Kọ Ehrẹ Ebaibol na I gbe Wo Iruo kẹ Omai Nẹnẹ?

AHWO JỌ A TA NỌ IJO. Edọkita jọ ọ ta nọ ohwo nọ o bi fi ehrẹ Ebaibol họ iruo, ọ wọhọ ohwo nọ ọ be rehọ obe nọ a je ro wuhrẹ emọ isukulu evaọ oke anwae ro wuhrẹ emọ isukulu nẹnẹ. Ahwo nọ a rẹ vro eme Ebaibol na a sae tubẹ ta nọ o rrọ oware areghẹ hẹ re ohwo o fi ehrẹ obe nọ u kiekpo no họ iruo evaọ akpọ ọgbọna. Koyehọ rọkẹ ahwo buobu, Ebaibol na o kiekpo no.

Evaọ akpọ nana nọ o rovie aro gaga no na, fikieme ohwo o je fi ehrẹ obe nọ a kere kri akpọ no họ iruo? Evaọ eria itanẹte buobu, whọ rẹ ruẹ ehrẹ gbe evuẹ nọ a kere kẹle kpahe eware sa-sa. Ahwo nọ a riẹ ebe ziezi a rẹ jọ etẹlẹvishọno dhesẹ jẹ ta kpahe evuẹ nọ i no obọ ahwo nọ a wuhrẹ kpahe iroro gbe iruemu ahwo-akpọ, egba-eriariẹ, gbe enọ i re kere ebe ze. Ahwo nọ a rẹ zẹ ebe ehrẹ sa-sa a be zẹ ebe buobu gbidigbidi, yọ onana u zihe ruọ ekiọthuọ ologbo no.

Nọ orọnọ evuẹ nana e da oria kpobi fia na, fikieme ohwo o je fi ehrẹ Ebaibol na họ iruo, kpakiyọ okenọ a ro kere iei re o vrẹ enwene oware wọhọ ikpe idu-ivẹ (2,000) no? Wọhọ epanọ ahwo nọ a rẹ vro eme Ebaibol a ta, kọ ginọ uzẹme inọ ohwo nọ o bi fi ohrẹ Ebaibol họ iruo ọ wọhọ ohwo nọ ọ be rọ obe nọ a je ro wuhrẹ emọ isukulu evaọ oke anwae ro wuhrẹ nẹnẹ? Uzẹme na họ, eriwo ọthọthọ a wo na. Kẹdẹ kẹdẹ eware ekpokpọ i bi kieze, yọ ahwo-akpọ a bi wo ẹnyaharo evaọ ofẹ otokiẹ-eriariẹ, rekọ ẹgwọlọ ohwo-akpọ o rri nwene he. Ahwo a gbẹ gwọlọ yeri uvi uzuazọ nọ o vọ avọ evawere gbe ufuoma, a gwọlọ wo evawere evaọ uviuwou, gbe emamọ egbẹnyusu.

Makọ epanọ Ebaibol na o krite no na, o ta kpahe epanọ ohwo ọ sai ro wo eware yena kpobi. Yọ Ebaibol na ọ ta nọ Ọghẹnẹ o wo eme nọ e riẹe eva. O rẹ kpọ omai evaọ kabọ kabọ uzuazọ, je fiobọhọ kẹ omai riẹ oware nọ ma re ru nọ ma tẹ rẹriẹ ovao dhe ebẹbẹ. (2 Timoti 3:​16, 17) U te no ere no, ẹme nọ Ebaibol ọ ta u dhesẹ nọ ehrẹ riẹ i re kiekpo ho, yọ no ige te ige i gbe wo iruo. Ebaibol na ọ ta nọ: “Ẹme Ọghẹnẹ ọ rrọ uzuazọ.”​—Ahwo Hibru 4:12.

Kọ eme nọ Ebaibol na ọ ta na ginẹ uzẹme? Kọ ehrẹ riẹ i kiekpo no, manikọ i gbe wo iruo kẹ omai evaọ uzuazọ nẹnẹ? Kọ ginọ uzẹme nọ Ebaibol na ọ rrọ uzuazọ? Uwou-Eroro nana yọ orọ ọsosuọ evaọ usu uvitha obọdẹ nọ a ti siobọno. O te kẹ iyo enọ yena nọ ma nọ evaọ obehru na.