Si Kẹle Ọghẹnẹ
Ọnọ O re Zihe Ohwo Ziọ Uzuazọ
KỌ OHWO jọ nọ ọ kẹle owhẹ gaga o whu no ẹdẹjọ? O tẹ rrọ ere, kiyọ oware jọ nọ o rẹ mae da kpaobọ o via kẹ owhẹ na. Ọnọ ọ ma omai na ọ riẹ epanọ onana o da owhẹ te. Tube viere dede, ọ rẹ sae kpare ahwo nọ a whu no ziọ uzuazọ. Ikuigbe ahwo nọ ọ kpare ze evaọ oke nọ u kpemu e rrọ Ebaibol na, re ma ruẹse riẹ inọ orọnikọ Ọnọ ọ rẹ kẹ uzuazọ ọvo ọ rrọ họ, rekọ ọ rẹ sae jẹ kpare ohwo ze nọ o te whu. Joma ta ẹme te ekparomatha jọ, nọ ọ rọ kẹ Ọmọ riẹ Jesu Kristi ogaga kpare ohwo nọ o whu no ziọ uzuazọ. Ikuigbe oware igbunu nana e rrọ Luk 7:11-15.
O jọ ukpe 31 C.E. Jesu o kpohọ ẹwho Galili nọ a re se Nein. (Owọ avọ 11) Oke o joma bi siaro họ no nọ o te ughe ẹwho na. Ebaibol e ta nọ: “Whaọ nọ ọ kẹle unu okpẹwho na no, koyehọ, a be wha ọ jọ nọ o whu vrẹ ọye ọvo họ ọmọzae oni riẹ, ọ tẹ rọ aye uku; ahwo okpẹwho na buobu a lele i rie.” (Owọ avọ 12) Dai roro epanọ uweri aye-uku yena o rẹ ga te! Ọthuke gbe omọvo nọ o kiọkọ nọ ọ rẹroso inọ ọ te rẹrote ei ọye o whu no na.
Jesu ọ tẹ rẹriẹ ovao dhe aye nọ ọ rrọ uweri na, ọnọ o wọhọ nọ ọ rọ kpahe ahwo nọ a wọ ori na. Ikuigbe na e ta nọ: “Olori na nọ ọ rue riẹ, ohrọ riẹ o tẹ riẹ e, ọ tẹ ta kẹ e nọ, ‘Whọ viẹ hẹ.’” (Owọ avọ 13) Oware nọ o via kẹ aye-uku na o da Jesu gaga. Ẹsejọhọ iroro riẹ e dhẹ kpohọ oni ọyomariẹ nọ o wọhọ nọ ọ jọ aye-uku re oke yena, nọ o bi ti weri uweri uwhu Jesu uviemenẹ.
Jesu o te bikẹle—rekọ orọnọ re o kuomagbe ahwo na wọ ori na nyai ki hi. Ọ tẹ “rọ obọ te owha na,” ogbotu na o te dikihẹ. Kẹsena ọ tẹ rọ edhuru ohwo nọ a kẹ ogaga nọ u vi uwhu ta nọ: “’Ẹghele mẹ ta kẹ owhẹ nọ, Kparoma.’ Ọ nọ o whu na ọ tẹ keria, o te mu ẹme họ ẹta. Ọ tẹ rehọ iẹ kẹ oni riẹ.” (Owọ avọ 14, 15) Uwhu u mi oni na ọmọ na no vẹre. Fikiere okenọ Jesu ọ “rehọ iẹ kẹ oni riẹ,” ọmọ na avọ oni na a tẹ wariẹ kuomagbe wọhọ uviuwou. Avro ọ riẹ hẹ, uweri aye-uku yena u zihe ruọ oghọghọ ulogbo.
Kọ whọ gwọlọ oghọghọ utioye—nọ who re ro kuomagbe oyoyou ra nọ o whu? Jọ u mu owhẹ ẹro nọ Ọghẹnẹ o wo ọdawẹ kẹ owhẹ. Aruọdawẹ nọ Jesu o wo kẹ aye-uku yena u dhesẹ ọdawẹ Ọghẹnẹ via, keme iruemu-aghae Jesu e nwani dhesẹ oghẹrẹ nọ Ọsẹ riẹ ọ rrọ via. (Jọn 14:9) Ebaibol i dhesẹ vevẹ inọ o rrọ isiuru Ọghẹnẹ re o zihe ahwo nọ a whu nọ a rrọ ekareghẹhọ riẹ ziọ uzuazọ. (Job 14:14, 15) Ẹme riẹ, Ebaibol na ọ kẹ ẹruore igbunu ọrọ uzuazọ evaọ otọakpọ aparadase, gbe ẹwariẹ-ruẹ iyoyou mai nọ a kpare no uwhu ze. (Luk 23:43; Jọn 5:28, 29) Kọ eme who gbe wuhrẹ eware efa kpahe Ọnọ o re zihe ahwo ziọ uzuazọ na gbe epanọ who re ro wo ẹruore ẹkparomatha na ha?
[Uwoho nọ e rrọ ẹwẹ-obe avọ 17]
“Ọ nọ o whu na ọ tẹ keria, o te mu ẹme họ ẹta. Ọ tẹ rehọ iẹ kẹ oni riẹ”