuhrẹ Ebaibol họ. Evaọ ukpe iruo nọ u kpo, ebe-iwuhrẹ Ebaibol nọ Isẹri Jihova a ru i bu te 6,561,426, yọ obe Ebaibol Wuhrẹ na a ro ru iwuhrẹ nana buobu. Kọ whọ be rehọ obe nana wuhrẹ ahwo?
13. Edhere vẹ ewuhrẹ Ebaibol na o sai ro duobọte ahwo udu?
13 Re a rehọ obe Ebaibol Wuhrẹ na wuhrẹ ahwo u re duobọte udu enọ e gwọlọ ru oreva Ọghẹnẹ. Ọzae avọ aye jọ nọ e rrọ ekobaro obọdẹ evaọ obọ Norway a muọ obe-uwuhrẹ Ebaibol họ kugbe uviuwou jọ nọ a rrọ ahwo Zambia. Ahwo Zambia na a yẹ emetẹ esa no, fikiere a gbẹ gwọlọ yẹ hẹ. Nọ aye na o dihọ a tẹ jiroro inọ a rẹ kpare eva na. Umutho edẹ jọ taure aye na o te ti kpobọ ẹsipito, a te wuhrẹ uzoẹme nọ o ta nọ “Wo Eriwo Ọghẹnẹ Kpahe Uzuazọ.” Uwoho ọmọ nọ ọ rrọ eva nọ ọ rrọ uzoẹme na u duobọte ọzae avọ aye na udu te epanọ a rọ jiroro inọ a gbẹ te kpare eva na ha. A te wo ẹnyaharo ziezi, yọ okenọ a yẹ ọmọ na no a tẹ rehọ odẹ oniọvo-ọmọzae nọ o je wuhrẹ obe kugbe ai na ro sei.
14. Dhesẹ erere nọ o re noi ze otẹrọnọ ma fi eware nọ ma bi wuhrẹ họ iruo.
14 Obọdẹ edhere jọ nọ Jesu o je ro wuhrẹ ahwo họ o yeri uzuazọ nọ o rọwo kugbe eware nọ o je wuhrẹ. Emamọ uruemu Isẹri Jihova enọ e be raro kele Jesu evaọ edhere nana o be were ahwo buobu. Ahwo jọ a rovie ẹthẹ omoto ọrọ ọthueki jọ evaọ obọ New Zealand, a te tho ẹkpa riẹ. O te gu ẹme na kẹ iporisi, ọnọ ọ ta kẹe nọ: “Otẹrọnọ whọ rẹ ruẹ ẹkpa ra evaọ akpọ nana kiyọ omọvo Isẹri Jihova jọ ọ rue riẹ.” Omọvo Isẹri Jihova jọ nọ ọ be zẹ ebe-usi ọ ruẹ ẹkpa na. Nọ o yo nọ aye jọ ọ ruẹ ẹkpa na, ọzae na o te kpobọ uwou oniọvo-ọmọtẹ na. Udu u kie rie vi nọ ọ ruẹ inọ obe jọ nọ o ghare riẹ obọ gaga o gbẹ rrọ ẹkpa na. Oniọvo-ọmọtẹ na ọ tẹ ta kẹe nọ, “Mẹ rẹ sae rehọ ẹkpa na ha keme mẹ yọ omọvo Isẹri Jihova.” Akpọ u gbe ọzae na unu, keme ọ kareghẹhọ ẹme nọ iporisi na ọ ta kẹe evaọ ohiohiẹ ẹdẹ yena. Ginọ uzẹme, uvi Ileleikristi a bi fi eware nọ a be jọ Ebaibol wuhrẹ họ iruo, be raro kele Jesu.—Hib. 13:18.
Raro Kele Epanọ Jesu O Yeri Kugbe Ahwo
15, 16. Eme ma re ru re ovuẹ nọ ma bi whowho na u si ahwo urru?
15 Oghẹrẹ nọ Jesu o yeri kugbe ahwo o lẹliẹ ovuẹ riẹ si ai urru. Wọhọ oriruo, uyoyou gbe omaurokpotọ riẹ u si iwhrori bru ei. O dhesẹ ọdawẹ kẹ enọ i bru rie ze, jẹ rehọ eme iwowolẹ sasa ae oma, o siwi ibuobu nọ e jẹ mọ. (Se Mak 2:1-5.) Ma rẹ sai ru eware igbunu hu, rekọ ma rẹ sai dhesẹ uyoyou, omaurokpotọ, gbe ọdawẹ—eware nọ i re fiobọhọ si ahwo ziọ ukoko na.
