Si Kẹle Ọghẹnẹ
‘Wha Sae Thọrọ Omẹ Ẹro Ho’
KỌ JIHOVA ọ be ginẹ daezọ ahwo riẹ? Otẹrọnọ ọ be daezọ, ẹvẹ o wo ọdawẹ kẹ ai te? Ma rẹ sae riẹ iyo enọ yena evaọ edhere ọvo, koyehọ ẹkwoma ẹme jọ nọ ọ ta, nọ a kere fihotọ. Evaọ Ebaibol na, Jihova o dhesẹ epanọ o wo ọdawẹ kẹ ahwo riẹ te vevẹ. Muẹrohọ eme nọ e rrọ Aizaya 49:15.
Be ta kpahe epanọ o wo ọdawẹ kẹ idibo riẹ te, Jihova ọ rọ ẹkwoma Aizaya kẹ oriruo jọ nọ o re duobọte ohwo udu gaga. Ọ rọ onọ nana nọ o rẹ lẹliẹ ohwo roro didi na muhọ: “Kọ [ọmọ-unuevie] ọ sae thọ aye ẹro, nọ ọ gbẹ reohrọ ọmọ nọ o no edhede riẹ ze he?” Nọ who te yo ẹme yena, o sae wọhọ nọ uyo na o bẹ hẹ. Ẹvẹ ọmọ-unuevie ọ rẹ thọrọ oni riẹ ẹro? O rrọ bẹbẹ re ọmọ-unuevie ọ thọrọ oni riẹ ẹro keme taso tuvo ọmọ na ọ rẹroso oni riẹ, yọ ọmọ na ọ tẹ gwọlọ oware jọ, oni na ọ rẹ riẹ. Rekọ onọ nọ Jihova ọ nọ na u diwi vi onana.
Eme ọ rẹ lẹliẹ oni rẹrote ọmọ riẹ je ru ẹgwọlọ riẹ kpobi kẹe? Kọ fiki epanọ oni na ọ gwọlọ nọ ọmọ na ọ siọ oviẹ ba ọvo? Ijo. O rrọ ẹkoma oni re ọ reohrọ “ọmọ nọ o no edhede riẹ ze.” Ẹme Hibru nọ a fa “reohrọ” na o rẹ sai dhesẹ epanọ ohwo o re dhesẹ ọdawẹ kẹ omọfa nọ o wo obufihọ họ. Ọdawẹ nọ ọ mae ga kpaobọ ọye oni o re wo kẹ ọmọ-unuevie riẹ.
Rekọ uyoma gaga inọ orọnikọ ini kpobi i wo ọdawẹ kẹ emọ-unuevie rai hi. Jihova ọ ta nọ: “O sae thọ [eyae] enana ẹro dede.” Onana o rẹ sae via keme ma be rria akpọ nọ ezae avọ eyae buobu a jo “wo eva egaga.” (2 Timoti 3:1-5) Ẹsejọ, ma re yo kpahe ini nọ i gbabọkẹ emọ-unuevie rai jẹ dhẹ siọ ae ba. Kpahe Aizaya 49:15, obe jọ o ta nọ: “Ini nọ i yẹ emọ a gba ha, yọ evaọ ẹsejọ evega e rẹ sai ru ai siọ uyoyou ba edhesẹ kẹ emọ rai. Makọ ohwo-akpọ nọ ọ mai wo uyoyou kpaobọ ọ rẹ sai gbabọkẹ oyena ẹsejọ.”
Rekọ Jihova ọ kẹ omai imuẹro inọ: “Wha sae thọ omẹ ẹro ho.” Obọnana ma rẹ sai wo otoriẹ oware nọ o lẹliẹ Jihova nọ onọ nọ a kere fihọ Aizaya 49:15 na. Orọnikọ Jihova ọ be rọ omariẹ rọ wawọ ahwo-akpọ họ. Wo ohẹriẹ no iniemọ nọ e rẹ sai gbabọkẹ emọ rai evaọ ẹsejọ, Jihova o re gbabọkẹ hayo kpairoro vrẹ idibo riẹ vievie he. U kiehọ gaga inọ obe nọ ma fodẹ evaọ obehru na o ta kpahe Aizaya 49:15 inọ: “Onana yọ ovojọ evaọ usu eme nọ Ọghẹnẹ ọ ta evaọ Ọvọ Anwae na ro dhesẹ uyoyou udidi nọ o wo kẹ ahwo.”
Kọ o gbẹ rrọ oware omosasọ nọ ma rọ riẹ kpahe “ohrọ uyoyou Ọghẹnẹ mai”? (Luk 1:78) Daoma wuhrẹ kpahe epanọ whọ sai ro si kẹle Jihova viere. Ọghẹnẹ oyoyou nana ọ kẹ ahwo nọ a be gọe imuẹro inọ: “Mẹ sae se owhẹ ba hayo kiukeku owhẹ gbehe.”—Ahwo Hibru 13:5.