Ikpe 100 Erọ Esuo Uvie Na Ẹvẹ U ro Kpomahọ Owhẹ?

1, 2. Eme Uvie Ọghẹnẹ u ti ru, kọ ẹvẹ o sai ro mu omai ẹro nọ Uvie na o te ze?

EVAỌ ukpe 31 C.E. nọ Jesu avọ ilele riẹ a jọ ehru ugbehru jọ nọ o kẹle ẹwho Kapaniọm, o wuhrẹ ilele riẹ nọ a hae lẹ se Ọghẹnẹ nọ: “[Jọ] Uvie ra oze.” (Mat. 6:10) Ahwo buobu nẹnẹ a be vro sọ Uvie na o te ginẹ ze. Rekọ ma wo imuẹro nọ Jihova o ti yo olẹ nọ ma be hae lẹ sei inọ Uvie riẹ o ze na.

² Jihova ọ te rọ ẹkwoma Uvie na koko uviuwou riẹ nọ o rrọ obọ odhiwu gbe otọakpọ họ okugbe ọvo. Ẹjiroro Ọghẹnẹ yena o ti ru gba. (Aiz. 55:10, 11) Jihova o tube zihe ruọ Ovie no evaọ oke mai na. Eware nọ e via no anwọ ikpe udhusoi (100) nọ i kpemu na e kẹ imuẹro onana. Jihova o bi ru eware igbunu kẹ idibo riẹ nẹnẹ. (Zek. 14:9; Evia. 15:3) Dede na, re a ta nọ Jihova o zihe ruọ Ovie u wo ohẹriẹ no Uvie riẹ nọ o be tha, onọ Jesu o wuhrẹ ilele riẹ nọ a lẹ kẹ na. Ẹvẹ i ro wo ohẹriẹ, kọ ẹvẹ u ro kpomahọ omai?

OVIE NỌ JIHOVA O RO MU O MU IRUO HỌ

3. (a) Bovẹ a jọ rehọ Jesu mu Ovie, kọ oke vẹ? (b) Ẹvẹ whọ sai ro dhesẹ nọ a rọ Jesu mu Ovie evaọ ukpe 1914? (Rri oruvẹ-obotọ na.)

³ Evaọ ubrobọ ekuhọ ikpe-udhusoi avọ 19 na, idibo Ọghẹnẹ a te mu otoriẹ họ ewo kpahe eruẹaruẹ jọ nọ Daniẹl o kere fihotọ anwọ ikpe idu ivẹ gbe egba isoi (2,500) nọ i kpemu, onọ o kere nọ: “Evaọ ezi ivie eyena, Ọghẹnẹ obọ odhiwu na ọ rẹte rehọ uvie nọ a rẹ raha ha muẹ.” (Dan. 2:44) Evaọ etoke ikpe buobu, Emọ-Uwuhrẹ Ebaibol na a je dhesẹ kẹ ahwo nọ oware obọdẹ jọ o te via evaọ ukpe 1914. Ahwo buobu evaọ oke yena a je rẹro nọ ewoma ọ be tha. Ọgba ebe-ikere jọ ọ ta nọ: “Ahwo buobu a je rẹro nọ eware e te jọ wowoma evaọ ukpe 1914.” Rekọ Ẹmo Akpọ I o du lahwe ukpe yena nọ u dhesẹ orugba eruẹaruẹ Ebaibol. Ohọo, etọ nọ i bi nuhu, ẹyao, gbe eruẹaruẹ Ebaibol efa nọ i bi rugba no umuo oke yena ze e kẹ imuẹro nọ ukpe 1914 Jesu o ro muhọ esuo evaọ obọ odhiwu.a Jihova ọ rehọ ẹkwoma Ọmọ riẹ nọ o ro mu Ovie Uvie Mesaya na dhesẹ nọ ọyomariẹ o zihe ruọ Ovie no evaọ edhere ọfa jọ.

