ENỌ NỌ EBAIBOL Ọ KẸ IYO RAI

Fikieme o jẹ rrọ bẹbẹ re ma wo udhedhẹ evaọ akpọ na?

Ebaibol na ọ fodẹ eware ivẹ nọ e be suẹe ze. Orọ ọsosuọ, dede nọ ahwo-akpọ a daoma ru eware iwoma buobu no, Ọghẹnẹ ọ ma ohwo-akpọ re o su omobọriẹ hẹ. Orọ avivẹ, ohwo-akpọ ọ be sai ru oware nọ o wo họ iroro ho keme “akpọ na ọsoso ọ rọ obọ ogaga oyoma na,” koyehọ Setan Ẹdhọ na. Fikiere, omodawọ ohwo-akpọ o re sae wha udhedhẹ ze he.—Se Jerimaya 10:23; 1 Jọn 5:19.

Oware ofa nọ o jẹ rrọ bẹbẹ re udhedhẹ o jọ akpọ na họ, fikinọ ahwo a bi le ọvuọ isiuru riẹ. Egọmeti nọ ọ rẹ sai wuhrẹ ahwo re a you oware nọ uwoma jẹ daezọ ohwohwo ọvo ọ rẹ sae wha udhedhẹ ze akpọ na.—Se Aizaya 32:17; 48:18, 22.

Ono ọ te rehọ udhedhẹ ze akpọ na?

Ọghẹnẹ ọ ya eyaa nọ ọ te rehọ egọmeti jọ mu nọ u ti su ahwo-akpọ. Egọmeti yena u ti nwene egọmeti ahwo-akpọ. (Daniẹl 2:44) Jesu nọ ọ rrọ Ovie Udhedhẹ na ọye ọ te jọ osu na. O ti si emuemu kpobi no akpọ na, je wuhrẹ ahwo re a sae rria dhedhẹ.—Se Aizaya 9:6, 7; 11:4, 9.

Makọ enẹna, Jesu ọ be kpọ ima ahwo buobu evaọ akpọ na re a rọ Ebaibol na wuhrẹ ahwo epanọ a sae rọ rria dhedhẹ kugbe ohwohwo. Kẹle na, udhedhẹ o te vọ akpọ na kpobi.—Se Aizaya 2:3, 4; Olezi 72:7.