Ẹkpẹti Onọ

◼ Eme u fo nọ a re ru okenọ okpẹtu o te du lahwe nọ u duobọhọ inievo mai?

Otẹrọnọ Okpẹtu O Du Lahwe Evaọ Okegbe Ra: Who nuhu hu. Rọ udu t’otọ, je roro kpahe oware nọ o mai ghine wo aghare—uzuazọ ra, orọnikọ ekwakwa ha. Rẹro te ẹgwọlọ ugboma uviuwou ra. Vuẹ ekpako na kpahe eyero ra gbe oria nọ whọ rọ enẹna. Ekpako gbe idibo iruiruo na a w’abọ ologbo evaọ ẹwhaze eware obufihọ. Otẹrọnọ a kake kẹ unuovẹvẹ kpahe okpẹtu, wọhọ kpahe okpo-ofou jọ, u re mu inievo enana ẹro nọ ahwo na kpobi a rọ oria ufuoma, yọ oke o tẹ riẹ, u fo re a wha ze jẹ ghale eware nọ a gwọlọ.

Ofariẹ, iwuhrẹ obe-ukoko a rẹ gwọlọ uviuwou ọvuọvo jẹ nọ kpahe oma rai. U fo re a vuẹ ọsẹro ukoko na hayo ọkpako ọfa kpahe epanọ uviuwou ovuovo o rọ, o tẹ make rọnọ ai kpobi a rọ sasasa. Otẹrọnọ ohwo jọ ọ nwoma, ekpako na a rẹ daoma re a wọe kpohọ uwou imu. A rẹ jẹ kẹ eware iwo kpobi wọhọ emuore, emuosẹ, uwou, hayo eware uviuwou nọ a gwọlọ. (Jọn 13:35; Gal. 6:10) Ekpako na a rẹ kẹ ukoko na uketha ẹzi gbe orọ iroro a ve je ru ọruẹrẹfihotọ vẹrẹ vẹrẹ re a mu iwuhrẹ ukoko họ. Nọ a tẹ kiẹ eware kpobi duwu ziezi no, ọkpako jọ ọ vẹ nyabru ọsẹro okogho na kẹ ugboma ekpako na re ọ vuẹe kpahe enwoma kpobi, ọraha nọ o te Ọgwa Uvie na, hayo ọraha nọ o te iwou inievo na, gbe ẹgwọlọ obọdẹ kpobi. Ọsẹro okogho na o ve fonu hayo vi ovuẹ se uwou ogha na kpahe oware nọ o jọ oria na via. Uwou-ogha na a te rẹro te eware obufihọ ilogbo kpobi nọ a gwọlọ.

Otẹrọnọ Okpẹtu O Du Lahwe Evaọ Oria-Ọfa: Kareghẹhọ inievo emezae gbe inievo emetẹ na evaọ olẹ ra. (2 Kọr. 1:8-11) Otẹrọnọ whọ gwọlọ kẹ obufihọ ugho, whọ rẹ sai vi unevaze ra se Ukoko-Ulogbo, oria nọ a jọ fi ẹkpa-ugho họ kẹ ẹjiroro ọnana. Adrẹse na họ: Watch Tower, P.M.B. 1090, Benin City, Edo State. (Iruẹru 2:44, 45; 1 Kọr. 16:1-3; 2 Kọr. 9:5-7; rri Uwou-Eroro Na, December 1, 1985 [ọrọ Oyibo], ẹwẹ-ebe 20-22.) Who vi eware hayo ekwakwa kpohọ oria okpẹtu na ha ajokpanọ inievo nọ e be rẹro te onana a gwọlọ oyena. Onana o rẹ kẹ imuẹro ẹkpatiẹ omodawọ iruo obufihọ na gbe ẹghale owowa ọrọ ekwakwa na. (1 Kọr. 14:40) Iviena whọ rehọ ifonu t’ẹme kugbe Ukoko-Ulogbo odode he, keme onana u re ru nọ uvẹ nọ ma gwọlọ ro yo ovuẹ no oria okpẹtu na ze u je brudhe.

Nọ a tẹ kiẹ eware kpobi riwi ziezi no, Ukoko-Ulogbo a te jiroro sọ a rẹ rehọ ogbẹgwae obufihọ mu. A te vuẹ inievo nọ i te. U fo re ahwo kpobi a ruiruo kugbe ekpako nọ e be k’obaro na re a sae nyate ẹgwọlọ ologbo inievo na.—Rri Jehovah’s Witnesses—Proclaimers of God’s Kingdom, ewẹ-ebe 310-315.