Ekpako na A rẹ Ta Usiuwoma Ababọ Eriosehọ
1 Nọ ahwo a be kpako, ibuobu rai a rẹ tẹro vi oke nọ a rẹ rọ kpako n’iruo jẹ reawere uzuazọ ababọ awa-ọruọ evaọ etoke ikpe rai nọ i kiọkọ. A rẹ sai w’iroro nnọ a ruiruo gaga no yọ enẹna a gwọlọ eriosehọ. Hayo a rẹ sae gwọlọ reawere uzuazọ, ọrọ umutho oke nọ u kiọkọ na ọvo.—Luk 12:19.
2 Wọhọ idibo Jihova nọ e rọ oma mudhe no, ẹro ọtọvi mai evaọ uzuazọ o wo ohẹriẹ. Ma riẹ nọ a rẹ kpako no iruo Ọghẹnẹ hẹ. Eriwo mai ọ rẹ liọliọ keme ma fi ‘uzuazọ ebẹdẹ bẹdẹ họ aro mai.’ (Jud 21) Eriariẹ nọ a kokohọ gbe eware nọ a rọ ẹro ruẹ evaọ ikpe buobu e rẹ sai fi ẹnyaharo họ orimuo gbe otoriẹ ohwo. Onana o rẹ sai fiobọhọ kẹ ohwo w’areghẹ jẹ dọmu viere je dhesẹ ovuhumuo odidi rọkẹ uzuazọ. Enana kpobi i re fiobọhọ k’ohwo ziezi wọhọ ọgbodibo usiuwoma na.
3 Ẹrro kpako o rọ ẹme owho ọ ugboma na gheghe he; u kpomahọ iroro ohwo re. Otẹrọnọ who rẹro nọ whọ rẹ rria oke thethei yọ whọ tẹ jẹ be daoma re who wo oma-ọmaha, uvẹ nọ who re ro wo ae ivẹ na o rẹ sai viharo. Ahwo nọ a kpako no a rẹ sai ru izuazọ rai kpokpọ ẹkwoma eriariẹ ẹzi rai nọ a re ru vihọ je wo abọ aghale riẹ kugbe amọfa.—1 Kọr. 9:23.
4 Iriruo Uzuazọ nọ I Muẹro: Oniọvo ọmọtẹ jọ nọ ọ kpako te ikpe 86 no, ọ ta nọ: “Nọ me te roro kpahe ikpe 60 nọ e vrẹ no anwẹnọ mẹ rọ riẹ uzẹme na, eyaa imuẹro Ọghẹnẹ e vẹ whẹruọ udu mẹ. Ẹhẹ, Jihova ọnọ ọ rẹ rehọ omurokpotọ lele erọ omurokpotọ yeri na ọ be k’omai uvẹ re ma vu oghọghọ buobu.” (Ol. 18:25) Oniọvo ọmọzae jọ nọ ọ kpako no ọ kareghẹhọ epanọ uwhu aye riẹ o rọ jọ egwegwe ọgaga kẹe, nọ o wha ẹraha omakpokpọ riẹ ze ẹmẹrera. Ọ ta nọ: “Ghele na, ẹkwoma aruoriwo Jihova, mẹ tẹ wariẹ wo ẹgba ziezi t’epanọ mẹ rọ ro iruo ọkobaro na nọ ikpe ivẹ e vrẹ no. Me yere Jihova gaga inọ omakpokpọ mẹ u ghine nwene woma no ẹkwoma ọ iruẹru buobu ọrọ usiuwoma ota onana!”
5 Ẹvẹ o rọ oware ujiro te inọ o rọ ọtamuo ekpako na buobu re a gbẹ ta usiuwoma na haro rite umuo nọ omakpokpọ gbe ẹgba rai o kẹ rai uvẹ te—ababọ eriosehọ! A wo uvi iroro nọ a re ro bovia inọ: ‘O Ọghẹnẹ, who wuhrẹ omẹ no emaha mẹ ze, me gbe bi whowho iruo igbunu ra rite enẹna.’—Ol. 71:17.