A Rọ Unevaze Fialoma Via​—Evaọ obọ New York

IKPE jọ nọ i kpemu, Cesar avọ aye riẹ Rocio, a je yeri uzuazọ akpọriọ evaọ obọ California. Ọzae na o je ru iruo evaọ oria nọ a rẹ jọ ruẹrẹ eware wọhọ ifriji gbe ekọdisiọne yọ aye riẹ o bi ru iruo ubroke evaọ ẹsipito. A wo uwou obọrai rekọ a yẹ ọmọ họ. Dede na, oware jọ o via nọ u nwene uzuazọ rai. Didi oware?

Evaọ Akpe 2009, uwou ogha mai nọ o rrọ obọ America u te vi ileta se ikoko kpobi nọ e rrọ orẹwho na soso bi ro zizie inievo kpobi nọ e rẹ sai ru iruo ubroke evaọ Ebẹtẹle re a fiobọhọ evaọ ebabọ ukoko na efa jọ nọ a bi ru evaọ Wallkill, New York. Makọ otu nọ ọ kpako vi unuikpe nọ a re ro zizie ohwo kpohọ Ebẹtẹle no a wo uvẹ nọ a rẹ rọ nya. Cesar avọ aye riẹ Rocio a ta nọ: “Fiki epanọ ma kpako te no, ma ruẹ nọ onana ọvo họ uvẹ nọ ma sai ro ru iruo evaọ Ebẹtẹle. Ma gwọlọ nọ oware ovuovo u ru nọ uvẹ nana o rẹ rọ vrẹ omai hi.” Ọzae-avọ-aye na a te fiobehọ ababọ okioraha.

Ẹgbukpe gbọ ọ ruemu rekọ a zizie ọzae-avọ-aye nana nọ a fiobehọ kẹ iruo Ebẹtẹle na ha. Ghele na, a daoma ru eware efa re a sai le utee rai na t’obọ, a siobọno eware jọ. Ọzae na ọ ta nọ: “Ma zihe oria nọ ma rẹ dhẹ omoto mai fihọ ruọ ubruwou, re ma sae haya uwou mai kẹ omọfa. Ma tẹ kwa no obọdẹ uwou ulogbo mai nọ ma bọ imikpe jọ nọ i kpemu ruọ ubruwou na. Inwene nana nọ ma ru na i ru omai ruẹrẹ oma kpahe vi epaọ anwẹdẹ kpobi kẹ iruo Ebẹtẹle na otẹrọnọ a zizie omai.” Kọ eme ọfa ọ via? Rocio ọ ta nọ: “Nọ ma rria ubruwou nọ ma kwa ro na te amara ọvo no, a te zizie omai inọ ma kpohọ iruo ubroke evaọ obọ Wallkill. Onana u dhesẹ vevẹ nọ uzuazọ mai nọ ma ru lọhọ na yọ uvẹ ma rovie kẹ Jihova re ọ ghale omai na.”

JIHOVA Ọ BE GHALE ẸZI OMARỌKẸ RAI

Wọhọ Cesar avọ Rocio, inievo buobu a siobọno eware sa-sa no re a sai w’obọ evaọ iruo ebabọ nọ a bi ru evaọ New York obọ America na. Ejọ rai a bi w’obọ evaọ iruo ebabọ obọ Wallkill na, yọ efa a wo uvẹ-ọghọ nọ a bi ro w’obọ evaọ ebabọ oria nọ ehri ukoko mai ọ te jọ evaọ obọ Warwick.a Re a sai w’obọ ziezi evaọ iruo Uvie na, inievo-emezae buobu avọ eyae rai a siobọno emamọ iwou rai, iruo nọ a je ru, gbe erao uwou rai nọ a jẹ hae rọwo nọ i no akotọ rai hi. Kọ Jihova ọ ghale ẹzi omarọkẹ inievo nana? Ee!

