Ẹkpẹti onọ

◼ Ovẹ họ omamọ edhere nọ a rẹ rọ rehọ eme ọ “brọda” gbe “sista” ro ruiruo?

Okenọ a tẹ ta ae gheghe, eme na “brọda” gbe “sista” i dhesẹ ahwo nọ i wo ọsẹ gbe oni ọvo na. Usu nana nọ u notọ ze na o rẹ wha okugbe ọruọruọ ze, yọ uyerakpọ, okegbe, gbe ọgba-kugbe imoni u re fi ẹgba họ ẹkpekpe nọ ahwo nana a re wo.

Jesu o wuhrẹ ilele riẹ re a se Jihova evaọ olẹ wọhọ “Ọsẹ mai.” Efihiruo ẹme ọyena u dhesẹ nọ wọhọ Ileleikristi, mai kpobi ma rọ abọ uviuwou ọkpekpe oria nọ ma be jọ reawere usu ẹzi logbo. Jesu ọ zoma fiẹgba họ onana okenọ ọ vuẹ ilele riẹ inọ “whai kpobi inievo.”—Mt. 6:9; 23:8.

Fiki ọgba-kugbe ọkpekpe ẹzi mai evaọ udevie uwou Ọghẹnẹ, ma re se ohwohwo wọhọ “Brọda” gbe “Sista,” maero evaọ obọ iwuhrẹ ukoko na. Evaọ etoke ẹzi enana, ọnọ ọ be sẹro uwuhrẹ na o re vuhu ahwo nọ e họ-ame no mu ẹkwoma e se “brọda” hayo “sista” o ve se odẹ urere ohwo ọyena lele iei.

Kọ ẹvẹ otẹrọnọ ohwo nọ ọ re họ-ame he ọ gwọlọ w’obọ evaọ iwuhrẹ na? Okenọ ohwo ọ tẹ nyusu kugbe ahwo Jihova krẹkri no yọ ọ be kẹle omarọkẹ, bi roro omobọ riẹ wọhọ omọvo Isẹri Jihova, ẹwhaha ọvo ọ rẹ jariẹ hẹ re a kaki se “Brọda” hayo “Sista” lele odẹ urere riẹ. Onana o rẹ mae jọ ere otẹrọnọ ohwo ọyena o zihe ruọ owhowho-uvie nọ ọ re họ-ame he no.

Evaọ abọ dekọ riẹ, ahwo nọ i wo isiuru nọ i muọ iwuhrẹ mai họ ẹnyaze obọ a re j’owọ nọ a re ro vuhu ai wọhọ enọ e rọ abọ uwou Ọghẹnẹ hẹ. A re se ahwo nana wọhọ “Brọda” hayo “Sista” ha, keme usu ẹzi uviuwou Ọghẹnẹ o rọ oma rai hi. Fikiere evaọ etoke iwuhrẹ, a rẹ rehọ edhere nọ u fo wọhọ “Mr.” (e se Oyibo) kugbe se odẹ urere rai.

Ma tẹ be rehọ eme ọ “brọda” hayo “sista” ruiruo evaọ iwuhrẹ ukoko mai u dhesẹ okugbe nọ ọ mae kpekpe jẹ ghare vi onọ a rẹ rehọ odẹ oma ohwo se. Onana o kareghẹhọ omai usu oghale nọ ma be reawere riẹ wọhọ uviuwou ẹzi evaọ otọ Ọsẹ ọvo na, Jihova Ọghẹnẹ. O tẹ jẹ kareghẹhọ omai kpahe uyoyou udidi gbe ororokẹ nọ ma wo rọkẹ ohwohwo.—Ẹf. 2:19; 1 Pit 3:8.