A Re Serihọ Evaọ Ewhowho Emamọ Usi na Ha
1 Ileleikristi ọsosuọ na a se odibọgba rai gboja gaga. Luk ọ niyẹrẹ nọ: “Kẹdẹ kẹdẹ a jẹ jọ eva uwou egagọ-ode gbe obọ uwou seri uwuhrẹ Jesu Kristi họ họ.” (Iruẹru 5:42) Oware ovo, makọ ukpokpoma dede, o sae whaha ae he! (Iruẹru 8:4) A jẹ t’ẹme k’amọfa kpahe uzẹme na kẹdẹ kẹdẹ.
2 Kọ ẹvẹ kpahe omai? Nọ omobọ ra nọ: ‘Kọ me vuhu ẹkpata oke na mu? Kọ mẹ be gwọlọ gbẹ hae whowho emamọ usi na ababọ eriosehọ?’
3 Iriruo Ọgbọna ọrọ Usiuwoma Ota Ababọ Eriosehọ: Oniọvo ọmọtẹ jọ, nọ ọ be mọ ẹyao irue, a te fi ei họ ẹkpẹti ẹwẹ. Ọ rẹ sae kpohọ Ọgwa Uvie hayo okokohọ họ. Rekọ o je whowho emamọ usi na kẹse kẹse. Evaọ etoke ikpe 37 ẹko-dhere riẹ, ọ sae fiobọhọ kẹ ahwo 17 wuhrẹ uzẹme na! Ẹvẹ ọ sae ro ru ei? Makinọ ọ rẹ sae nya no uwou ruọ uwou hu, yọ ọ rẹ gwọlọ edhere kẹdẹ kẹdẹ re o se isẹri ọnyakuo kẹ ahwo nọ e be nya ze te rue riẹ.
4 Inievo mai nọ e rọ obọ Bosnia a bi thihakọ ẹmo gbe awhaha. Ghele, kẹse kẹse a be hae ta usiuwoma kẹ amọfa. Evaọ Sarajevo iwhowho-uvie na a bi ru te euwa 20 evaọ ẹghale rai kamara kamara nọ a be rọ t’ẹme kẹ amọfa kpahe emamọ usi na, yọ owhowho-uvie ọvuọvo o bi ru obe uwuhrẹ Ebaibol ivẹ evaọ ẹghale riẹ. Ghelọ eyero ọgaga rai, a be ta usiuwoma je wuhrẹ ababọ eriosehọ.
5 Emaha a bi dhesẹ ajọwha kẹ odibọgba na re. A fi uviuwou Isẹri jọ họ ubrukpẹ evaọ obọ Rwanda oria nọ isoja a jẹ ruẹrẹ oma kpahe re a kpe ai. Uviuwou na a tẹ yare uvẹ re a lẹ tao. A tẹ kẹ ai uvẹ onana, ọmọtẹ ọboba na, Deborah, ọ tẹ lẹ via gaga inọ: “Jihova, ẹkpoka ọnana mẹ avọ Ọsẹ mẹ ma fi emagazini isoi họ ada. Kọ ẹvẹ ma te sae ro zihe bru ahwo nana re ma wuhrẹ ai uzẹme na je fiobọhọ kẹ ai wo uzuazọ?” Fiki ẹrọwọ ọgaga gbe uyoyou riẹ kẹ odibọgba na, a gbe kpe uviuwou na soso ho.
6 Nẹnẹ, o gwọlọ re ma muẹro họ otọ kẹ uvẹ nọ ma re ro sisẹri kẹ amọfa jẹ kiẹ ahwo nọ “a wo eva ezi kpahe uzuazọ ebẹdẹ bẹdẹ” via. (Iruẹru 13:48) Rọwo kugbe eyero obọ mai, ekpako ukoko a re ru ọruẹrẹfihotọ kẹ isẹrise ogbotu evaọ oke nọ u kiehọ, jọ ohiohiẹ, uvo, hayo owọwọ. Izoẹme nọ e rọ Odibọgba Uvie Mai gbe abọ Iwuhrẹ Odibọgba, ikokohọ okogho, gbe okokohọ ubrotọ e rẹ kẹ ezọhọfihọ ẹruoke gbe ọbọga re ma w’abọ evaọ isẹri-ise sa-sa Uvie na. Fiba onana, esẹro okogho gbe ubrotọ a re wuhrẹ iwhowho-uvie evaọ isẹri-ise iyẹrẹ, dhesẹ epanọ a re ru ẹkwotọ nọ ahwo a bi jo ruiruo, je dhesẹ idhere efa nọ a re ro se-isẹri evaọ oria kpobi nọ a re jo duku ahwo. Enana kpobi i fi ẹgba họ ẹme na nọ a re serihọ họ evaọ ewhowho emamọ usi na!
7 Ikọ Jesu a whowho avọ aruọwha inọ: “Ma rẹ sae siọ oware nọ ma ruẹ je yo ba ẹta ha.” Ẹvẹ a sae ro thihakọ dede nọ ezadhe buobu e jariẹ? A lẹ kẹ Jihova re o fiobọhọ kẹ ae, yọ ere o ghine ru, keme “ẹzi ẹri ọ tẹ ze vọ ai kpobi oma, a [tẹ] jẹ rọ aruọwha ta ẹme Ọghẹnẹ.” (Iruẹru 4:20, 29, 31) Ahwo kpobi a sae nwani wo oghale eviavia igbunu evaọ odibọgba na ha, rekọ ma te ghine wo isiuru ewhowho emamọ usi na ababọ eriosehọ gbe nọ ma te ru omodawọ nọ ma re ro ru erei makọ evaọ ekẹdẹ kẹdẹ, Jihova o ti fiobọhọ k’omai.