Obi nọ Uwhu O rẹ Wha Ze

A tẹ ta ẹme kpahe uwhu, o rẹ gheghe ahwo kpobi ezọ. Ahwo buobu a rẹ gwọlọ ta kpahe iẹe he. Rekọ o maki kri kẹhẹ, o rẹ siọ omai ba ete he. A rẹ ruẹ unu gbiku edada nọ obi uwhu o rẹ wha ze he.

Nọ ọsẹgboni, ọrivẹ-orọo hayo ọmọ ohwo o te bi whu, u wo oware ovo nọ ohwo ọ rẹ sai ru rọ whahe iẹe he. Ẹsejọ dede, o rẹ via idudhe hayo ahwo uviuwou ohwo a sai whu unọjọ utọjọ. Oghẹrẹ nọ o rrọ kpobi kẹhẹ, edada uwhu e rẹ sae reria ohwo oma vievie he.

Antonio nọ ọsẹ riẹ o whu evaọ asidẹnte ọ ta nọ: “O rẹ jọ ohwo oma wọhọ ẹsenọ a kare ẹthẹ uwou ra jẹ wha usiavẹ na vrẹ. U wo oghẹrẹ ovo nọ whọ sae rọ ruọ eva uwou na ha, yọ whọ sai ru oware ovo ho. Akpọ ọvo o re gbe owhẹ unu. Dede nọ whọ rẹ kake rọwo nọ ohwo na o whu hu, u wo oware ovo nọ whọ rẹ sai ru hu.”

Dorothy nọ ọ jọ ikpe 47 evaọ okenọ ọzae riẹ o ro whu, ọ nọ enọ buobu kpahe uwhu nọ ọ jẹ gwọlọ iyo rai. Dede nọ ọ jẹ hai wuhrẹ emaha na evaọ obọ ichọche nọ ohwo o te whu no o re kpohọ oria jọ nyae rria, u mu rie ẹro ho, rekiyọ ọ riẹ oware nọ o rẹ ginẹ via kẹ ohwo nọ o whu no ho. Fikiere ọ tẹ nọ osu ichọche riẹ nọ: “Eme ọ rẹ via kẹ omai nọ ma te whu?” Ọ tẹ ta kẹe nọ: “Ohwo ọvo ọ riẹ oware nọ o rẹ via ha, ma rẹ hẹrẹ bọwo ẹdẹ nọ ma re whu re ma tẹ riẹ.”

Kọ ma rẹ hẹrẹ bọwo ẹdẹ uwhu taure ma tẹ riẹ oware nọ o rẹ via kẹ omai nọ ma te whu? Kọ u wo oghẹrẹ jọ nọ ma sae rọ riẹ nọ ohwo o te whu no yọ oriẹ u ri re he?