Wọhọ oriruo, oniọvo-ọmọzae nọ a re se Way nọ o re ru iruo ikpẹ avọ aye riẹ Debra nọ a joma kpako te ikpe 60 no a zẹ uwou rai evaọ ẹwho Kansas, kẹsena a tẹ kwa kpohọ oria jọ evaọ ẹwho Wallkill, re a hai no uwou rai nyai ru iruo kẹdẹ kẹdẹ evaọ Ebẹtẹle Wallkill.b Dede nọ a gbobọnẹ eware jọ evaọ uzuazọ rai re a sai le utee nana t’obọ, a ruẹ nọ irere nọ a bi wo i bu vi eware nọ a siobọno. Debra ọ ta kpahe iruo nọ o bi ru evaọ Ebẹtẹle na nọ: “Ẹsejọ o rẹ jọ omẹ oma nọ mẹ rrọ usu ahwo nọ a be hai fi iwoho rai họ ebe mai ro dhesẹ ahwo nọ a bi ru iruo ebabọ evaọ Aparadase na.”

Melvin avọ Sharon nọ a rrọ South Carolina a zẹ uwou gbe eware rai re a ruẹse nyai fiobọhọ evaọ ebabọ obọ Warwick. Dede nọ o jọ lọlọhọ kẹ ai re a ru onana ha, ọzae-avọ-aye na a rri rie wọhọ uvẹ-ọghọ ulogbo re a w’obọ evaọ ebabọ obọdẹ nana. A ta nọ: “A rẹ ruẹ unu gbiku evawere riẹ hẹ nọ ohwo ọ tẹ riẹ nọ o bi ru oware nọ o te wha erere se ukoko akpọ-soso mai na.”

Kenneth nọ o je ru iruo ebabọ vẹre avọ aye riẹ Maureen nọ a rrọ ikpe udhuvẹ gbe ikpegbọ a no California nyai fiobọhọ evaọ iruo ebabọ obọ Warwick. Re a tẹ te nya, a ru ọruẹrẹfihotọ kugbe oniọvo-ọmọtẹ jọ evaọ ukoko na re o fiobọhọ kẹ ae rẹrote uwou rai, a tẹ jẹ ta kẹ imoni rai nọ a fiobọhọ rẹrote ọsẹ ọzae na nọ ọ kpako no. Kọ a vioja owọ nọ a jẹ re a ruẹsi ru iruo evaọ Ebẹtẹle na? Vievie. Ọzae na ọ ta nọ: “Ma bi wo irere buobu. Kọ u dhesẹ nọ ma wo ebẹbẹ hẹ? Ijo. Dede na, ma bi yeri uzuazọ evawere yọ ma be r’obọ s’udu vuẹ amọfa inọ a roma kẹ iruo nana.”

A FI EBẸBẸ KPAROBỌ

U wo ebẹbẹ sa-sa nọ inievo buobu nọ e roma kẹ iruo ebabọ na a fi kparobọ. Wọhọ oriruo, William avọ Sandra nọ a kpako vrẹ ikpe 60 no obọ, a jẹ reawere uzuazọ rai evaọ Pennsylvania. A wo ekọmpene nọ o re ku ekwakwa ijini, yọ a wo ahwo 17 nọ e jọ otọ rai je ru iruo. Ukoko rai na a rrọ no emaha ze, yọ imoni rai buobu e be rria wariẹ ae họ. Fikiere okenọ uvẹ nọ a re ro ru iruo evaọ obọ Wallkill u rovie, a tẹ ruẹ nọ a te nyasiọ eware kpobi, te imoni gbe egbẹrioma nọ a gbẹ rrọ kugbe anwọ ikpe buobu ze na ba. William ọ ta nọ: “Avro ọ riẹ hẹ, okegbe nọ ọ reria omai oma no nọ ma jẹ nya seba na họ oware nọ o mae jọ use-abọ kẹ omai.” Rekọ, nọ a lẹ kpahe iẹe no, ọzae-avọ-aye na a tẹ nya. Onana o jọ owojẹ nọ a vioja riẹ vievie he. William ọ ta re nọ: “U wo oware ovuovo nọ a sai ro dhesẹ evawere nọ i re noi ze he nọ ohwo ọ tẹ rrọ kugbe inievo Ebẹtẹle bi ru iruo. Mẹ avọ Sandra ma be wereva enẹna vi epaọ anwẹdẹ.”

