Ẹkpẹti Onọ
◼ Ono ọ rẹ lẹ olẹ evaọ iwuhrẹ ukoko?
Elẹ ukoko yọ abọ ologbo ọrọ egagọ mai. Re a dikihẹ kẹ amọfa evaọ aro Jihova yọ uvẹ oghaghae gbe owha-iruo ogbẹgbẹdẹ. Fiki epanọ u w’uzou te, o gwọlọ re ekpako ukoko a rehọ uvi oziẹ ro ruiruo evaọ okenọ a tẹ be salọ inievo-emezae nọ i te re a lẹ evaọ iwuhrẹ. Inievo-emezae nọ e họ-ame no nọ i bi dikihẹ kẹ ukoko na a rẹ jọ egbodibo Ileleikristi nọ a riẹ wọhọ emamọ iriruo je wo adhẹẹ evaọ aro ahwo ukoko na. U fo re elẹ adhẹẹ rai i dhesẹ emamọ usu kugbe Jihova Ọghẹnẹ via. Uzoẹme na “Ẹlẹ Evaọ Aro Amọfa avọ Udu Omarokpotọ” evaọ ukere Uwou-Eroro ọ May 15, 1986 (ọrọ Oyibo), o fodẹ ehri-izi nọ i w’uzou nọ e rẹ mae jọ obufihọ kẹ ahwo nọ a be lẹ evaọ ogbotu rọkẹ ukoko na.
Ekpako ukoko a rẹ ta kẹ oniọvo nọ a riẹ fiki ekpehre uruemu hayo uruemu uwhrewhrehe re ọ lẹ hẹ. Oniọvo nọ o wo ababọ edẹro hayo ọnọ ọ rẹ gwọlọ rehọ olẹ ogbotu ruiruo wọhọ edhere nọ ọ rẹ rọ ta iroro omobọ riẹ via a rẹ salọ iẹ hẹ. (1 Tim. 2:8) Dede nọ oniọvo-ọmọzae uzoge ọ họ-ame no, ekpako na a re rri rie sọ o wo ẹkpako abọ-ẹzi nọ ọ rẹ sai ro su ahwo ukoko na evaọ olẹ.—Iruẹru 16:1, 2.
Otiẹse evaọ iwuhrẹ kẹ usiuwoma ota, o rẹ sai fo re oniọvo-ọmọtẹ ọ lẹ otẹrọnọ oniọvo-ọmọzae nọ o te ọ rrọ etẹ re o su utu na evaọ olẹ hẹ. O rẹ gwọlọ nọ oniọvo-ọmọtẹ na ọ wha oware nọ u fo nọ o re ro ruru uzou. O tẹ rrọ nọ oniọvo-ọmọzae ọ te jariẹ evaọ iwuhrẹ kẹ usiuwoma ota jọ họ, u fo re ekpako ukoko na a ta kẹ oniọvo-ọmọtẹ jọ nọ o te re ọ wha ahwo na.
O rrọ uruemu re ohwo agbara ọ Ovuẹ Ogbotu na ọ lẹ olẹ emuhọ na. Dede na, evaọ iwuhrẹ efa, oria nọ inievo-emezae nọ i te ziezi e rrọ buobu, a rẹ sai se omọfa jọ u te no oniọvo nọ o bi muọ ewuhrẹ na họ hayo ọnọ a rehọ abọ urere na kẹ na re ọ lẹ olẹ emuhọ hayo olẹ ekuhọ na. Epanọ o rrọ kpobi, o gwọlọ nọ a rẹ kake vuẹ oniọvo-ọmọzae nọ a ti se re ọ lẹ evaọ ewuhrẹ ukoko na re ọ sai roro kpahe eme nọ ọ te ta. Kẹsena ọ vẹ sae lẹ olẹ ọrọwokugbe, onọ u n’udu ze nọ u fo kẹ uzedhe ewuhrẹ ọyena.
U fo re elẹ itieye na e jọ thethei hi. Evaọ okenọ oniọvo jọ ọ tẹ be lẹ olẹ ogbotu, a rẹ mai w’otoriẹ olẹ na evaọ okenọ o te dikihẹ, t’eme riẹ do via ziezi, jẹ t’ẹme na vevẹ. Onana o rẹ lẹliẹ ahwo kpobi nọ a kokohọ na yo olẹ na je bo “Ami!” nọ o no udu ze.—1 Irv. 16:36; 1 Kọr. 14:16.