ENỌ NỌ EBAIBOL Ọ KẸ IYO RAI

Kọ Ebaibol na ginọ Ẹme Ọghẹnẹ?

Ebaibol na yọ obe nọ u wo ohẹriẹ no ebe efa kpobi, keme obọ Ọghẹnẹ u no ze. A fa Ebaibol na fihọ evẹrẹ buobu no yọ unu Ebaibol nọ a ru no, ẹkpẹhẹbe. Ebaibol na o wo ẹgba nọ o re ro nwene uzuazọ ohwo.—Se 1 Ahwo Tẹsalonika 2:13; 2 Timoti 3:16.

Ma riẹ nọ obọ Ọghẹnẹ Ebaibol na u no ze, keme o rẹ ta oware nọ o te via evaọ obaro. Ohwo ọvo o wo ẹgba nọ ọ sai ro ru oware utioye he. Wọhọ iriruo, roro kpahe obe Aizaya. Bu vrẹ ikpe udhusoi taure a te ti yẹ Jesu, a jọ eghogho utho jọ kẹle Dead Sea (Abade Owhuowhu) na ruẹ uko obe Aizaya na jọ. A jọ obe Aizaya na ta nọ a tẹ raha okpẹwho Babilọn muotọ no, ohwo ọvo ọ gbe te rriae he. Onana u rugba ikpe buobu nọ Jesu o kpohọ odhiwu no.—Se Aizaya 13:19, 20; 2 Pita 1:20, 21.

Oghẹrẹ vẹ a ro kere Ebaibol na?

Ezae 40 i kere Ebaibol na evaọ oware wọhọ ikpe nọ i bu vi odu ọvo gbe egba ezeza (1,600). Eme nọ aikpobi a kere e rọwokugbe ohwohwo. Kọ ẹvẹ oyena o sae rọ lọhọ? Ọghẹnẹ ọ rehọ ẹzi ọfuafo riẹ kpọ ae.—Se 2 Samuẹle 23:2.

Ẹkwoma ikọ-odhiwu, eruẹaruẹ, gbe ewezẹ Ọghẹnẹ ọ rọ ta oware nọ ahwo na a kere rọkẹ ae. Nọ Ọghẹnẹ o dhesẹ oware nọ ọ gwọlọ kẹ ai no, ọ tẹ kẹ ai uvẹ re ae ọvo a salọ emamọ eme nọ a re ro kere oware nọ o dhesẹ kẹ ai na vevẹ.—Se Eviavia 1:1; 21:3-5.