16 Tariua, ọkobaro obọdẹ jọ, o dhesẹ ọdawẹ nọ o kpohọ uwou ọkpọkuọzae jọ nọ a re se Beere, ọnọ ọ be rria ẹwho ọsese jọ evaọ Kiribati, nọ ọ rrọ obọ South Pacific. Dede nọ ọzae na ọ ta kẹe inọ ọ gwọlọ gaviezọ họ, Tariua ọ ruẹ inọ ọzae na ọ dina ko, fikiere ohrọ ọzae na o tẹ riẹe. Ọ tẹ nọ ọzae na nọ: “Kọ who yo oware nọ Ọghẹnẹ ọ ya eyaa inọ o ti ru kẹ ahwo nọ e be mọ gbe enọ e kpako no?” Ọ tẹ jọ obe Aizaya se oria jọ kẹe. (Se Aizaya 35:5, 6.) Avọ isiuru, ọzae na ọ tẹ ta inọ, “U kri akpọ no nọ me bi ro se Ebaibol na yọ anwọ ikpe buobu imishọnare jọ evaọ ichọche mẹ ọ be rọ ziọ uwou mẹ, rekọ me ri se ku ẹme nana evaọ Ebaibol ho.” Oniọvo nana o te mu uwuhrẹ Ebaibol họ kugbe Beere, o te wo ẹnyaharo ziezi. Ẹhẹ, ọ ko, rekọ ma be t’ẹme na ọ họ-ame no, be sẹro utu ahwo nọ e rrọ oria nọ ukoko o rrọ họ, yọ ọ jẹ nya ẹkwotọ na kpobi duwu bi whowho emamọ usi na.
Gbẹ Hae Raro Kele Kristi
17, 18. (a) Ẹvẹ whọ sae rọ jọ uvi ọtausiwoma? (b) Erere vẹ o ti te enọ i se odibọgba na gboja?
17 Wọhọ epanọ iyẹrẹ isiuru buobu nọ ma be nyaku evaọ odibọgba na i bi dhesẹ, ma rẹ sae jọ uvi etausiuwoma otẹrọnọ ma raro kele oghẹrẹ nọ Jesu o yeri kugbe ahwo. Fikiere u fo gaga re ma raro kele Kristi wọhọ etausiuwoma ọwhọ!
18 Okenọ ahwo jọ a zihe ruọ ilele Jesu evaọ ikpe-udhusoi ọsosuọ, Pita ọ nọ inọ: ‘Kọ erere vẹ o ti t’omai?’ Jesu ọ tẹ ta nọ: “Kohwo kohwo nọ ọ se uwou hayo inievo emezae hayo inievo emetẹ hayo ọsẹ hayo oni hayo emọ hayo etọ, fiki odẹ mẹ, o re ti wo ekpahọ udhe-usoi, ọ vẹ jẹ reuku uzuazọ ebẹdẹ bẹdẹ.” (Mat. 19:27-29) Ma te ruẹ orugba ẹme yena ma tẹ gbẹ be raro kele Jesu Kristi, Imishọnare nọ ọ mae rro na.
Didi Uyo Whọ Te Kẹ?
• Ẹvẹ Jihova o bi ro wuhrẹ omai re ma jọ etausiuwoma?
• Ẹvẹ obe Ebaibol Wuhrẹ na u bi ro fiobọhọ evaọ odibọgba mai?
• Ẹvẹ ma sae rọ raro kele Jesu evaọ oghẹrẹ nọ ma bi yeri kugbe ahwo?
[Uwoho nọ e rrọ ẹwẹ-obe avọ 17]
Okenọ Jesu o zizie Pita, Andru, Jemis, gbe Jọn re a lele ei, a raha oke he
[Uwoho nọ e rrọ ẹwẹ-obe avọ 19]
Obe wọhọ “Ebaibol Wuhrẹ” na u re fiobọhọ k’omai jọ okugbe evaọ eware nọ ma bi wuhrẹ ahwo