A zizie Ricky nọ o re ru iruo ẹruorote ebabọ evaọ obọ Hawaii inọ ọ hae ziọ Warwick ti fiobọhọ evaọ iruo ebabọ na. Kendra aye riẹ ọ gwọlọ nọ ọ jẹ uzizie na rehọ. Rekọ a jẹ ruawa epanọ a te sae rọ rẹrote Jacob ọmọzae rai nọ ọ rrọ ikpe 11. A te je roro sọ u fo re a kwa kpobọ New York, yọ u te no ere no, a jẹ ruawa epanọ oria okpokpọ na o te sae rọ reria ọmọzae rai oma nọ a tẹ kwa no.

Ricky ọ ta nọ: “Oware jọ nọ o mai jọ omai oja họ epanọ ma sae rọ ruẹ ukoko nọ izoge nọ i kruga evaọ ukoko na a rrọ ziezi. Ma gwọlọ nọ ọmọzae mai Jacob o re wo emamọ egbẹnyusu.” Dede na, emaha a bu ukoko nọ a kpohọ na tere he, rekọ inievo buobu nọ i bi ru iruo evaọ Ebẹtẹle e jariẹ. Ricky ọ ta nọ: “Evaọ ẹdẹ ọsosuọ nọ ma lele ukoko na kpohọ ewuhrẹ no, mẹ tẹ nọ Jacob epanọ o rri ukoko okpokpọ na, maero nọ uvumọ ọhwa riẹ ọ jariẹ hẹ na. Ọ tẹ vuẹ omẹ nọ, ‘whọ daezọ họ Dadi. Inievo nọ e re te kpako tere he nọ i bi ru iruo evaọ Ebẹtẹle na a te jọ egbẹnyusu mẹ.’”

Ere o ginẹ jọ, izoge nọ i bi ru iruo evaọ Ebẹtẹle na a mu usu kugbe Jacob. Eme o no rie ze? Ọsẹ riẹ ọ ta nọ, “Nọ mẹ jẹ nya aro ubruwou ọmọ mẹ na vrẹ aso ẹdẹjọ, mẹ tẹ ruẹ nọ ikpẹ riẹ i gbe bi lo. Me je roro nọ me ti di ei họ nọ ọ be fa ekọmputa gemu, kpakiyọ Ebaibol o bi se. Nọ mẹ nọ Jacob oware nọ o bi ru, ọ tẹ vuẹ omẹ nọ, ‘Mẹ gwọlọ ru wọhọ ohwo nọ ọ ziọ Ebẹtẹle obọ, me ti se Ebaibol na re evaọ ukpe ovo.’” Ricky avọ Kendra a bi wo evawere gaga enẹna, orọnikọ fikinọ Ricky o bi w’obọ evaọ iruo ebabọ Warwick na ọvo ho rekọ fikinọ ẹkwa rai na u ru nọ ọmọzae rai o bi ro wo ẹnyaharo ziezi evaọ egagọ Ọghẹnẹ.—Itẹ 22:6.

A BE RUAWA KPAHE OBARO HO

Iruo ebabọ obọ Wallkill gbe obọ Warwick na i ti kuhọ ẹdẹjọ, fikiere inievo nọ a zizie re a fiobọhọ evaọ iruo na a riẹ nọ iruo nọ a bi ru evaọ Ebẹtẹle na e te jọ ubroke. Kọ inievo nana a be ruawa vrẹta kpahe obonọ a ti kpohọ gbe oware nọ a ti ru nọ iruo na i te kuhọ no? Vievie! Ibuobu rai a wo ọkpọ iroro inievo-emezae jọ avọ eyae rai nọ i no Florida ze. John, ọnọ ọ rẹ rẹrote iruo ebabọ avọ aye riẹ Carmen, nọ a bi ru iruo ubroke evaọ ebabọ obọ Warwick na a ta nọ: “Ma rọ ẹro ruẹ epanọ Jihova ọ rọ rẹrote ẹgwọlọ mai no rite enẹna. Yọ orọnikọ Jihova o zizie omai ziọ obonẹ re ukuhọ riẹ o gbabọ kẹ omai hi.” (Ol. 119:116) Luis, ọnọ o wo onaa epanọ a rẹ rọ whẹ ekwakwa nọ a re ro furie erae họ evaọ uwou avọ aye riẹ Quenia, a rrọ Wallkill ru iruo. A ta nọ: “Ma ruẹ no inọ Jihova ọ be rẹrote ẹgwọlọ mai kpobi. Dede nọ ma riẹ oke, oria gbe epanọ ọ te rọ rẹrote omai evaọ obaro ho, ma wo imuẹro nọ ọ te gbẹ rẹrote mai.”—Ol. 34:10; 37:25.

