Ewhowho Emamọ Usi na Avọ Iroro ọ Ovẹrẹ
1 Ma re dhesẹ ovuhumuo odidi mai kẹ eyaa Uvie Ọghẹnẹ ẹkwoma abọ nọ ma re wo evaọ odibọgba Ileleikristi na avọ ẹgba mai kpobi. U fo re ma w’abọ evaọ iruo nana avọ iroro ọ ovẹrẹ. Fikieme? Keme iruiruo na e rọ kakao, urere eyero-akpọ omuomu ọnana o bi si kẹle, yọ izuazọ ahwo nọ e rọ ẹkwotọ mai e rọ awa. (Izik. 3:19; Mat. 9:37, 38) Owha-iruo ogbẹgbẹdẹ oyena o gwọlọ omodawọ mai kpobi evaọ odibọgba na. Ẹvẹ ma sai ro dhesẹ iroro ọ ovẹrẹ kpahe iruo usiuwoma ota mai na? Ẹkwoma ẹkake ruẹrẹhọ emamọ idhesẹvia, ẹkwoma ajọwha evaọ ẹgwọlọ ahwo evaọ oria kpobi nọ a rẹ jọ rue rai, ẹkwoma ekere fihọ otọ gbagba ọrọ ahwo kpobi nọ a dhesẹ isiuru jẹ kaki zihe re ma nya lele isiuru eyena, gbe ẹkwoma ẹkareghẹhọ nnọ fikinọ izuazọ i w’obọ kpahiẹe, ma re se odibọgba mai gb’oja. Ezọhọfihọ obotọ na e rẹ sai fiobọhọ k’omai nọ ma be ruẹrẹ oma kpahe re ma whowho emamọ usi na avọ iroro ọ ovẹrẹ evaọ February. Obe nọ a ti fihọ ada họ Whọ Sae Ria Bẹdẹ Bẹdẹ eva Aparadase ọ Otọakpọ.
2 Whọ rẹ sae mu ẹmeọta họ ẹkwoma ẹfodẹ ebẹbẹ jọ kpẹkpẹe nọ ahwo a be rẹriẹ ova dhe evaọ okegbe na, whọ vẹ ta nọ:
◼ “Ahwo buobu a rọwo nọ Ọghẹnẹ ọ rọ, rekọ u bi gbe ai unu: ‘Didi oghẹrẹ obaro ọ gwọlọ nọ ma wo?’ Ẹvẹ whọ sae kẹ uyo oyena? [Kuvẹ kẹ uyo.] Kọ whọ riẹ nọ Ebaibol na o dhesẹ oreva Ọghẹnẹ kẹ ohwo-akpọ vevẹ gbe owọ nọ ọ be jẹ re ọ ruẹse ru ei gba?” Rovie kpohọ ẹwẹ-obe avọ 8 evaọ obe ọ Ria Bẹdẹ Bẹdẹ na. Se Aizaya 45:18 evaọ edhe-ẹme avọ 5 gbe otofa nọ a kẹ evaọ edhe-ẹme avọ 6. Rovie kpohọ ifoto nọ e rọ ẹwẹ-obe avọ 12 gbe 13 ro dhesẹ otofa onana kẹ obaro mai. Se Aizaya 11:6-9 evaọ edhe-ẹme avọ 12. Fi obe na họ ada eva unu azọhọ ₦80 jẹ ruẹre oke nọ u fo họ re who zihe re wha gbẹ t’ẹme na haro.
3 Whọ rẹ sae nya lele ẹme nọ wha kake ta kpahe Aizaya 45:18, avọ odhesẹvia ọkpẹkpẹe ọnana:
◼ “Evaọ iweze mẹ n’ukpo, ma t’ẹme kpahe eyaa Ọghẹnẹ re ọ ruẹrẹ eyero ọkpokpọ họ kẹ ahwo-akpọ. [Wariẹ kpọ iroro kpohọ ifoto nọ e rọ ewẹ-obe avọ 12 gbe 13 evaọ obe ọ Ria Bẹbẹ Bẹdẹ na.] Kọ whọ gwọlọ ruẹ uviuwou ra nọ a be reawere eyero otiọye na? [Kuvẹ kẹ uyo.] Onọ na họ, Ẹvẹ eyaa Ọghẹnẹ e rọ uzẹme te? Iviena muẹrohọ oware nọ ọye omariẹ ọ ta.” Se Aizaya 55:11 evaọ edhe-ẹme avọ 8 evaọ ẹwẹ-obe avọ 9. Nọ onọ nọ o rọ edhe-ẹme avọ 8 evaọ ẹwẹ-obe avọ 9, je se uyo na, kugbe uye-ẹme urere ọ edhe-ẹme na. Fodẹ obe uwuhrẹ Ebaibol ọvọvẹ nọ ma rẹ k’ahwo. Ru ọruẹrẹfihotọ re who dhesiẹe evaọ oke ọfa.
