T’Ẹme Kpahe Jihova Kẹdẹ Kẹdẹ
1 O rẹ were ahwo re a t’ẹme kpahe oware nọ o rọ ghaghae kẹ udu rai, keme ibuobu nọ e rọ udu na unu o rẹ ta. (Luk 6:45b) Kọ didi oware o rọ ghaghae kẹ udu mai? Ọnọ ọ so ilezi na o kere nọ: “Ẹrọo mẹ o re ti gbe iku ẹrẹreokie ra, je jiri owhẹ bẹsenọ oke u [re] kpo.” (Ol. 35:28) O wo ovuhumuo odidi kẹ Jihova jẹ rehọ iẹ wọhọ obọdẹ uvẹ re ọ t’ẹme kpahe Ọghẹnẹ je jiri ei evaọ oke kpobi. Fikinọ ọ riẹ kpahe Jihova ziezi, ọnọ ọ so ilezi na o wo ẹjiroro buobu nọ ọ jẹ ghọghọ. (Ol. 35:9) Kọ ẹvẹ ma sae rọ raro kele oriruo riẹ?
2 T’Ẹme Kpahe Jihova Evaọ Uwou Ra: U re fo re a t’ẹme kpahe Jihova kẹdẹ kẹdẹ evaọ uviuwou na. Esẹ gbe ini nọ i wo uyoyou udidi kẹ Jihova a rẹ t’ẹme kpahe iẹe evaọ iruẹru rai kpobi. (Izie. 6:5-7) Nọ a bi ru ere na, emọ na a re muẹrohọ nọ ọsẹ gbe oni rai a be rria lele ẹrọwọ rai je rri uzi Ọghẹnẹ ghaghae. Emọ na a ve ti rri ewuhrẹ Ebaibol uviuwou na wọhọ uvi odhesẹvia omarọkẹ Ọghẹnẹ ọrọ ọsẹ gbe oni rai.—2 Pita 3:11.
3 T’Ẹme Kugbe Inievo Ẹzi Ra Kpahe Jihova: Evaọ etoke iruo Ọghẹnẹ mai evaọ ẹkpoka na, ma wo uvẹ buobu nọ ma rẹ rọ rehọ emu ẹzi ko iroro gbe idu mai. Eware ezi nọ ma rẹ t’ẹme kpahe e be kare omai hi. (Luk 6:45a) Kọ owọ-ẹme jọ o riẹ nọ who duku evaọ ewuhrẹ omobọ ra hayo isase Ebaibol ẹkpoka nọ i si owhẹ urru? Ghaliẹe kugbe inievo ra, re whọ rọ ere fiobọhọ kẹ ae re uyoyou rai kẹ Jihova o rro haro.—Ol. 35:18; Hib. 10:24.
4 T’Ẹme kẹ Amọfa Kpahe Jihova: Nọ ma bi yeri kugbe ahwo evaọ kẹdẹ kẹdẹ na—evaọ iruo, isukulu, je kugbe ahwo uviuwou mai nọ e rọwo ho na—u fo re o jọ vevẹ ẹsikpobi inọ ẹrotọvi mai evaọ uzuazọ họ isẹri-ise kpahe Jihova. Viukpenọ ikpeme gbe oghẹrẹ ẹme-ọta akpọ nọ i re tu oma na i wholo omai, u fo nọ ẹme-ọta mai ọ rẹ kpare Ọghẹnẹ kpehru. Kẹdẹ kẹdẹ, evaọ uvẹ kpobi, t’ẹme kẹ amọfa kpahe usiuwoma nọ o vi omai nọ ma ta na.—Iruẹru 5:42; Kọl. 4:6.
5 Wọhọ egegagọ uzẹme Jihova, joma rehọ uvẹ kpobi rọ t’ẹme kpahe Ọghẹnẹ mai nọ o wo ibe he na, Jihova.—Ol. 106:47.