Bọ Ẹruore Uzuazọ Ebẹdẹ Bẹdẹ na Fihọ Amọfa
1 Dede nọ ohwo-akpọ ọ gwọlọ idhere nọ ọ gbẹ rọ kake who ho je ru etoke uzuazọ thethei no, a te sae whaha owho gbe uwhu ghele he. Ẹvẹ ma vọ avọ uyere te inọ Ebaibol na o dhesẹ oware nọ ohwo-akpọ ọ jẹ be who je whu, gbe oghẹrẹ nọ a ti ro si uye owho gbe uwhu n’otọ. A dhesẹ izẹme enana vevẹ evaọ obe na Eriariẹ Nọ I Re Su Kpohọ Uzuazọ Ebẹdẹ Bẹdẹ. Obe na o k’iyo enọ idhọvẹ kpahe uzuazọ gbe uwhu vevẹ, be kpọ ọnọ o bi sei na kpohọ oke nọ a ti ro zihe Aparadase tha.
2 Evaọ March ma ti fi obe Eriariẹ na họ ada avọ ute emuhọ ebe iwuhrẹ Ebaibol. (Mat. 28:19, 20) Kẹsena ma ve zihe bru ahwo kpobi nọ a dhesẹ isiuru kẹ ovuẹ Uvie na. Evaọ edhere ọnana ma sae rọ bọ ẹruore uzuazọ ebẹdẹ bẹdẹ na fihọ amọfa. (Taitọs 1:2) Re whọ sai ru onana, ẹsejọhọ iroro ejẹ nọ e rọ ob’otọ na e sai fiobọhọ k’owhẹ.
3 Nọ who te bi ru iweze ọsosuọ na, whọ sae nọ onọ onana:
◼ “Kọ who roro no ẹdẹjọ kpahe oware nọ ahwo a je wo isiuru kẹ uzuazọ uthethei? [Kuvẹ kẹ uyo.] Ahwo ọ Buddha, Ileleikristi, ahwo ọ Hindu, ahwo Muslim, gbe amọfa aikpobi a wo ẹruore uzuazọ evaọ uwhu.” Rovie obe Eriariẹ na kpohọ uzou avọ 6, “Fikieme Ma Jẹ Be Rro Kpako je Whu?,” je se edhe-ẹme avọ 3. J’iroro kpahe ikereakere nọ a fodẹ na. Nọ whọ tẹ be ta kpahe enọ ivẹ urere edhe-ẹme na, nọ ohwo nọ o wo uwou na sọ ọ gwọlọ duku iyo na k’omobọ riẹ. U te si ei urru, whọ vẹ gbẹ t’ẹme kpahe umutho idhe-ẹme nọ e kẹle riẹ na. Uwuhrẹ u muhọ no! Ogbẹrọ ere he, who ve fi obe na họ ada kẹe evaọ azọhọ riẹ na re o sei, jẹ m’oma re who zihe, oware wọhọ ẹdẹ ọvo hayo ivẹ, re whọ k’iyo na.
4 Nọ who te bi ru ozihebro ọ obe “Eriariẹ” nọ who fihọ ada, whọ sae ta nọ:
◼ “Me zihe ze re ma t’ẹme kpahe enọ ivẹ kpahe uwhu nọ ma nọ fihọ otọ ẹdẹ na.” Kareghẹhọ ohwo na kpahe enọ na. Whọ vẹ t’ẹme nọ ọ rọ uzou avọ 6 na evaọ otọ uzoẹme-osese ọ “Ẹguae-Oyoma Idhere” na. Wọhọ epanọ uyero na o rọ, gbe ru uwuhrẹ na haro hayo rehọ onọ urere nọ o rọ oka ọ edhe-ẹme avọ 7 na ro ru otọhotọ kẹ abọ nọ o kiọkọ na. Fodẹ ẹdẹ nọ who ti ro zihe. Rehọ obe-uzizie kẹ ohwo na, who ve dhesẹ oghẹrẹ nọ a re ru iwuhrẹ ukoko na kẹe kpẹkpẹe. Rọ oma osasa zizie iei re ọ nya.