4. Eme Jesu o ru nọ a nwane rehọ iẹe mu Ovie no, kọ amono ọ rẹriẹ ovao bru?

⁴ Oware ọsosuọ nọ Ovie nọ Ọghẹnẹ o ro mu o ru họ, ẹmo nọ o lele Setan ọwegrẹ ologbo Ọsẹ riẹ fi. Jesu avọ ikọ-odhiwu riẹ a te gele Ẹdhọ avọ ikọ riẹ no obọ odhiwu. Onana u te ru nọ oghọghọ ulogbo o rọ jọ obọ odhiwu, rekọ o wha okpẹtu ziọ akpọ. (Se Eviavia 12:7-9, 12.) Kẹsena, Ovie na ọ tẹ rẹriẹ ovao bru ilele riẹ nọ e rrọ otọakpọ re o ru ae fo, wuhrẹ ae, jẹ ruẹrẹ ae họ re a ru oreva Ọghẹnẹ. Ilele na a jẹ emamọ owọ kpahe eware esa nana nọ Ovie na o ru na. Joma ta kpahe epanọ onana o rọ rrọ emamọ oriruo kẹ omai nẹnẹ.

OVIE NỌ A RO MU NA O RU ILELE RIẸ FO

5. Orufuọ vẹ ọ romavia no umuo ukpe 1914 rite emuhọ ukpe 1919?

⁵ Nọ Ovie na o le Ẹdhọ avọ idhivẹri riẹ no odhiwu no, Jihova o te vi ei re ọ kiẹ iruẹru egagọ ilele riẹ nọ e rrọ otọakpọ riwi je ru ae fo. Malakae ọruẹaro na ọ ta ẹme kpahe orufuọ nana. (Mal. 3:1-3) Ikuigbe i dhesẹ nọ onana o romavia no umuo ukpe 1914 rite abọ emuhọ ukpe 1919.b Re ma sae jọ abọjọ uviuwou ehrugbakpọ Jihova, o gwọlọ nọ ma rẹ jọ fuafo. (1 Pita 1:15, 16) O gba omai họ nọ ma kẹnoma kẹ iruẹru kpobi nọ i wobọ kugbe egagọ erue gbe isuẹsu akpọ na.

6. Ẹvẹ ma bi ro wo iwuhrẹ Ọghẹnẹ nẹnẹ, kọ fikieme i ro wuzou?

⁶ Kẹsena Jesu ọ tẹ rọ udu esuo riẹ rehọ “odibo oruọzewọ, nọ o wo areghẹ” mu. Odibo nana ọ te rọ obọdẹ emu ọrọ iwuhrẹ Ọghẹnẹ ko “uthuru ọvo” nọ o rrọ otọ ẹruọsa Jesu. (Mat. 24:45-47; Jọn 10:16) Anwọ 1919 ze, utu Ileleikristi jọ nọ a rọ ẹzi wholo a be romatotọ rọ iwuhrẹ Ọghẹnẹ ko “uwou” Olori na. Iwuhrẹ nana nọ ma be reawere rai n’oke t’oke na i bi ru ẹrọwọ mai ga. I bi je ru ọtamuo mai jọ gaga inọ ma rẹ jọ fuafo evaọ uruemu, iroro, gbe ugboma, je ru usu mai kugbe Ọghẹnẹ ga. Iwuhrẹ nana i bi je fi obọ họ kẹ omai wo onaa ziezi evaọ iruo usiuwoma ota nọ i wuzou gaga nọ ma rrọ akpọ soso ru nẹnẹ na. Kọ whọ be hai kpohọ iwuhrẹ je fi eware nọ who wuhrẹ họ iruo?

