Kọ Whọ Ruẹrẹ Oma Kpahe Kẹ Okpẹtu No?
1. Fikieme o jẹ rrọ oware areghẹ re ma ruẹrẹ oma kpahe kẹ okpẹtu?
1 Kukpe kukpe, ima ahwo buobu te inievo mai a be ruẹ uye etọ nọ i re nuhu, ẹvo, ozighi, ẹmo, gbe okpẹtu efa nọ ahwo-akpọ a be r’obọ so gbe enọ a r’obọ so ho. Okpẹtu ahwo ugbarugba nọ e rẹ wha ebọmbo hayo iresa e rẹ sae romavia evaọ oria kpobi.
2. Obufihọ vẹ ma rẹ sai rẹro riẹ mi Jihova?
2 Dede nọ eware e sai yoma vi enẹ evaọ obaro, idibo Ọghẹnẹ a rẹ dhozọ hayo ruawa ha. Fikinọ ma bi wuhrẹ Ebaibol ma riẹ oware nọ o soriẹ nọ akpọ na o bi ro dhe eyeyoma gbe oria nọ ma yeri te no. (2 Tim. 3:1, 13) Jihova Ọghẹnẹ mai ọ ya eyaa inọ o ti fi obọ họ kẹ omai kru ẹgbakiete mai. Wọhọ oriruo, o ti siwi omai evaọ uye ulogbo nọ o mae rro nọ u bi ti te akpọ na soso kẹle na. Kẹsena enọ e zọ a vẹ te rọ eghale Uvie na reuku bẹdẹ bẹdẹ. (Aiz. 14:7) Bọo oke yena, okpẹtu nọ ahwo a be r’obọ so gbe enọ a be r’obọ so ho e te gbẹ via. Nọ orọnọ eware nana e rẹ sae via idudhe je kpomahọ ohwo kpobi na, o rrọ oware areghẹ re ma ruẹrẹ oma kpahe.—Itẹ 21:5.
3. Ono ọ rẹ jiroro na sọ a rẹ kwa no oria nọ okpẹtu ọ rrọ hayo daji etẹe?
3 Ruẹrẹ Oma Kpahe: Ẹsejọ egọmeti ọ rẹ vẹvẹ ahwo unu kpahe okpẹtu nọ ọ be te via. U wuzou re ma gaviezọ kẹ unuovẹvẹ itieye na. (Itẹ 22:3) Evaọ etoke otiọye na, ekpako na a rẹ nya bru ahwo nọ a rrọ ukoko na kpobi re a fi obọ họ kẹ ae ruẹrẹ oma kpahe. Ekpako na a rẹ vẹvẹ ezọ kẹ eware nọ e be jọ ẹwho rai via re a sae kẹ iwhowho-uvie emamọ ohrẹ. Ghele na, ekpako na a rẹ vuẹ ohwo ọvo oware nọ o re ru gbiae hayo gbae họ ru oware nọ u kiehọ evaọ aro rai hi. Fikiere, wha tẹ kparo ruẹ okpẹtu, ohwo ọvo ọ rẹ hẹrẹ inọ ekpako na a ta kẹe inọ ọ kwa hayo uwou ogha u kere ze taure ọ tẹ te riẹ oware nọ o re ru hu. Evaọ etoke okpẹtu, ohwo kpobi ọ rẹ jiroro kẹ omobọ riẹ sọ ọ rẹ kwa hayo ọ rẹ kwa ha. Ohwo ọvo ọ rẹ kpakpa ahwo oma inọ a kwa hayo whaha ahwo nọ a gwọlọ kwa inọ a daji oria nọ a rrọ họ.—Gal. 6:5.
4. Eme o sae jọ owojẹ areghẹ nọ ẹmo hayo ozighi o te du lahwe evaọ oria nọ ma rrọ?
4 Evaọ ẹsibuobu, ozighi gbe ẹmo e rẹ romavia idudhe. Ebaibol ọ ta kẹ omai inọ ma wareghẹ, jẹ jaja aro vi ẹsikpobi. (Itẹ 27:12) Fikiere, omomọvo o re muẹrohọ eware nọ e be via wariẹ omai họ ẹsikpobi. Ma rẹro inọ ohwo kpobi o ti ru oware nọ u re siwi uzuazọ nọ okpẹtu ọ tẹ via. Onana o sae gwọlọ nọ ma kwa no oria nọ ozọ okpẹtu o rrọ na kpohọ obonọ o f’oma bẹsenọ eware i re woma no. Inievo jọ a rọ ere siwi uzuazọ rai no dede nọ a raha eware rai nọ a dhẹ seba. Uzuazọ mai u wuzou vi ekwakwa mai kpekufiẹ. (Luk 12:15) O rrọ oware areghẹ hẹ re ohwo ọ keria hẹrẹ okpẹtu nọ o sae wha uwhu sei fikinọ ọ gwọlọ dhẹ siọ eware riẹ ba ha.
5. Ẹvẹ ma re ro yoẹme kẹ ekpako na otẹrọnọ ma be rria oria nọ eware okpẹtu e rẹ jọ via?
