Ẹvẹ A Sai ro Yo?

1. Eme ọ sae lẹliẹ iruo usiuwoma na jọ bẹbẹ, kọ fikieme ma bi ro thihakọ?

¹ Nọ ẹdẹ Jihova o bi sikẹle kpatakpata na, o r’oja gaga re ma gbe fi obọ họ kẹ amọfa wo eriariẹ egbagba kpahe Ọghẹnẹ gbe ẹjiroro riẹ kẹ ahwo-akpọ. (Jọn 17:3; 2 Pita 3:9, 10) O sae jọ bẹbẹ ẹsejọ, keme ahwo buobu a se iruo usiuwoma ota mai na gboja ha, yọ a sai se omai ẹkoko. (2 Pita 3:3, 4) O make rrọ ere na, ma wo irẹro inọ ahwo jọ a gbẹ rrọ ẹkwotọ mai nọ a ti dede emamọ usi na rehọ nọ a tẹ nwani yoi. Ẹvẹ ahwo otiọye a sai ro yo ababọ ohwo nọ ọ rẹ ta kẹ ae?—Rom 10:14, 15.

2. Didi uduotahawọ ma wo no oriruo Pọl ze?

² Evaọ otọ Ọwọsuọ: Nọ orọnọ ahwo jọ a gbẹ riẹ nọ a be kezọ kẹ ovuẹ Uvie na, oma iruo na o rẹ lọhọ omai vievie he. Filipai họ okpẹwho ọsosuọ nọ Pọl ukọ na ọ jọ ta usiuwoma evaọ Europe. Rekọ nọ a wọ eku họ Pọl avọ Saelas uzou evaọ etẹe, a tẹ rehọ ekpọ fae je fi ai họ uwou-odi. (Iruẹru 16:16-24) Rekọ, oyena o lẹliẹ ozọ mu Pọl siọ iruo na ba ha. Nọ o kpohọ Tẹsalonika, nọ o jọ okpẹwho avivẹ evaọ erẹ usiuwoma ota riẹ, ọ rọ aruọwha ta usiuwoma fiki ẹgba nọ Ọghẹnẹ ọ kẹ riẹ. (1 Tẹs. 2:2) Kọ oriruo Pọl na o gbe dhesẹ oware nọ ma gbẹ siọ iruo na ba ha?—Gal. 6:9.

3. Eme ọ rẹ sae lẹliẹ ahwo jọ nọ a wo isiuru kpahe ovuẹ Uvie na vẹre he nwene iroro rai?

³ Ahwo jọ buobu nọ a jẹ gaviezọ k’omai vẹre he, a mu ezọ họ ẹgaviẹ no. O sae jọnọ ekọ rai nọ i kie, ẹyao, ohwo jọ nọ ọ jọ uviuwou rai whu, hayo usi eware iyoma nọ e be via evaọ akpọ na o wọ rai nwene iroro rai. (1 Kọr. 7:31) Emọ jọ nọ esẹgbini rai a jẹ whaha vẹre a te ahwo no, yọ a gwọlọ kezọ. Iruo usiuwoma ota mai nọ ma rẹ ruabọhọ u re rovie uvẹ fihọ kẹ ahwo otiọye kurẹriẹ taure urere na o tẹ ze.—Rom 10:13.

4. Eme ọ be wọ omai ruabọhọ odibọgba na ababọ obọ u rolo?

⁴ Who re Rolo Obọ Họ: Uyoyou mai kẹ Ọghẹnẹ gbe erivẹ o rẹ wọ omai ta usiuwoma na ababọ obọ nọ ma re rolo, wọhọ epanọ ikọ na a ru evaọ ikpe-udhusoi ọsosuọ na. (Iruẹru 5:42) Ahwo buobu nẹnẹ a bi “dimẹ je bi bo fiki eware oma-uzue” nọ ahwo a bi ru. (Izik. 9:4) Emamọ usi na o rẹ wha ẹruore avọ omosasọ se ahwo otiọye! Nọ ahwo buobu a gbẹ make kezọ k’omai hi, Ikereakere na e k’omai imuẹro inọ omodawọ mai o be da Jihova ẹro.—Hib. 13:15, 16.