4 Nọ orọnọ ahwo buobu a bi roro kpahe ebẹbẹ nọ e rẹriẹ ova dhe ahwo-akpọ nọ i bi vihọ na, whọ rẹ sae t’ẹme nọ o wọhọ onana evaọ iweze ọsosuọ na:
◼ “Ohwo kpobi nọ mẹ nyaku o bi roro kpahe ebẹbẹ nọ ma rẹriẹ ova dhe evaọ okegbe mai. [Fodẹ umutho ejọ.] Anwọ ikpe buobu oye enọ i re hrowo esuo a rọ y’eyaa nọ a te wha ifue ebẹdẹ ze, yọ ejọ e tubẹ daoma no dede re a ru erei. Kọ eme who roro nọ o soriẹ nọ eyero o gbe bi ro yoma? [Kuvẹ kẹ uyo.] Ebaibol na o dhesẹ oware nọ ahwo buobu a ri roro kpahe vievie he. Obe Eviavia u dhesẹ ẹmo nọ a fi evaọ ob’odhiwu. Muẹrohọ oware nọ u no rie ze, wọhọ epanọ a ta riẹ evaọ Eviavia 12:9.” Se owọ na, who ve rovie kpohọ ewẹ-obe avọ 20 gbe 21 evaọ obe ọ Ria Bẹdẹ Bẹdẹ na. Rehọ ifoto na dhesẹ omadhehọ Setan evaọ eware akpọ. Fi obe na họ ada evaọ unu azọhọ ₦80 je ru ọruẹrẹfihotọ re who zihe jẹ t’ẹme kpahe epanọ Ọghẹnẹ o ti ro ku ebẹbẹ ohwo-akpọ họ.
5 Otẹrọnọ whọ y’eyaa nọ who ti zihe re who dhesẹ ifue Ọghẹnẹ kẹ ebẹbẹ inẹnẹ, whọ rẹ sae dawo onana:
◼ “Me ru obọdẹ omodawọ re me zihe ze re ma gbẹ t’ẹme mai na haro kpahe uvi ifue kẹ ebẹbẹ nọ e rẹriẹ ova dhe ohwo-akpọ. Evaọ iweze mẹ n’ukpo, ma ruẹ nọ Ebaibol na ọ fodẹ Setan Ẹdhọ na wọhọ ọnọ o bi su akpọ na kpobi thọ. Nọ ọ rọ omama ẹzi nọ o w’ẹgba gaga na, kọ who roro nọ edhere jọ ọ riẹ nọ a sai ro si ekpokpo riẹ no? [Kuvẹ kẹ uyo.] Iviena muẹrohọ oware nọ Ebaibol na ọ ta.” Se je dhesẹ Eviavia 20:1-3. Ẹkwoma e ro ruiruo ifoto nọ e rọ ewẹ-obe avọ 4-5 ọrọ obe Eriariẹ na, dhesẹ epanọ eyero ọ te jọ ababọ ekpokpo Setan. Dhesẹ obe uwuhrẹ Ebaibol jẹ daoma re who mu ei họ evaọ oke ovona.
6 Avọ ahwo buobu nọ a wo isiuru kpahe okegbe na, whọ rẹ sae t’ẹme wọhọ ọnana ro mu ẹmeọta họ:
◼ “Ma ruẹ no nọ enwene ohwo kpobi ọ be ruawa kpahe enua ofou, ame, gbe emuore mai. Evaọ erẹwho jọ eyero okegbe o bi muozọ enẹna. Nọ o rọnọ Ọghẹnẹ họ Ọnọ ọma akpọ na, eme who roro nọ o ti ru kpahe onana? [K’uvẹ kẹ uyo.] Ebaibol na ọ ta nọ Ọghẹnẹ ọ te yare ọvunu-oguo kpahe epanọ ma be rehọ akpọ na ruiruo riwi. [Se Eviavia 11:18b.] Dai roro kpahe ẹria akpọ nọ ọ kare enua kpobi!” Riobọhọ eyaa Ọghẹnẹ ọrọ aparadase, wọhọ onọ a dhesẹ evaọ Eviavia 21:3, 4. Dhesẹ ifoto nọ e rọ ewẹ-obe avọ 12 gbe 13 evaọ obe ọ Ria Bẹdẹ Bẹdẹ na. Fi obe na họ ada evaọ unu azọhọ ₦80 je ru ọruẹrẹfihotọ nọ who ti ro zihe.
7 Okenọ who te bi zihe bru ohwo nọ o dhesẹ isiuru kpahe otọakpọ Aparadase, whọ rẹ sae ta nọ:
◼ “Evaọ iweze mẹ n’ukpo, ma rọwo nọ re a sai ku ẹbẹbẹ akpọ nọ a nua no na họ, Ọghẹnẹ o re dhomahọ eyero ahwo. Rekọ onọ na họ, Eme ma re ru hrọ re ma zọ ruọ akpọ okiẹrẹe ọkpokpọ nọ Ọghẹnẹ o bi ru na?” Se Jọn 17:3. Zizie ọnọ o wo uwou na re ọ rehọ uvẹ obe uwuhrẹ Ebaibol ọvọvẹ na ro wo erere no eriariẹ obọdẹ ọnana ze.
8 Ẹvẹ o rọ oware ọghọ te re a rehọ omai ruiruo wọhọ iruiruo ivuẹvu edẹ mai nana re ma je ru iruo ewhowho nọ o re siwi uzuazọ! J’omai kpobi a vọ avọ iruo evaọ ewhowho emamọ usi na avọ iroro ọ ovẹrẹ, ‘keme wha riẹ nọ iruo mai e rọ ivrẹvru hu.’—1 Kọr. 15:58.