5 Evaọ iruo ọ n’uwou ruọ uwou na hayo isẹri-ise ọnyakuo, whọ sae rọ enẹ muọ ẹmeọta họ:
◼ “Kọ who roro no ẹdẹjọ kpahe oware nọ obaro na o te wha se omai gbe otọakpọ na? [Kuvẹ kẹ uyo.] Ebaibol na o dhesẹ obaro na evaọ ẹme ọvo jọ—Aparadase! U dhesẹ nnọ evaọ emuhọ, Ọghẹnẹ o ru abọ jọ akpọ na fihọ aparadase owoma nọ o fi imava-orọo nọ ọ ma na họ. A re yẹ otọakpọ na vọ, rehọ ẹmẹrera nwene iei fihọ aparadase. Muẹrohọ idhesadhesẹ nana ọrọ epanọ o hae jọ.” Rovie obe Eriariẹ na kpohọ ẹwẹ-obe avọ 8, je se edhe-ẹme avọ 9, eva otọ uzoẹme-osese ọ “Uzuazọ Evaọ Aparadase” na. Kẹsena whọ vẹ ta kpahe eme nọ e rọ edhe-ẹme avọ 10 na, je se ikere nọ a fodẹ na, Aizaya 55:10, 11. Ta kẹe nọ wha te t’ẹme na haro okiofa kpahe epanọ uzuazọ o te jọ evaọ Aparadase nọ a ti zihe ze na je se edhe-ẹme avọ 11-16 kugbe. Hayo tudu họ ohwo na awọ re o sei k’omobọ riẹ, whọ vẹ m’oma re whọ wariẹ zihe re wha t’ẹme na.
6 Otẹrọnọ who muọ ewuhrẹ họ evaọ iweze ọsosuọ na ha, whọ rẹ sae daoma ru ere evaọ ozihebro na ta nọ:
◼ “Wọhọ epanọ ma ta oke ẹdẹ, o rọ ẹjiroro Ọghẹnẹ inọ otọakpọ na soso u nwene fihọ aparadase. Oyena o wha onọ na ze inọ, Oghẹrẹ vẹ Aparadase ọ te jọ?” Rovie obe Eriariẹ na kpohọ uzou 1, wha ve wuhrẹ edhe-ẹme avọ 11-16, eva otọ uzoẹme-osese ọ “Uzuazọ Evaọ Aparadase nọ A Zihe Ze” na. Who ve dhesẹ uwoho nọ o rọ ẹwẹ-obe avọ 4-5 na kẹe, jẹ nọ ohwo na sọ ọ gwọlọ rria evaọ ikegbe iwoma itieye na. Kẹsena who ve se uhie-ẹme ọsosuọ ọrọ edhe-ẹme avọ 17 eva ẹwẹ-obe avọ 10 na. Wọhọ epanọ uyero na o rọ, who ve gbe ru uwuhrẹ na haro hayo whọ vẹ ta nọ evaọ iweze ọfa ra who ti dhesẹ oware nọ o gwọlọ re ohwo ọ sae rria evaọ Aparadase nọ a zihe ze. Kẹe obe-uzizie, dhesẹ oma ọ iwuhrẹ na vevẹ, jẹ rehọ oma osasa zizie ohwo na re o kpohọ Ọgwa Uvie na.
7 Obe Eriariẹ na yọ obọdẹ okwakwa nọ a re ro dhesẹ “uzuazọ ebẹdẹ bẹdẹ” nọ Ọghẹnẹ ọ y’eyaa riẹ na via kẹ amọfa. Eruo ebe iwuhrẹ Ebaibol kugbe ahwo o rẹ sae bọ ẹruore ogbunu ọnana fihọ ae, onọ Ọghẹnẹ “nọ ọ rẹ [ta ọrue] he” ọ rẹ kẹ.