‘ẸTHẸ EGHALE’

Inievo buobu nọ i fiobọhọ evaọ iruo ebabọ obọ New York na, a wo eware sa-sa nọ e hae te whaha ae iruo na. Rekọ a dawo Jihova, wọhọ epanọ o zizie idibo riẹ kpobi nọ a ru, inọ: “Dawo omẹ, sọ me gbe ti rovie ethẹ-ufuro obọ odhiwu kẹ owhai je vi oghale se owhai hi.”—Mal. 3:10.

Kọ whẹ omara, whọ te dawo Jihova re whọ sai wo eghale riẹ? Lẹ re who je roro kpahe oware nọ whọ rẹ sai ru evaọ iruo ebabọ nana nọ e vọ otọ na, te erọ obọ New York hayo enọ a be bọ evaọ eria efa re whọ ruẹ epanọ Jihova ọ te rọ ghale owhẹ.—Mak 10:29, 30.

Dale, nọ o re ru iruo ebabọ avọ aye riẹ Cathy, nọ a no obọ Alabama ziọ iruo na, a ta ẹme owoma iruo na gaga inọ o rrọ oware nọ ohwo kpobi nọ uvẹ utiona u rovie fihọ kẹ ọ rẹ roma kẹ. Ọ ta kpahe iruo ebabọ obọ Wallkill na nọ: “Whọ tẹ sae gbaudu no oria ra nọ u kiehọ owhẹ oma na kpohọ iruo itiena, whọ te ruẹ nọ ẹzi Jihova ọ ginẹ rrọ iruo.” Re whọ sai w’obọ evaọ iruo nana, eme o gwọlọ? Dale ọ ta nọ: “Ru uzuazọ ra lọhọ, ru uzuazọ ra lọhọ, jẹ gbẹ daoma ru uzuazọ ra lọhọ. Whọ te vioja riẹ vievie he.” Gary, nọ o no obọ North Carolina ze o ru iruo ẹruorote ebabọ te ikpe 30 no. Tei te aye riẹ Maureen a ta nọ, inievo nọ e rrọ iruo egagọ Jihova ikpe buobu no evaọ Ebẹtẹle nọ a rrọ kugbe je bi ru iruo kugbe na yọ oware jọ nọ o be kẹ ae evawere evaọ Warwick nọ a be jọ ru iruo na. Gary ọ ta re nọ: “Re whọ sai ru iruo evaọ Ebẹtẹle o gwọlọ nọ who re ru ẹro ra lọhọ, yọ uzuazọ uyero utioye o mai woma kpaobọ evaọ akpọ inẹnẹ.” Jason nọ ọ jọ ekọmpene nọ o re ru iruo ikpẹ avọ aye riẹ Jennifer nọ a no obọ Illinois ze a ta nọ iruo Ebẹtẹle evaọ Wallkill “o wọhọ ẹsenọ whọ rrọ iruo evaọ akpọ ọkpokpọ.” Jennifer o fibae nọ: “Eva e rẹ were ohwo gaga nọ ọ tẹ riẹ nọ iruo nọ o bi ru e be were Jihova, yọ onana u ti ru ei wo eghale nọ Jihova ọ be ruẹrẹ kpahe kẹ omai evaọ obaro. Jihova o ti ru owhẹ wo eghale buobu.”