OVIE NA O BI WUHRẸ ILELE RIẸ RE A TA USIUWOMA EVAỌ AKPỌ-SOSO

7. Iruo vẹ nọ i wuzou Jesu o muhọ evaọ otọakpọ, kọ oke vẹ a ti ru iruo na te?

⁷ Okenọ Jesu o mu iruo usiuwoma ota riẹ họ evaọ otọakpọ, ọ ta nọ: “Mẹ rẹ vuẹovuẹ usiuwoma uvie Ọghẹnẹ [kẹ] ewho efa re; keme fiki onana a je vi omẹ ze.” (Luk 4:43) Iruo nana ọvo Jesu ọ tẹrovi evaọ etoke ikpe esa gbe ubro. Ọ ta kẹ ilele riẹ nọ: “Nọ wha te nya, wha hẹ vuẹ nọ, ‘Uvie odhiwu o kẹle ino.’” (Mat. 10:7) Nọ Jesu ọ kparoma no, ọ ta nọ ilele riẹ a te wha ovuẹ Uvie na te “ọnyaba akpọ na.” (Iruẹru 1:8) Ọ ya eyaa kẹ ae nọ ọ te jọ kugbe ai evaọ iruo nana nọ i wuzou gaga rite oke mai na.—Mat. 28:19, 20.

8. Ẹvẹ Ovie na ọ rọ tua ajọwha ilele riẹ kẹ iruo Uvie na?

⁸ Evaọ ukpe 1919, Emọ-Uwuhrẹ Ebaibol a wo otoriẹ okpokpọ nọ u ru rai roma kẹ ‘iruo usiuwoma ota Uvie na’ vi epaọ anwẹdẹ. (Mat. 24:14) Ovie na o muhọ esuo no evaọ obọ odhiwu, yọ ọ jọ otọakpọ na koko ilele jọ họ nọ o ru fo no. Ilele nana a rọ ọwhọ ru oware nọ Jesu ọ vuẹ rai, inọ a jọ otọakpọ na soso ta usiuwoma Uvie nọ Ọghẹnẹ o ro mu no. (Iruẹru 10:42) Wọhọ oriruo, iwhowho-uvie nọ e joma bu te idu udhe (20,000) a kpohọ okokohọ akpọ-soso nọ a ru evaọ Cedar Point, Ohio, U.S.A., evaọ amara Azie ọrọ ukpe 1922. Dai roro eva nọ e were ogbotu na okenọ Brọda Rutherford o ru ẹme nọ uzoẹme riẹ o ta nọ “The Kingdom” (Uvie na) je whowho nọ: “Rri, Ovie na o muhọ esuo no! Whai họ ahwo-ẹro riẹ. Fikiere wha whowho, wha whowho, wha whowho, Ovie na avọ uvie riẹ.” Evaọ ẹdẹ usiuwoma ota obọdẹ nọ a ruẹrẹhọ kẹ okokohọ na, inievo nọ i bu te idu ivẹ (2,000) a te kpohọ usiuwoma ota evaọ eria sa-sa nọ e rehọ emaele 45 thabọ no oria okokohọ na. Oniọvo-ọmọzae jọ nọ ọ jọ usu rai ọ ta nọ: “Usi Uvie na nọ a zizie ogbotu na inọ a nyai whowho ẹdẹ yena gbe ajọwha inievo nọ e jọ okokohọ na o rẹ thọrọ omẹ ẹro ho.” Ere o jọ kẹ inievo efa buobu re.

9, 10. (a) Isukulu sa-sa vẹ e riẹ nọ a bi jo wuhrẹ iwhowho-uvie? (b) Erere vẹ who wo no ewuhrẹ nana ze no?

