Ẹvẹ U Woma Te re A Hae Jariẹ Ẹsikpobi!
1 Evaọ ikpe buobu evaọ Ovatha-Ọre Europe, a whaha inievo eghaghae mai buobu no iwuhrẹ ẹgbede. Roro oghọghọ rai evaọ okenọ a si awhaha na no a tẹ sae wariẹ kuomagbe evaọ ufuoma!
2 Rọ kpahe iweze riẹ kpohọ ukoko utioye jọ, ọsẹro okogho jọ o kere nọ: “Evaọ owọwọ Edivẹ-Oka, nwanọ evaọ emuhọ iweze mẹ na, ekwakwa ẹroro e tẹ siọ iruo ba. Evaọ obọ otafe, oria kpobi u re dhedhẹ kpoi, yọ evaọ obeva, ẹroro na ọ rọ 5 degrees Celsius ọvo. Inievo na a keria avọ ikotu rai nọ a kuhọ, okpa nọ a rọ variẹ uriohọ, emehọ nọ a re dh’abọ họ, itu, gbe eviẹ. Uvumọ ohwo ọ be sai rovie Ebaibol riẹ hẹ, keme o jọ bẹbẹ re a rovie ei. Nọ me dikihẹ eplatfọmo avọ ukotu nọ me fihọ, oma mẹ u dhẹmu no kpoi, oke kpobi nọ mẹ t’ẹme, mẹ vẹ ruẹ eri unu mẹ. Rekọ oware nọ u si omẹ urru họ uvumọ ohwo o gu unoma ha. Inievo na kpobi a ta nọ uwoma hrọ nọ a rọ jariẹ!” O tubẹ jọ iroro inievo eyena re ewuhrẹ ọyena o vo ai hi!
3 Kọ Ere O r’Owhẹ Oma? Kọ ma bi riwi uvẹ omakokohọ odode evaọ iwuhrẹ ẹkpoka mai na ghaghae? Hayo kọ ma bi rri iwuhrẹ na vo evaọ okenọ eware i te kiehọ? Iwuhrẹ nọ ma re kpohọ ẹsikpobi o rẹ sae jọ lọlọhọ họ, yọ ẹsejọ ma re wo iroro egbagba nọ ma rẹ rọ seba. Dede na, jọ o thọrọ omai ẹro ho inọ ahwo jọ a rọ udevie mai na nọ, ghelọ owho, eyao egaga, omaa iruo egaga, gbe ewha-iruo egaga efa a be ruẹ epanọ iwuhrẹ na e r’oja te yọ a rẹ jariẹ enwenọ ẹsikpobi. Ẹvẹ enana e rọ iriruo iwoma te k’omai nọ ma rẹ raro kele!—Wawo Luk 2:37.
4 Joma ru ei fihọ uruemu mai re ma tha egagọ uzẹme uke ẹkwoma ekpohọ iwuhrẹ Ileleikristi mai kpobi, no utu obe uwuhrẹ osese rite okokohọ ologbo. Fikieme ma je se ekpohọ omakokohọ enana gboja tere? Keme na o rọ uzi Ọghẹnẹ inọ ma kokomahọ. Rekọ ẹjiroro efa nọ i w’uzou e riẹ. Mai kpobi ma gwọlọ irere ọ uthubro Ọghẹnẹ gbe obufihọ ẹzi ọfuafo na, nọ a re wo evaọ obọ iwuhrẹ na. (Mat. 18:20) Ma re wo ọbọga no uduotahawọ ohwohwo ze evaọ okenọ ma te bi kuomagbe inievo mai na.—Hib. 10:24, 25.
5 Evaọ oke ẹrẹriẹ na, Pita ọ ta nọ: “Owuhrẹ, u woma re ma jọ etenẹ.” (Luk 9:33) U fo re ma wo iroro evo na kpahe iwuhrẹ Ileleikristi mai kpobi. Ghinọ uzẹme, ẹvẹ u woma te re ma hae jariẹ ẹsikpobi!