Ta Usiuwoma Ababọ Eriosehọ
1 Ẹsejọ ma sai roro nọ ma jọ ẹkwotọ mai ta usiuwoma na ziezi jẹ nyate ahwo na kpobi oma no, ababọ emamọ iyẹrẹ nọ i bi noi ze. Rekọ ma wo uvi ẹjiroro sa-sa nọ ma jẹ ruabọhọ usiuwoma na ota.—Mat. 28:19, 20.
2 Re O Jọ Isẹri: Jesu ọ ta nọ iruo usiuwoma ota na e te jọ abọ ologbo ọrọ oka nọ u ti dhesẹ “urere akpọ na” yọ o te jọ “isẹi kẹ erẹwho akpọ na kpobi.” (Mat. 24:3, 14) Nọ ahwo a be ruẹ omai nọ ma be ta usiuwoma na, yọ isẹri ilogbo rọkẹ ae. Nọ ma te no okegbe na no, ahwo jọ a sae ta ẹme kpahe omai evaọ euwa hayo edẹ buobu, o tẹ make rọnọ a gaviezọ kẹ omai hi. Ma tẹ be hae kareghẹhọ ẹjiroro nọ ma be rọ ta usiuwoma na u re fi obọ họ k’omai ruabọhọ iruo na. Ma bi ru Jihova eva were ẹkwoma obọwo evaọ erugba eruẹaruẹ Ebaibol, ẹkwoma isẹri nọ ma bi se kẹ ahwo je whowho ovuẹ unuovẹvẹ kẹ ae.—2 Tẹs. 1:6-9.
3 Ma Gwọlọ Ithihakọ: Fikinọ eware buobu e riẹ nọ e be rehọ iroro ahwo gbe oke rai, ma gwọlọ ithihakọ nọ ma tẹ gwọlọ fi obọ họ kẹ ohwo nọ o dhesẹ isiuru kpahe usiuwoma na. Inievo jọ a jẹ hae nyabru aye jọ koka koka evaọ ukpe-soso taure ọ tẹ te rọwo nọ a lele iei t’ẹme no Ebaibol ze. Oware nọ o yo o were riẹ gaga, ọ tẹ rọwo nọ a wuhrẹ Ebaibol kugbei, o te mu iwuhrẹ họ ẹnya, u kri hi ọ tẹ gwọlọ nọ ọ rẹ họ-ame.
4 Uyero akpọ u bi nwene kpata kpata, yọ ere uruemu ahwo u bi nwene re. Ẹsejọhọ ibuobu nọ e rọwo gaviezọ k’omai okenọ u kpemu hu a rẹ sae jẹ ovuẹ ẹruore nọ ma bi whowho na rehọ enẹna. O tẹ make rọnọ omọvo ọ jẹ ovuẹ Uvie na rehọ, ithihakọ mai e rrọ uvrẹvru hu.
5 Wariẹ akpọ na họ, ahwo buobu a bi “dimẹ je bi bo fiki eware oma-uzue nọ [ahwo] a bi ruẹ.” (Izik. 9:4) Iyẹrẹ nọ i bi no usiuwoma ota na ze u bi dhesẹ via inọ ahwo nọ a wo evezi a be jẹ ovuẹ Uvie na rehọ. (Aiz. 2:2, 3) Fikiere, joma ruabọhọ usiuwoma ota na ababọ eriosehọ ẹkwoma ithihakọ nọ ma rẹ rọ wha “emamọ usi” na se ahwo.—Aiz. 52:7; Iruẹru 5:42.