⁹ Evaọ ukpe 1922, iwhowho-uvie nọ i bu vi idu ikpegbihrẹ (17,000) a jẹ jọ erẹwho akpọ na nọ i bu te 58 ta usiuwoma. Rekọ o gwọlọ nọ a re wuhrẹ ae. Evaọ ikpe-udhusoi ọsosuọ, Ovie nọ a salọ na o wuhrẹ ilele riẹ kpahe oghẹrẹ nọ a te rọ ta usiuwoma na, ẹme nọ a te ta, gbe oria nọ a te jọ tae. (Mat. 10:5-7; Luk 9:1-6; 10:1-11) Epọvo na Jesu o bi wuhrẹ ilele riẹ nẹnẹ je bi fi obọ họ kẹ ai wo eware nọ a sae rọ ta usiuwoma na ziezi. (2 Tim. 3:17) Ọ be rọ ẹkwoma ukoko na wuhrẹ ae onaa usiuwoma ota na. Isukulu Odibọgba Esuo-Ọghẹnẹ na yọ edhere jọ nọ o bi ro wuhrẹ ae, yọ a be jọ akpọ-soso ru isukulu nana evaọ ikoko nọ i bu vi idu ẹgba ọvo gbe ikpegbọvo (111,000). Iwhowho-uvie nọ i bu vi ima ihrẹ (7,000,000) a bi fi eware nọ a jọ isukulu nana wuhrẹ họ iruo, onọ u bi fi obọ họ kẹ ae ta usiuwoma kẹ je wuhrẹ “ahwo kpobi” evaọ oghẹrẹ nọ ẹme Ọghẹnẹ o re ro te ai udu.—Se 1 Ahwo Kọrint 9:20-23.

¹⁰ U te no Isukulu Odibọgba Esuo-Ọghẹnẹ na no, isukulu Ebaibol efa e riẹ nọ a be jọ wuhrẹ ekpako ukoko, ekobaro, inievo-emezae nọ e re rọo ho, ezae-avọ-eyae Ileleikristi, inievo ogbẹgwae uwou ogha avọ eyae rai, esẹro okogho gbe erọ ubrotọ avọ eyae rai, gbe imishọnare.c Inievo jọ nọ i nwrotọ no Isukulu Ebaibol Rọkẹ Ezae Ileleikristi avọ Eyae Rai a yere ukoko na kẹ ọruẹrẹfihotọ nana. A ta evaọ ileta uyere rai nọ: “Eware nọ ma wuhrẹ evaọ isukulu na i ru uyoyou mai kẹ Jihova ga vi epaọ anwẹdẹ kpobi no, yọ i ru omai wo obọdẹ onaa nọ ma sai ro fi obọ họ kẹ amọfa no.”

11. Ẹvẹ iwhowho-uvie a be sae rọ dadamu iruo usiuwoma ota na ghelọ ukpokpoma?

¹¹ Setan, ọwegrẹ Ọghẹnẹ na o bi muẹrohọ ọruẹrẹfihotọ iwuhrẹ nana kpobi gbe oma nọ idibo Ọghẹnẹ a be dawo evaọ iruo usiuwoma ota na. Ọ be daoma rọ ẹkwoma ọwọsuọ gbe ẹghẹ wha ebẹbẹ se inievo nọ e rrọ iruo na re ọ rọ ere fi awhaha họ iruo Uvie na. Rekọ omodawọ riẹ na kpobi ufofe. Jihova ọ rehọ Ọmọ riẹ keria agbara-uvie no “je ru ei kpehru thesiwa, o te wo udu gbe ogaga gbe ọtahobọ” kpobi. (Ẹf. 1:20-22) Jesu ọ be rọ udu-esuo riẹ kpọ jẹ thọ ilele riẹ re a sai ru oreva Ọsẹ riẹ.d A bi whowho ovuẹ Uvie na je wuhrẹ ahwo buobu nọ a wo emamọ eva oreva Jihova. A rẹ ruẹ obọ uvẹ-ọghọ nọ ma wo ho nọ ma bi ro wobọ evaọ iruo ilogbo nana.