5 Otẹrọnọ ukoko na o rrọ oria nọ eware okpẹtu e rẹ jọ via hayo a be jọ ẹwho na rẹro ozighi hayo ẹmo, ekpako na a re mi iwhowho-uvie odẹ gbe inọmba ifonu omoni rai hayo ogbẹnyusu rai jọ nọ ọ be rria obọfa ọnọ a rẹ sai se nọ okpẹtu ọ tẹ romavia idudhe. Onana u ti fi obọ họ kẹ ekpako na riẹ obonọ inievo na a dhẹ nya. Ekpako na a sai je wo omaa jọ kpahotọ kẹ ukoko na, wọhọ oriruo a sae ruẹrẹ eware nọ e r’oja kpahe nọ a sae rọ rẹrote ahwo evaọ oke okpẹtu idudhe, omaa epanọ a rẹ rọ dhẹ, gbe oghẹrẹ nọ a re ro fi obọ họ kẹ enọ i wo obọdẹ ẹgwọlọ jọ. U fo re ma yoẹme kẹ ekpako na evaọ eruẹrẹfihotọ enana.—Hib. 13:17.
6. (a) Eme ma re ru otẹrọnọ okpẹtu o romavia evaọ oria nọ ma be rria? (b) Fikieme ma jẹ rehọ adrẹse gbe inọmba ifonu ekpokpọ mai kẹ ekpako na?
6 Okpẹtu Ọ tẹ Via No: Eme who re ru nọ okpẹtu o te du lahwe evaọ oria ra? Fi obọ họ kẹ uviuwou ra wo eware nọ a rẹ rọ rẹrote oma rai okioke yena. Rehọ utho nọ who wo fi obọ họ kẹ amọfa nọ uye na u kpomahọ. Daoma ta ẹme kugbe ọsẹro utu usiuwoma ota rai hayo ọkpako ọfa vẹrẹ. Ru ere o tẹ make rọnọ who wo ẹbẹbẹ ọvo ho. Whọ tẹ gwọlọ obufihọ, riẹ nọ inievo ra a bi ru epanọ a ti ro fi obọ họ kẹ owhẹ. (1 Kọr. 13:4, 7) Kareghẹhọ inọ Jihova ọ be ruẹ uyero ra; fievahọ iẹe inọ ọ te rẹrote owhẹ. (Ol. 37:39; 62:8) Rehọ uvẹ kpobi nọ u te owhẹ obọ tuduhọ amọfa awọ. (2 Kọr. 1:3, 4) Ekpako na omarai a te daoma ta ẹme kugbe ahwo na kpobi re a riẹ sọ a rrọ oma kọkọ, jẹ gwọlọ obufihọ jọ. O rẹ raha oke re a tẹ te riẹ oria nọ ahwo a rrọ nọ ekpako na a gbe wo adrẹse gbe inọmba ifonu ekpokpọ rai hi. Fikiere u fo re iwhowho-uvie a rehọ adrẹse gbe inọmba ifonu ekpokpọ rai kẹ okere-obe gbe ọsẹro utu usiuwoma ota rai.
7. Eme ma re ru re ẹrọwọ mai ọ jọ gaga evaọ obonọ ma dhẹ nya?
7 Evaọ Obonọ Whọ Dhẹ Nya: Oria kpobi nọ ma dhẹ kpohọ evaọ oke okpẹtu, u wuzou re ma ru eware nọ e rẹ lẹliẹ ẹrọwọ mai jọ gaga. O gbẹ lọhọ re ma kpohọ iwuhrẹ evaọ obọ Ọgwa Uvie he, iwhowho-uvie a rẹ sai ru iwuhrẹ ukoko na evaọ itu esese, wọhọ utu usiuwoma ota rai. Rekọ onana o gbẹ lọhọ họ, a rẹ sae jọ Egagọ Uviuwou se eria nọ a rehọ iwuhrẹ ẹkpoka na no ze bẹsenọ uvẹ ekpohọ ewuhrẹ u ti ro rovie. Evaọ etoke otiọye na, ohwo kpobi ọ rẹ rọ areghẹ ta “emamọ usi uwoma” na kẹ ohwo kpobi nọ ọ sae gaviezọ. (Aiz. 52:7) Evaọ urere amara, owhowho-uvie kpobi ọ rẹ daoma rọ iyẹrẹ riẹ kẹ okere-obe na hayo ọsẹro utu usiuwoma ota, hayo ethabọ riẹ. Ere ma re ro ru iruo usiuwoma ota mai evaọ “ezi owoma gbe ezi oyoma.”—2 Tim. 4:2, NW.
8. Ẹvẹ mai Ileleikristi ma re rri eware okpẹtu nọ e be via?
8 Dede nọ akpọ o bi kie ewawa fiki ozọ eware okpẹtu, u mu omai ẹro inọ ewoma ọ rrọ obaro tha. Kẹle na eware okpẹtu e gbẹ te via ha. (Evia. 21:4) Re oke yena u te ti te, joma hae ruẹrẹ oma kpahe kẹ okpẹtu, yọ evaọ oke ovona ma be rọ ajọwha whowho emamọ usi na.
[Ẹkpẹti nọ o rrọ ẹwẹ-obe avọ 6]
Epanọ A rẹ rọ Ruẹrẹ Oma Kpahe Kẹ Okpẹtu:
• Fi ebe nọ i wuzou họ ẹmẹkpa nọ a rẹ sae wọ dhẹ.
• Ruẹrẹ eware nọ wha sae rọ rẹrote oma rai edẹ esa rite edẹ isoi họ, emu, imu, gbe ame.
• Ruẹrẹ oma kpahe kẹ ẹdhẹ, jẹ riẹ oria nọ whọ rẹ dhẹ nya.
• Nya lele ọruẹrẹfihotọ egọmeti gbe ekpako ukoko rai.