Jihova Ọ rẹ Ghale Ẹzi Unevaze

ỌNỌ ọ ma omai na, Jihova, ọ kẹ omai ahwo-akpọ uvẹ-ọghọ nọ ma sae rọ jiroro kẹ omamai. U te no ere no, ọ rẹ ghale enọ e rehọ uvẹ iroro-ejẹ rai salọ nọ a rẹ wha egagọ riẹ haro, be daoma ru odẹ riẹ fo je bi w’obọ evaọ eware nọ i re fiobọhọ nọ ẹjiroro riẹ o re ro rugba. Jihova ọ rẹ gwọlọ guegue ohwo hayo gba ohwo họ yoẹme kẹe he. Ukpoye, o rẹ were iẹe gaga nọ ohwo ọ tẹ be gọe fiki uyoyou nọ o wo kẹe gbe edẹro nọ o wo kẹ eware nọ o bi ru kẹ omai.

Wọhọ oriruo, okenọ emọ Izrẹl a jọ udhude Saena Jihova ọ vuẹ rai nọ a bọ uwou egagọ riẹ. Ọ ta kẹ ae nọ: “Ohwo kpobi ọ rehọ okẹ evawere, nọ ọ be rọ kẹ ỌNOWO na ze; jọ ọ rehọ okẹ ỌNOWO na ze.” (Ọny. 35:5) Ọ vuẹ emọ Izrẹl ẹme nana evaọ oghẹrẹ nọ ohwo kpobi ọ sae rọ kẹ utho nọ o wo, yọ onọ a kẹ kpobi te o kawo hayo o rro a sai ku ei kugbe rọ wha ẹjiroro riẹ haro. Eme emọ Izrẹl a ru?

Ebaibol na ọ ta nọ: “Ohwo kpobi nọ o dhẹ ruọ oma, gbe e nọ ẹzi ọ ruọ oma kpobi” a tẹ rọ ‘evawere’ rọ okẹ unevaze ze. Te ezae te eyae a rọ unevaze rehọ eware ze kẹ iruo Jihova: ifiare, emero-ezọ, emero oka, igoru, siliva, ẹroo, ifi iburu, ifi ogorurẹ, ohọ owawae-ogbagba, ehọ elọlọhọ efuafo, eto-ẹwe, eviẹ egbo, ure akasia, itho-eghaghae, eware nọ i re gbo ore awere, ewhri, gbe irieriẹ. Ukuhọ riẹ, “eware nọ a wo i re te iruo na, je kiọkọ.”—Ọny. 35:21-24, 27-29; 36:7.

Orọnikọ ekẹ nọ ahwo na a rọ ze na e mae were Jihova ha, rekọ ẹzi unevaze nọ ahwo na a rọ tha egagọ uzẹme uke. Yọ orọnikọ ekẹ ọvo ahwo na a rọ ze he, a rehọ oke obọrai gbe ugboma je ro ru iruo na re. Ikuigbe na e ta nọ: “Eyae kpobi nọ i wo ogaga a tẹ rehọ abọ rai zuo ehọ” nọ a je ro ru iruo na. “Eyae nọ i wo eva ezi kpobi a tẹ rehọ abọ rai zuo eto ewe na.” U te no ere no, Jihova ọ kẹ Bẹzalẹl “ogaga, gbe orimuo, avọ eriariẹ . . . ọwena” kpobi. Ẹhẹ, Jihova ọ kẹ Bẹzalẹl avọ Oholiab eriariẹ nọ a re ro ru iruo kpobi nọ Ọghẹnẹ ọ gwọlọ nọ a ru evaọ uwou egagọ nọ ọ gwọlọ nọ a bọ kẹe na.—Ọny. 35:25, 26, 30-35.

Nọ Jihova o zizie emọ Izrẹl nọ a ru unevaze kẹe, o wo evaifihọ nọ “ohwo kpobi ọ [te] rehọ okẹ evawere . . . ze” nọ a ti kugbe ro ru iruo Ọghẹnẹ. Jihova ọ rehọ ọkpọvio riẹ gbe oghọghọ nọ u wo oba ha ghale ahwo nana nọ a rọ unevaze rehọ ekẹ, oke, gbe ugboma tha iruo riẹ uke na. Jihova ọ tẹ rọ enẹ dhesẹ nọ, ọ tẹ be ghale ẹzi unevaze nọ idibo riẹ i wo, o re fiobọhọ kẹ ai wo eware gbe onaa nọ a sai ro ru oreva riẹ. (Ol. 34:9) Nọ who bi siobọno eware nọ e ghare owhẹ obọ kẹ egagọ Jihova na, ajọ u mu owhẹ ẹro nọ Jihova ọ te ghale ẹzi unevaze ra.