OVIE NA Ọ RUẸRẸ ILELE RIẸ HỌ KẸ IRUO ILOGBO

12. Fodẹ oghẹrẹ inwene jọ nọ a ru no anwẹnọ a rọ rehọ Uvie Mesaya mu no.

¹² Anwọ ukpe 1914 nọ a rọ rehọ Uvie Ọghẹnẹ mu, Ovie na o ru inwene iwoma sa-sa no evaọ oghẹrẹ nọ ọ be rọ ruẹrẹ idibo Ọghẹnẹ họ kẹ oreva Ọghẹnẹ uruo. (Se Aizaya 60:17.) Evaọ ukpe 1919, a rehọ osu iruo usiuwoma ota mu evaọ ukoko kpobi re ọ rẹrote iruo na. Kẹsena evaọ ukpe 1927, a te ru ọruẹrẹfihotọ nọ a re ro kpohọ usiuwoma ota nuwou ruọ uwou evaọ Ẹdoka. Iwhowho-uvie na a wo ajọwha ọkpokpọ kẹ iruo ilogbo evaọ ukpe 1931, okenọ a re odẹ na Isẹri Jihova nọ a rehọ no Ebaibol ze. (Aiz. 43:10-12) Evaọ ukpe 1938, a te ru enwene ọkpokpọ jọ. No umuo ukpe yena vrẹ, a te je rri utee Ebaibol rọ rehọ ekpako ukoko gbe idibo iruiruo mu viukpọ ivotu. Kẹsena enwene ọfa ọ tẹ romavia evaọ ukpe 1972, a mu ẹruọsa iruẹru ukoko họ obọ ugboma ekpako viukpọ omọvo jọ nọ a jẹ hai se ọsẹro ukoko. A tuduhọ ezae nọ i kruga evaọ ukoko na awọ re a le utee ekpako hayo idibo iruiruo re a sai fi obọ họ “sẹro uthuru Ọghẹnẹ.” (1 Pita 5:2) Evaọ ukpe 1976, a tẹ ruẹrẹ Ugboma Esuo na họ egbẹgwae ezeza sa-sa re a rẹrote iruo usiuwoma ota Uvie na evaọ akpọ-soso. Ovie nọ Jihova o ro mu na ọ ginẹ rọ ẹmẹrera ruẹrẹ ilele riẹ fihọ oghẹrẹ nọ Ọghẹnẹ ọ gwọlọ.

13. Ẹvẹ eware nọ Uvie Mesaya na u ru no anwọ ikpe 100 na u ro kpomahọ uzuazọ ra no?

¹³ Roro kpahe eware sa-sa nọ Jesu o ru no anwọ ikpe ẹgba ọvo (100) nọ o bi ro su na. O ru ahwo jọ fo no nọ a be rọ odẹ Ọghẹnẹ se. Ọ be rẹrote iruo usiuwoma ota Uvie na evaọ erẹwho nọ i bu te egba ivẹ gbe ikpe esa gbe izii (239), yọ o wuhrẹ ima ahwo buobu oreva Jihova no. O koko ahwo nọ a bu vi ima ihrẹ (7,000,000) họ okugbe ọvo no evaọ egagọ uzẹme yọ a be rọ unevaze ru oreva Ọsẹ riẹ. (Ol. 110:3) Avro ọ riẹ hẹ, Jihova ọ be rọ ẹkwoma Uvie Mesaya na ru eware igbunu sa-sa. O ti ru eware nọ i tube gbunu vi enana evaọ obaro.

OWARE NỌ UVIE MESAYA NA U TI RU EVAỌ OBARO

14. (a) Ma tẹ lẹ se Ọghẹnẹ nọ “Uvie ra oze,” yọ eme ma be yare na? (b) Eme họ uzoẹme ẹgbukpe mai orọ 2014, kọ fikieme uzoẹme nana u ro fo?

