Ekareghẹhọ Uwhu Jesu​—Oke Gbe Oria Vẹ A Ti Jo Ru Ei?

Evaọ aso nọ a ro kpe Jesu, ọ vuẹ ilele riẹ nọ a hai ru ekareghẹhọ uwhu nọ o bi ti whu na. Ọ ta kẹ ae nọ: “Wha hai ru onana rọ kareghẹhọ omẹ.”​—Luk 22:19.

Evaọ ukpe nana, Ekareghẹhọ uwhu Jesu u kie fihọ Edisoi-Oka, Ane 3, nọ ọre o te kiediwi no. Isẹri Jihova a bi zizie owhẹ avọ uviuwou ra inọ wha nyaze, re wha jẹ gaviezọ kẹ ẹme nọ a te jọ ta kpahe epanọ uwhu Jesu u wuzou te gbe irere nọ e rẹ sai noi ze te owhẹ.