3 Ehrẹ nọ I re Fiobọhọ kẹ Omai Thihakọ Ebẹbẹ

Evaọ akpọ nana, u wo ebẹbẹ jọ nọ a rẹ sae whaha hayo kuhọ họ. Wọhọ oriruo, nọ ohwo o te whu ku owhẹ hayo nọ whọ tẹ be mọ ẹyao nọ a sae siwi kpo ho, whọ sae whaha ebẹbẹ nana ha. Rekọ whọ sae thihakọ. Kọ Ebaibol na ọ sai fiobọhọ kẹ omai thihakọ ebẹbẹ itienana?

ẸYAO NỌ A RẸ SAI SIWI HI

Ọmọtẹ jọ nọ a re se Rose ọ ta nọ: “Mẹ be mọ ẹyao jọ nọ o rẹ wha edada se omẹ ẹsikpobi. Mẹ gbẹ be sai ru eware nọ me je ru vẹre he.” Oware jọ nọ o jẹ mae kẹe uye họ, ẹsibuobu nọ o te bi se Ebaibol na gbe ebe egagọ riẹ, iroro riẹ e rẹ jọ oware nọ o bi se he. Rekọ eme Jesu nọ e rrọ obe Matiu 19:26 i fiobọhọ kẹe gaga. Etẹe ọ ta nọ: “Ọghẹnẹ ọ rẹ sai ru eware kpobi.” Oria Ebaibol nana u fiobọhọ kẹ Rose ruẹ nọ idhere nọ a re ro se je wuhrẹ Ebaibol na i re buobu. Ẹsibuobu, edada na e jẹ hai ru nọ ọ gbe sai ro se oware ovo ho, fikiere ọ tẹ jẹ hae gaviezọ kẹ isase Ebaibol gbe ebe egagọ riẹ nọ a rekọdo.a Ọ ta nọ: “O gbẹ rrọ edhere nana nọ me je ro wuhrẹ Ebaibol ho, o hae te jọ bẹbẹ kẹ omẹ re me gbe wo usu okpekpe kugbe Jihova.”

Oke kpobi nọ o tẹ be kẹ Rose uye fikinọ ọ gbẹ be sai ru eware nọ o je ru vẹre he, eme nọ e rrọ obe 2 Ahwo Kọrint 8:12 e tuduhọ iẹe awọ. Etẹe ọ ta nọ: “Okẹ nọ u no eva ze Ọghẹnẹ ọ rẹ jẹrehọ wọhọ epaọ onọ ohwo o wo, orọnikọ onọ ohwo o wo ho ho.” Eme yena i fiobọhọ kẹ Rose riẹ nọ, umutho nọ ọ be sai ru na o were Ọghẹnẹ gaga.

UWERI

Delphine nọ ma fodẹ evaọ izoẹme nọ e vrẹ na ọ ta nọ: “Nọ ọmọtẹ mẹ nọ ọ jọ ikpe 18 o whu, uweri nọ o jọ omẹ oma o ga te epanọ me je ro roro nọ mẹ te sae zọ họ. Eware kpobi i te nwene kẹ omẹ.” Rekọ eme nọ e rrọ obe Olezi 94:19 e kẹ riẹ omosasọ. Ohwo nọ o kere olezi na ọ jọ etẹe lẹ se Ọghẹnẹ nọ: “Okenọ iroro ibuobu e vọ omẹ eva, evaewerọ ra e tẹ sasa ẹzi mẹ.” Delphine ọ ta nọ: “Mẹ jọ olẹ yare Jihova re o fiobọhọ kẹ omẹ ru eware nọ e rẹ kẹ omẹ omosasọ jẹ lẹliẹ uweri mẹ kpotọ.”

Ọ tẹ fialoma via re ọ rehọ oke riẹ ru iruo ro fiobọhọ kẹ amọfa. Uwhremu na ọ tẹ rehọ omariẹ wawo echọko, keme echọko ọ tẹ maki wiri ibribro no, a rẹ gbẹ sae rehọ ae kere ghele. Epọvo na re, dede nọ eware nọ e via kẹe e jọ wọhọ ẹsenọ akpọ riẹ o re no, ọ ruẹ nọ ọ sai gbe fiobọhọ kẹ amọfa ghele. Delphine ọ ta nọ: “Me muẹrohọ nọ, mẹ tẹ be rọ ehrẹ Ebaibol sasa ahwo nọ me bi wuhrẹ Ebaibol na oma, me re wo omosasọ. O wọhọ ẹsenọ Jihova ọ be rọ edhere nana sasa omẹ oma.” O te kere edẹ idibo Ọghẹnẹ evaọ Ebaibol na họ otọ, enọ e jọ uweri ogaga. Ọ ta nọ: “Aikpobi na a jọ ahwo nọ a ruabọhọ olẹ.” Yọ o muẹrohọ nọ “Ebaibol na nọ ohwo o re se, u re fiobọhọ kẹe thihakọ.”

