Lele Jesu Kẹse Kẹse
1 Okejọ Jesu ọ ta nọ: “Ohwo nọ ọ guọlọ nọ o re lele omẹ, jọ ọ vro oma riẹ re ọ [tọlọ ure oja, NW ] riẹ ọ rọ kpahe omẹ.” (Mat. 16:24) Ma gwọlọ kuyo ziezi kẹ eme Jesu na. Joma rri oware nọ eme uzizie riẹ na i kpomahọ.
2 “Jọ Ọ Vro Oma Riẹ”: Nọ ma rehọ izuazọ mai mudhe kẹ Jihova, ma tẹ vro oma mai. Ugogo otofa ubiẹme Grik nọ a fa “vro” na họ “ta nọ ijo.” Oyena u te dhesẹ nọ ma rehọ unevaze siobọno ẹgwọlọ mai, isiuru, omosasọ, gbe omawere oriobọ mai—o vẹ jẹ jọ ọtamuo mai re ma ru Jihova eva were bẹdẹ bẹdẹ.—Rom 14:8; 15:3.
3 ‘Tọlọ Ure Oja Riẹ’: Uzuazọ Oleleikristi họ ọrọ ẹwọ ure oja iruo omarodhidhe kẹ Jihova. Edhere jọ nọ a re ro dhesẹ ẹzi omolahiẹ họ ọwhọ nọ ma re wo evaọ odibọgba na. Evaọ enukpe ọnana, iwhowho-uvie buobu a be reawere iruo ọkobaro ubroke na. Ẹsejọhọ whọ rọ usu rai yọ whọ rẹ jẹ kẹ imuẹro nọ eghale nọ who bi wo i bu vi oma nọ whọ lahiẹ no. Ahwo nọ e sai ru iruo ọkobaro ubroke he a ruẹrẹ oma rai họ ziezi no re a raha oke buobu evaọ iruo usiuwoma ota na wọhọ iwhowho-uvie ukoko. Evaọ ute yena, ikoko jọ a bi ru iwuhrẹ odibọgba rai vẹrẹ vi epanọ a je ru vẹre. O be were iwhowho-uvie buobu eva fikinọ a wo oke buobu enẹna nọ a rẹ raha evaọ usiuwoma na. Ahwo jọ a ruẹ emamọ iyẹrẹ no re nọ a tẹ gwọlọ ‘kpohọ uwou ọfa jọ’ re a raha ‘iminiti kakao efa.’
4 Edhere ọfa nọ a re ro dhesẹ ẹzi omolahiẹ họ ute omobọ ra nọ who re fihọ. Ẹkwoma omaruẹrẹhọ ziezi gbe oke mai nọ ma rẹ kpọ, ahwo jọ a zihe ruọ ekobaro oke-kpobi no. Amọfa a ruẹrẹ oma rai họ no re a sai kpohọ Ebẹtẹle hayo Isukulu Ewuhrẹ Odibọgba. Ahwo jọ a kua kpohọ oria nọ ẹgwọlọ iwhowho Uvie o jẹ mae rro no.
5 “Rọ Kpahe Omẹ”: Dede nọ ilele Jesu a nyaku edawọ buobu, ọwhọ gbe ithihakọ riẹ evaọ odibọgba na o jẹ tudu họ ai awọ. (Jọn 4:34) A je wo uduotahawọ nọ ọ tẹ rọ kugbe ai je no ovuẹ riẹ ze. Oye jabọ nọ ahwo nọ i je lele iei a je wo uvi oghọghọ na. (Mat. 11:29) Fikiere j’oma tudu họ ohwohwo awọ re ma thihakọ evaọ iruo usiuwoma ota Uvie na gbe eruo ilele nọ u wuzou gaga na.
6 Joma kuyo ziezi kẹ uzizie Jesu re ma lele iei kẹse kẹse ẹkwoma ewo ẹzi omolahiẹ. Nọ ma bi ru ere na, ma ti wo oghọghọ ulogbo enẹna je rẹro eghale nọ e mae rro evaọ obaro.