Ekareghẹhọ Na—Ehaa nọ U Wuzou Gaga!
1 Evaọ Ẹdoka, March 23, nọ ọre o te kiediwi no, ma ti ru ehaa Ekareghẹhọ uwhu Kristi. (Luk 22:19) Onana ghinọ ehaa nọ u wuzou gaga! Ẹkwoma ẹyọrọ ẹgbakiete riẹ kẹ Jihova rite uwhu, Jesu o te dhesẹ nọ o lọhọ re ohwo-akpọ ọ yọrọ omarọkẹ Ọghẹnẹ gbagba makọ evaọ otọ uye ulogbo, ọ tẹ rehọ erei kpare udu esuo-okpehru Jihova kpehru. (Hib. 5:8) Ofariẹ, Kristi Jesu ọ kẹ idhe ohwo ọgbagba nọ a gwọlọ re a ta ahwo-akpọ no igbo, nọ u ru rie lọhọ kẹ enọ i wo ẹrọwọ re a rria bẹdẹ bẹdẹ. (Jọn 3:16) Nọ ma tẹ ze Ekareghẹhọ na, ma rẹ sai dhesẹ ovuhumuo mai no udu ze kẹ uyoyou Jihova gbe orọ idhe Jesu fiki mai.
2 Ma tudu họ ahwo kpobi awọ re a nya lele ọruẹrẹfihotọ isase Ebaibol nọ a m’oma riẹ fihọ March 18-23, wọhọ onọ a kere fihọ 1997 Calendar of Jehovah’s Witnesses na. Ere re, ẹmeọta uviuwou kpahe izou 112-116 ọrọ obe ọ The Greatest Man Who Ever Lived na u ti fiobọhọ rẹriẹ iroro mai kpohọ oka nọ o mai wuzou kpobi evaọ ikuigbe ohwo-akpọ.
3 Kọ whọ te sai ru oke nọ whọ rẹ raha evaọ iruẹru usiuwoma ota viharo evaọ ezi ọ Ekareghẹhọ na? Iwhowho-uvie buobu a te rehọ uvẹ urere eka isoi nọ e rọ March ro ruiruo vọvọ re a ruiruo wọhọ ekobaro ubroke. Keme whọ gbẹ jọ omọvo rai jọ họ? Mai kpobi a rẹ sai w’abọ vọvọ re ma fiẹgba họ epanọ u wuzou te re a kpohọ Ekareghẹhọ na. Nọ u kie fihọ Ẹdoka na, o te lọhọ re ahwo buobu a nyaze. Jọ u mu owhẹ ẹro nọ who zizie emọ-uwuhrẹ Ebaibol ra kpobi gbe amọfa nọ i wo isiuru re a kuomagbe omai. Ghale oware nọ a kere fihọ ẹwẹ-obe avọ 127, edhe-ẹme avọ 18, evaọ obe Eriariẹ na kugbe ai kpahe ẹdẹ ọvo evaọ ẹgbukpe na nọ a rẹ nabi koko.
4 Sikẹle ehaa 1997 ọnana nọ ọ mae wuzou na avọ ovuhumuo odidi kẹ oware kpobi nọ uwhu Jesu u dhesẹ k’omai. Jariẹ evaọ owọwọ March 23 na, okenọ Ileleikristi uzẹme evaọ oria kpobi a ti ro koko Ekareghẹhọ na avọ ẹrọwọ.