¹⁴ Dede nọ Jihova ọ rehọ Ọmọ riẹ Jesu Kristi mu Ovie evaọ 1914, orọnikọ olẹ nọ ma rẹ lẹ nọ “Uvie ra oze” na ọ kuyo riẹ kpobi no na ha. (Mat. 6:10) Eruẹaruẹ Ebaibol e ta nọ Jesu ọ te “jọ eva evie ewegrẹ [riẹ] tahọ ae obọ.” (Ol. 110:2) Egọmeti akpọ na ọ gbe be wọso Uvie Ọghẹnẹ. Ma tẹ lẹ nọ jọ Uvie Ọghẹnẹ o ze, koyehọ ma be lẹ nọ jọ Ovie ọrọ Uvie Mesaya na avọ ibe isu riẹ a nyaze te raha egọmeti akpọ na gbe otu nọ ọ be wọso Uvie na kpobi evaọ otọakpọ. Onana o te jọ orugba ẹme nọ ọ rrọ obe Daniẹl 2:44 nọ o ta nọ Uvie Ọghẹnẹ o “rẹte whọlọ ivie na kpobi ọ vẹte rehọ ai ze oba.” O te raha egọmeti akpọ na nọ ọ be wọso Uvie na no riẹriẹriẹ. (Evia. 6:1, 2; 13:1-18; 19:11-21) Oke nọ onana o te rọ via o kẹle gaga no. Ukpe 2014 họ ukpe avọ ẹgba ọvo (100) nọ Uvie Ọghẹnẹ u bi ro su na, yọ uwoma gaga inọ uzoẹme ẹgbukpe mai orọ 2014 u no obe Matiu 6:10 ze nọ o ta nọ: ‘Jọ Uvie ra o ze.’

15, 16. (a) Obọdẹ eware vẹ e te romavia evaọ etoke Esuo Odu Ikpe Kristi na? (b) Eme họ oware urere nọ Ovie na Jesu Kristi o ti ru, kọ ẹvẹ oyena u ti ro kpomahọ ẹjiroro nọ Jihova o wo kẹ emama riẹ?

¹⁵ Nọ Ovie Uvie Mesaya na ọ tẹ raha ewegrẹ Ọghẹnẹ no, o ve ti gbolo Setan avọ idhivẹri riẹ fihọ ọgọdọ-odidi, a vẹ te jọ etẹe odu ikpe. (Evia. 20:1-3) Nọ a te si Ẹdhọ avọ idhivẹri riẹ no, Jesu o ve ti fi obọ họ kẹ ahwo wo erere no idhe ẹtanigbo na ze. O ve ti je si eyoma kpobi nọ uzioraha Adamu o wha ze n’otọ. Ovie na ọ vẹ te kpare ogbotu ahwo nọ a whu no ze, kẹsena o ve ti ru epanọ a re ro wuhrẹ ae kpahe Jihova. (Evia. 20:12, 13) Eware kpobi e vẹ te jọ wọhọ epanọ e jọ evaọ ọgbọ Idẹn. Oke yena, idibo Jihova kpobi a vẹ te jọ gbagba.

¹⁶ Okenọ Esuo Odu Ikpe Kristi na o ti ro kuhọ, yọ Uvie Mesaya na u ru ẹjiroro riẹ kpobi gba no. Kẹsena Jesu o ve ti si obọ no Uvie na kẹ Ọsẹ riẹ. (Se 1 Ahwo Kọrint 15:24-28.) O gbẹ te gwọlọ nọ ohwo jọ ọ jọ amiunugu evaọ udevie ahwo-akpọ gbe Ọghẹnẹ hẹ. Emọ Ọghẹnẹ kpobi nọ e rrọ obọ odhiwu gbe otọakpọ a vẹ te jọ ọvo kugbe Ọsẹ obọ odhiwu rai evaọ uviuwou ehrugbakpọ riẹ.

17. Eme whọ gba riẹ mu nọ who re ru kpahe Uvie na?

¹⁷ Eware nọ e via no anwọ ikpe ẹgba ọvo nọ Uvie Ọghẹnẹ u ro muhọ esuo na, o kẹ imuẹro nọ Jihova ọ be kpọ eware yọ ẹjiroro riẹ kpahe otọakpọ ọ te seba erugba ha. Joma romakpotọ kẹ Jihova ẹsikpobi jẹ hai whowho Ovie na avọ Uvie riẹ. Nọ ma bi ru ere na, jọ u mu omai ẹro nọ kẹle na Jihova ọ te kuyo olẹ nọ ma be hae lẹ sei inọ: ‘Jọ Uvie ra o ze.’