ENỌ NỌ EBAIBOL Ọ KẸ IYO RAI
Fikieme Jesu ọ te rọ wariẹ zihe ze?
Taure Jesu Kristi o te ti kpohọ obọ odhiwu evaọ 33 C.E., ọ ta nọ ọ te wariẹ zihe ze. Ọ rehọ omariẹ dhesẹ ọdafe nọ o kpohọ erẹ ugbothabọ nyae dẹ uvie. Fikiere oware nọ o te lẹliẹ Jesu wariẹ zihe ze họ re o su ahwo-akpọ.—Se Luk 19:11, 12.
Jesu o ti su akpọ na soso
Kọ oghẹrẹ oma vẹ Jesu o ti ro zihe ze? Oma ẹzi Ọghẹnẹ ọ rọ kpare iẹe no uwhu ze. (1 Pita 3:18) Kẹsena, o te kpohọ obọ odhiwu jẹ keria obọze Ọghẹnẹ. (Olezi 110:1) Uwhremu na, Jihova Ọghẹnẹ ọ tẹ kẹ Jesu ogaga nọ o re ro su ahwo-akpọ kpobi. Fikiere Jesu nọ a ro mu Ovie no na o ti zihe ze, orọnikọ ahwo a te rọ ibiaro ruẹ eriẹ hẹ, rekọ evaọ oma ẹzi.—Se Daniẹl 7:13, 14.
Eme Jesu o ti ru nọ o te zihe ze?
Okenọ Jesu avọ ikọ-odhiwu riẹ a te zihe ze, o ti gu ahwo akpọ ẹdhọ. Ọ te raha ahwo omuomu no, ọ vẹ rọ uzuazọ ebẹdẹ bẹdẹ kẹ ahwo-akpọ nọ a yoẹme kẹe.—Se Matiu 25:31-33; Itẹ 2:22.
Nọ Jesu o te muhọ esuo no, o ti ru otọakpọ na soso zihe ruọ aparadase. Ọ te kpare ahwo nọ a whu no ze, re a sae reawere aparadase otọakpọ na.—Se Luk 23:42, 43.