Odibọgba Mai —Edhesẹvia Uyoyou Uzẹme
1 Ma re dhesẹ ẹmeoyo mai kẹ ijaje ivẹ nọ e mae rro na ẹkwoma odibọgba mai. (Mat. 22:37-39) Uyoyou mai kẹ Jihova o rẹ w’omai t’ẹme ezi kpahe iẹe. Uyoyou mai kẹ erivẹ mai o rẹ w’omai tudu họ ai awọ re a gwọlọ eriariẹ oreva gbe ẹjiroro Ọghẹnẹ re, wọhọ omai, a vẹ sai you Jihova je fi oma rai họ uhie kẹ osa uzuazọ ebẹdẹ bẹdẹ. Fikiere, ma rẹ rehọ odibọgba mai kẹ odẹ Jihova adhẹẹ jẹ ghale ẹruore Uvie oghaghae na kugbe erivẹ mai. Ẹhẹ, odibọgba mai yọ edhesẹvia uyoyou uzẹme kẹ Ọghẹnẹ gbe ohwo-akpọ.
2 Uyoyou mai o rẹ w’omai t’ẹme kẹ oghẹrẹ ahwo kpobi evaọ oghẹrẹ oria kpobi. (1 Kọr. 9:21-23) Re a dhesẹ iẹe: Evaọ arupre jọ, ọkpako ukoko Oleleikristi jọ ọ keria kẹle ozerẹ ọ Roman Kathọlik jọ. Ọkpako na o te mi ozerẹ na ẹme ẹkwoma umutho enọ areghẹ jọ, ọ tẹ kpọ ẹme na rri Uvie na. Evaọ okenọ ozerẹ na ọ ruotọ no arupre na, yọ ọ rehọ ebe ivẹ mai jọ no. Ẹvẹ iyẹrẹ ọ uyoyou uzẹme nọ ọkpako na o dhesẹ via kẹ ọrivẹ riẹ u woma te!
3 Uyoyou Uzẹme O rẹ w’Omai Ta Usiuwoma: Ahwo nọ a bi ru iruo ọkobaro ubroke gbe oke-kpobi na a bi ghine dhesẹ uyoyou uzẹme kẹ Ọghẹnẹ gbe ọrivẹ. Ekobaro i bi siobọno oke gbe ogaga rai ẹsikpobi re a fiobọhọ kẹ amọfa evaọ abọ-ẹzi. Kọ eme ọ be wọ ae ru onana? Ọkobaro jọ ọ ta nọ: “Mẹ riẹ nọ uyoyou yọ ubi ẹzi Ọghẹnẹ jọ. Fikiere ababọ riẹ, mẹ rẹ sae jọ ukoko na vievie he, yọ mẹ rẹ kparobọ wọhọ ọkobaro ho. Uyoyou o rẹ lẹliẹ omẹ wo ọdawẹ kẹ ahwo, riẹ kpahe ẹgwọlọ rai, yọ o were omẹ eva inọ ahwo a rẹ kuyo kẹ uyoyou.” Jesu o dhesẹ oghẹrẹ uyoyou utioye kẹ ahwo. Okejọ nọ tei te ilele riẹ nọ oma o rrọ no a je kpohọ oria jọ re a “serihọ omojọ,” ogbotu na a tẹ kake rehọ ai t’obei. Kọ eme Jesu o ru? Nọ ‘ohrọ rai o riẹ e,’ ọ tẹ nya siọ ẹgwọlọ omobọ riẹ ba re ọ ruẹsi ‘wuhrẹ ai eware buobu.’—Mak 6:30-34.
4 Ahwo a tẹ make se emamọ usi nọ ma be vuẹ na, ma re wo oghọghọ ob’eva, ma tẹ riẹ nnọ uyoyou o w’omai na, ma dao utho ẹgba mai no re ma fiobọhọ kẹ ai wo esiwo. Okenọ Kristi o ti gu omai ẹdhọ evaọ ukuhọ riẹ, eva e te were omai gaga inọ ma dhesẹ uyoyou uzẹme ẹkwoma ‘iruo mai nọ ma ru gbunu.’—2 Tim. 4:5.