ENỌ NỌ EBAIBOL Ọ KẸ IYO RAI
Kọ ma ti wo egọmeti ọvo nọ o ti su akpọ na soso ẹdẹjọ?
Kọ ẹvẹ egọmeti ọvo ọ te sai ro ku ahwo erẹwho akpọ na kpobi kugbe? aizaya 32:1, 17; 54:13
Dae rehọ iẹe nọ egọmeti ọvo o bi su akpọ na soso je bi ru emamọ eware kẹ ahwo-akpọ kpobi. Nẹnẹ, ahwo buobu a be ruẹ uye fikinọ a yogbe, yọ enọ i fe a be riakpọ kuoma. Rekọ otẹrọnọ emamọ egọmeti nọ ọ riẹ eware nọ ahwo a gwọlọ o re su, eware i re woma kẹ ahwo-akpọ kpobi. Kọ who roro nọ ahwo-akpọ a te sai wo egọmeti otiọye ẹdẹjọ?—Se Jerimaya 10:23.
Anwọ ikpe buobu ze na, egọmeti ọ be sai ru eware nọ ahwo a ginẹ gwọlọ kẹ ae he, maero kọ iyogbere na. Egọmeti jọ dede a geva wo umuo ho. (Ọtausiuwoma Na 4:1; 8:9) Rekọ Ọghẹnẹ Erumeru na ọ ya eyaa emamọ egọmeti nọ o ti ro nwene egọmeti ahwo-akpọ kpobi. Ovie nọ o ti su egọmeti yena ọ te rẹrote ahwo ziezi.—Se Aizaya 11:4; Daniẹl 2:44.
Eme Uvie Ọghẹnẹ u ti ru?
Jihova Ọghẹnẹ ọ salọ Ọmọ riẹ Jesu re ọ jọ Ovie nọ o ti su akpọ na soso. (Luk 1:31-33) Okenọ Jesu ọ jọ otọakpọ, o je fiobọhọ kẹ ahwo gaga. Nọ ọ rrọ Ovie na, o ti ru re ahwo erẹwho akpọ na kpobi a wo okugbe, yọ o ti si ahwo-akpọ no uye-oruẹ kpobi.—Se Olezi 72:8, 12-14.
Kọ ahwo kpobi a te rọwo nọ Jesu ọ jọ Osu rai? Ijo. Rekọ Jihova o gbe bi wo odiri kẹ ae. (2 Pita 3:9) Ọ be kẹ ahwo kpobi uvẹ nọ a rẹ rọ jẹ Jesu rehọ wọhọ Osu rai. Kẹle na, Jesu ọ te raha ahwo oyoma kpobi no otọakpọ na no, o ve ti ru nọ ahwo a te rọ rria dhedhẹ avọ omofọwẹ evaọ akpọ na soso.—Se Maeka 4:3, 4.