Ta Ẹme avọ Aruọwha
1 Evaọ umutho ikpe nọ e vrẹ no iwhowho-uvie evaọ eria jọ o mae rọ bẹbẹ re a t’ẹme kugbe ahwo evaọ iwou rai. Ahwo buobu a be niyẹrẹ nọ evaọ ubrotọ rai bu viọ ahwo 50 eva udhusoi a rẹ jọ uwou ho nọ a te bi nuwou ruọ uwou. Fikiere, oke buobu nọ a be raha na uvrẹvru.
2 Ikpe buobu nọ i kpemu, a jẹ hẹ jọ uwou ruẹ ahwo buobu evaọ Ẹdoka, ẹdẹ nọ a je ri eva oria kpobi wọhọ ẹdẹ eriosehọ. Eware i nwene no. O rọ oware odode nẹnẹ re ahwo a ruiruo oyibo, rẹro te ẹgwọlọ uviuwou rai wọhọ emuore dẹ, hayo arozaha, nọ o rẹ jẹ rehọ ai no uwou. Fikiere makọ evaọ Ẹdoka, re a ruẹ ahwo nọ ma te bi nuwou ruọ uwou u zihe ruọ oware obẹbẹ no.
3 Nọ ahwo a gbẹ rọ uwou ho, ababọ avro u dhesẹ nọ a rọ oria ọfa jọ. Nọ ute mai o rọ nọ ma rẹ t’ẹme kugbe ahwo na, fikieme whọ gbẹ t’ẹme kugbe enọ whọ nyaku hu—evaọ iyẹrẹ, evaọ eria eki, hayo evaọ eria iruo. O jọ uruemu Pọl re ọ t’ẹme kugbe “enọ avọ iẹ a zere oma,” re o se isẹi kẹ ai. (Iruẹru 17:17) Onana u dhesẹ oghẹrẹ isẹrise nọ o rẹ wha erere ze evaọ oke oyena, o tẹ jẹ rọ oghẹrẹ isẹrise nọ o rẹ wha erere ze evaọ edẹ mai na.
4 Nọ ma te bi nuwou ruọ uwou, ẹsikpobi ma rẹ ruẹ ahwo nọ i bi mu nya hayo nọ e be hẹrẹ ohwo jọ. Ẹdẹ nọ ehru ọ ghariẹ, o rẹ sae jọ nọ a be fọrọ ehọ rai hayo jọ oma omoto rai ruiruo. O sae jọ nọ ehwẹ hayo uyere ọwhẹwhẹtiẹ ọvo họ oware nọ ma re ru ro muọ ẹmeọta họ. Otẹrọnọ a be rria kẹle etẹ, ma rẹ sae tubẹ fodẹ nọ ma nyaku ai evaọ obọ uwou hu yọ enẹna eva e were omai nọ ma wo uvẹ nọ ma rẹ rọ t’ẹme kugbe ai. Ẹkwoma owọ nọ ma rẹ jẹ ro dhesẹ aruọwha jọ, ahwo buobu a reawere eware nọ a rọ ẹro ruẹ no.
5 Aruọwha Ọ rẹ Kẹ Erere: Oniọvo jọ ọ niyẹrẹ nọ ọ rẹ nya bru ahwo nọ i dikihẹ, be hẹrẹ omoto, nọ i bi mu nya, hayo nọ e keria evaọ omoto rai. Avọ ehwẹ gbe emamọ urru, ọ vẹ nya bru rai wọhọ ọrivẹ nọ o mu weze gheghe. Evaọ edhere ọnana orọnikọ o fi ebe buobu họ ada no ọvo ho rekọ o mu iwuhrẹ Ebaibol buobu họ no re.
6 Oniọvo ọfa avọ aye riẹ a jẹ ta usiuwoma no uwou ruọ uwou a tẹ nya ku aye jọ nọ ọ be nya vrẹ avọ owha-eki ogbẹgbẹdẹ. A te muọ ẹme họ, bi jiri iei kẹ ẹgba nọ ọ be rọ sẹro ẹgwọlọ uviuwou riẹ. A tẹ nọ inọ: “Rekọ ono ọ rẹ sae rọ ẹgwọlọ ahwo-akpọ kẹ ai?” Oyena u te ru isiuru aye na va via. Umutho ẹme na o te su kpohọ uzizie kpohọ uwou riẹ, oria nọ a je muọ uwuhrẹ Ebaibol họ.
7 Fikiere okiofa nọ who bi sisẹi nuwou ruọ uwou, o make rọ Ẹdoka hayo ẹdẹ ọfa jọ evaọ udevie oka na, yọ whọ ruẹ nọ ahwo a rọ uwou ho, fikieme whọ gbẹ daoma re whọ t’ẹme kugbe ahwo nọ whọ nyaku—evaọ iyẹrẹ hayo eva eria ọfa ha? (1 Tẹs. 2:2) Whọ rẹ sai wo odibọgba avọ erere, yọ whọ te ruẹ oghọghọ viere evaọ iruo ra.