Kọ Uruemu Oruọzewọ U Kiekpo No?
Ọzae jọ nọ a re se Hitoshi evaọ obọ Japan, o je ruiruo evaọ ọfisi nọ a rẹ jọ rẹrote igho evaọ ekọmpene jọ. Evaọ okejọ nọ ọyomariẹ avọ ọga iruo riẹ a jẹ kiẹ araha ekọmpene na riwi, ọga na ọ tẹ vuẹe nọ o kere bu vi igho nọ a raha. Rekọ Hitoshi ọ tẹ vuẹ ọga na nọ udu riẹ o te sae kẹe uvẹ ru oware utioye he. Fikiere, ọga na ọ tẹ vuẹe nọ o ti si ei no iruo, o te gine si ei no iruo na.
Nọ emerae jọ e ruọ emu no, eva e gbẹ jẹ were Hitoshi hi, keme o no iruo no. Wọhọ oriruo, evaọ okenọ a jẹ kiẹe riwi rọkẹ iruo efa jọ nọ o fi obe họ kẹ, ọ ta kẹ ohwo na nọ ọyomariẹ ọ rẹ wha ahwo re he. Ohwo nọ ọ jẹ kiẹe riwi na ọ tẹ ta nọ, “Who wo ohẹriẹ no amọfa!” Ahwo uviuwou Hitoshi gbe egbẹnyusu riẹ a jẹ tuduhọ iẹe awọ re ọ gbẹ ruabọhọ uruemu oruọzewọ riẹ na, ghele na, o gbe je wo avro evaọ udu riẹ. Wọhọ oriruo, ọ ta nọ, “Kọ uruemu oruọzewọ mẹ na, u ti gbe kiekpe omẹ ere na”?
Oware nọ o via kẹ Hitoshi na u dhesẹ nọ orọnikọ ohwo kpobi uruemu oruọzewọ o rẹ were he. Evaọ uzẹme, ahwo jọ a tube rri uruemu oruọzewọ wọhọ oware nọ u re kiekpe ohwo evaọ eki-ọthuọ. Aye jọ nọ o bi ruiruo evaọ obọ South Africa ọ ta nọ, “Ahwo nọ a re gu ọrue ọvo a wariẹ omẹ họ, yọ ẹsejọ mẹ rẹ gwọlọ rọ aro kele ai.”
Oghẹrẹ uruemu ababọ-oruọzewọ jọ nọ o da oria kpobi fia nẹnẹ họ ọrue-ọta. Evaọ ikpe jọ nọ i kpemu, ọzae jọ nọ a re se Robert S. Feldman nọ o wuhrẹ kpahe iroro gbe uruemu ohwo-akpọ nọ o bi ruiruo evaọ Yunivasiti ọ Massachusetts o ru ọkiẹriwo jọ. Ọkiẹriwo na o dhesẹ nọ ahwo 60 evaọ usu ahwo udhusoi (100) a bi gu ọrue, o tẹ kao ẹsiẹvo evaọ ẹme iminiti ikpe nọ a lele ohwo ta. Ọzae na ọ ta nọ, “Ọkiẹriwo nana o gbe omẹ unu gaga. Me roro nọ ahwo a rẹ sai gu ọrue te enẹ hẹ.” U gbunu gaga inọ o rẹ kẹ ahwo buobu uye nọ a te gu ọrue kẹ ae, rekọ ae omarai a re gu ọrue re.
Fikieme ọrue-ọta, uji-utho, gbe iruemu efa nọ e kare oruọzewọ e rọ da akpọ na fia nẹnẹ? Ẹvẹ uruemu ababọ-oruọzewọ u re ro kpomahọ ahwo? Maero na, eme ma re ru re ekpehre uruemu nana o siọ omai ba ewholo?