Ebaibol na o fiobọhọ kẹ Delphine wuhrẹ oware ofa jọ re. Ọ ruẹ nọ u wuzou re ohwo ọ tẹrovi obaro, viukpọ eware nọ e via vrẹ no. Ẹruore ẹkparomatha nọ o rrọ obe Iruẹru Ikọ 24:15 na, o kẹ riẹ omosasọ gaga. Etẹe ọ ta nọ: “Ẹkparomatha enọ i kiẹrẹe gbe enọ i kiẹrẹe he o te jọ.” U mu rie ẹro gaga inọ Jihova ọ te kpare ọmọtẹ riẹ ze evaọ obaro. Delphine ọ ta nọ: “Obọnana dede mẹ be ruẹ ọmọtẹ mẹ. Jihova ọ te kpare iẹe ze evaọ oke nọ o fihọ. Mẹ be jọ iroro mẹ ruẹ e riẹ nọ ma be zaro kugbe avọ evawere wọhọ epanọ eva e were omẹ ẹdẹ nọ me ro yẹe ziọ akpọ.”

a Whọ rẹ ruẹ Ebaibol gbe ebe nọ a rekọdo evaọ oria evuẹ itanẹte jw.org.

Ebaibol na o re fiobọhọ kẹ omai wo omosasọ evaọ oke ebẹbẹ

OGHẸRẸ VẸ ỌGHẸNẸ O RE RO FIOBỌHỌ KẸ OMAI?

Ebaibol na ọ kẹ uyo nana vevẹ. Ọ ta nọ: “ỌNOWO na ọ kẹle enọ i bo se ei kpobi evaọ uzẹme. O re ru gba kẹ enọ e rọ ozọ riẹ ẹdhẹ kpobi, o ve je yo oviẹ rai, o ve je siwi ai.” (Olezi 145:18, 19) Kọ oria ikere nana o gbẹ tuduhọ owhẹ awọ? Rekọ, oghẹrẹ vẹ Ọghẹnẹ ọ rẹ rọ kiyo elẹ ahwo nọ a bi bo sei kẹ obufihọ gbe ọkpọvio?

Ọ RẸ KẸ OMAI ẸGBA:

Ebẹbẹ e rẹ sae lẹliẹ udu no omai awọ, kpomahọ iroro mai gbe egagọ mai, jẹ lẹliẹ omai mọ. (Itẹ 24:10) Rekọ Jihova “ọ rẹ rehọ eri kẹ enọ oma o rẹ rọ, ọ vẹ jẹ rehọ ogaga kẹ eyẹlẹ.” (Aizaya 40:29) Pọl ukọ na nọ o thihakọ ebẹbẹ ilogbo ọ ta nọ: “Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.” (Ahwo Filipai 4:13) Ọghẹnẹ ọ rọ ẹzi riẹ kẹ Pọl ẹgba. Whọ sae yare Ọghẹnẹ re ọ kẹ owhẹ ẹzi riẹ re.—⁠Luk 11:⁠13.

Ọ RẸ KẸ OMAI AREGHẸ:

Eme ohwo re ru nọ ọ tẹ gwọlọ wo otoriẹ ehrẹ Ebaibol na je fi ai họ iruo? Jemis olele na o kere nọ: “Otẹrọnọ ohwo jọ evaọ usu rai o wo areghẹ te he, jọ ọ hae yare Ọghẹnẹ, keme o re siobọno kẹ ahwo kpobi, yọ ọ rẹ wọviẹ ohwo ho, ọ te kẹe.” (Jemis 1:⁠5) Nọ who te bi se Ebaibol na je fi eware nọ who bi wuhrẹ họ iruo, yọ who bi ru lele elẹ ra. (Jemis 1:23-25) Nọ who bi ru ere na, whọ te ruẹ nọ ehrẹ Ebaibol na e vọ avọ areghẹ.

Ọ RẸ KẸ OMAI UDHEDHẸ:

Whọ tẹ be make ruawa gaga, Jihova ọ rẹ sai fiobọhọ kẹ owhẹ wo udhedhẹ iroro. Ebaibol na ọ ta nọ: “Wha ruawa kpahe oware ovo ho, rekọ evaọ oware kpobi wha rọ olẹ avọ olẹ-ayare kugbe uyere-okẹ ta ayare rai via kẹ Ọghẹnẹ; udhedhẹ Ọghẹnẹ nọ u vi otoriẹ kpobi o vẹ te kpọ udu rai gbe ẹgba iroro rai ẹkwoma Kristi Jesu.” (Ahwo Filipai 4:6, 7) Kọ u gbe fo re whọ yare Ọghẹnẹ evaọ olẹ inọ ọ kẹ owhẹ udhedhẹ iroro?

Kọ otẹrọnọ ebẹbẹ ra i gbe bi kuhọ họ yọ whọ lẹ se Ọghẹnẹ no? Who du roro nọ Ọghẹnẹ ọ kpairoro vrẹ owhẹ no ho. O tẹ make rọnọ ebẹbẹ ra e gbẹ rrọ otọ, Ọghẹnẹ ọ te kẹ owhẹ udu gbe ẹgba nọ whọ sai ro thihakọ. (1 Ahwo Kọrint 10:13) Ebaibol na ọ tẹ jẹ ta nọ, oke o be tha nọ ebẹbẹ mai i ti no otọ bẹdẹ bẹdẹ!