Idhere Nọ Otujọ A Bi Ro Ru Unevaze Kẹ Iruo Akpọ-soso

Wọhọ epanọ o jọ evaọ oke Pọl ukọ na, ahwo buobu nẹnẹ a rẹ ruẹrẹ “oware jọ kpahe,” hayo ma omaa ugho nọ a re fihọ ẹkpẹti unevaze ukoko na nọ a kere fihọ nọ “Worldwide Work” (Iruo Akpọ-Soso). (1 Kọr. 16:2) Kamara kamara, ikoko sa-sa a re vi ugho nana se uwou ogha Isẹri Jihova nọ o be rẹrote iruo usiuwoma ota evaọ orẹwho rai. Omomọvo ọ rẹ sai vi ugho unevaze se uwou ogha Isẹri Jihova nọ o rrọ orẹwho rai re. Re whọ sae riẹ epanọ who re ro ru onana, iviena se hayo kere se uwou ogha Isẹri Jihova nọ o rrọ orẹwho ra. Whọ rẹ sae ruẹ adrẹse uwou ogha nọ o rrọ orẹwho ra evaọ oria evuẹ Itanẹte na www.jw.org/iso. Idhere sa-sa nọ whọ sai ro ru unevaze ena:

OKẸ NỌ A RẸ KẸ OVAVO

A rẹ sae rehọ ẹkwoma ekade ebanke nọ a re se debit card gbe credit card ru unevaze ugho fihọ ẹkpa-ugho ukoko. Evaọ iwou ogha jọ, a rẹ sae rọ ẹkwoma oria evuẹ itanẹte jw.org mai hayo oria evuẹ itanẹte ofa kpobi nọ ukoko na o fodẹ ru unevaze fihọ ẹkpa-ugho ukoko.
Ugho, ivie gbe ifiare, hayo eware eghaghae efa. Kere ileta lele ugho hayo okẹ na ro dhesẹ nọ onana yọ okẹ unevaze.

UGHO NỌ A RỌ KẸ UKOKO NỌ A RẸ SAI MI ZIHE

Ohwo ọ rẹ sae kẹ okẹ ugho avọ ẹjiroro inọ a re zihe iei kẹe evaọ okenọ ọ gwọlọ e riẹ.
Kere ileta lele iei ro dhesẹ nọ onana yọ ugho nọ who ti mi zihe oke ofa.

OMAA ỌGHORUO

U te no ugho gbe eware eghaghae nọ ohwo ọ sae rọ kẹ okẹ no, idhere efa e riẹ nọ a re ro ru azọhọ unevaze nọ a rẹ rọ wha iruo Uvie na haro evaọ akpọ-soso. Ejọ rai e rrọ obotọ na. Oghẹrẹ kpobi nọ whọ gwọlọ rọ kẹ okẹ ra, iviena kere se uwou ogha nọ o rrọ orẹwho ra sọ a rẹ sae rọ oghẹrẹ utioye kẹ okẹ. Nọ orọnọ izi erẹwho sa-sa i wo ohẹriẹ no ohwohwo na, u wuzou re whọ nọ mi eriẹ-izi nọ e rrọ orẹwho ra re whọ sae riẹ edhere nọ ọ mai woma nọ whọ rẹ rọ kẹ okẹ ra.

Insurance [Azọhọ kẹ Okpẹtu Idudhe]: Ahwo jọ a rẹ hwa igho fihọ ekọmpene Insurance n’oke t’oke, re nọ a te whu ekọmpene na e vẹ hwa unuigho nọ a ta mu kẹ ohwo nọ a kere nọ a hwa igho na kẹ. Ahwo jọ a rẹ sai kere inọ jọ a hwa igho na kẹ Watch Tower. Amọfa a rẹ sai je kere inọ jọ a hwa igho arutẹriọ rai kẹ Watch Tower.

Igho nọ A Fihọ Ebanke: Ahwo jọ a re kere inọ a te whu a hwa igho jọ nọ a wo fihọ ebanke hayo erere nọ o bi no igho rai jọ ze kẹ Watch Tower.

Shares, Stocks gbe Bonds: Ahwo jọ a rẹ jẹ igho fihọ ebanke, ekọmpene, hayo iruẹru egọmeti jọ nọ ebanke hayo ekọmpene itieye a re kugbe rọ thueki rai, a ve kere inọ a hwa erere nọ o ti te ai kẹ Watch Tower hayo a rẹ sae ta inọ a te whu, jọ a hwa erere rai kẹ Watch Tower.

Etọ Hayo Iwou: A rẹ sae zọhọ etọ hayo iwou nọ a rẹ sae zẹ; o tẹ rrọ otọ nọ a bọ iwou fihọ no, ohwo ọ rẹ sae rehọ iwou na ru unevaze kẹ ukoko na ọ vẹ nya siọ ofẹ nọ ọ gwọlọ rria ba bẹsenọ o re whu, o je whu no a vẹ rehọ uwou nọ ọ jẹ rria na kugbe.

Obe Uku-Oghale gbe Oware nọ A Rọ Kẹ Ohwo Kru: Ohwo ọ rẹ sai kere inọ o te whu no, jọ a rehọ igho hayo ekwakwa riẹ jọ kẹ Watch Tower.

Wọhọ epanọ ẹme na “omaa ọghoruo” u dhesẹ na, o gwọlọ nọ ohwo ọ rẹ ma omaa ziezi re ọ tẹ kẹ eghẹrẹ ekẹ itiena kpobi.

Rọkẹ evuẹ efa, whọ rẹ sae rehọ adrẹse nọ ọ rrọ obotọ na kere se uwou ogha Isẹri Jihova nọ o rrọ Nigeria hayo rehọ ifonu lele ai t’ẹme hayo kere se uwou ogha nọ o rrọ orẹwho ra.