Iweze nọ O rẹ Sae Jọ Oghale
1 Avọ oghọghọ Zakiọs o ro dede Jesu wọhọ ọrara evaọ uwou riẹ. Kọ ẹvẹ oghale nọ iweze yena o wha ze o rro te!—Luk 19:2-9.
2 Nẹnẹ na, wọhọ Ọnowuzou ukoko na, Jesu Kristi ọ be kpọ ekpako na re a “sẹro uthuru Ọghẹnẹ.” (1 Pita 5:2, 3; Jọn 21:15-17) Fiba ewuhrẹ eva obọ iwuhrẹ gbe usiuwoma nọ a rẹ k’obaro riẹ, esẹro ukoko na a rẹ rọ uketha uyoyou, orọ udu-ob’ọrai kẹ ahwo nọ a rọ ukoko na. Fikiere, n’oke ruoke, who rẹ sai rẹro ẹruọsa no obọ ekpako na ze, evaọ obọ uwou ra, evaọ obọ Ọgwa Uvie na, okenọ wha tẹ rọ usu evaọ usiuwoma, hayo evaọ oke ofa. Kọ u fo re ozọ iweze ekpako na u mu owhẹ? Vievie. Nọ a tẹ nya bru owhẹ ze orọnikọ u dhesẹ nọ who kie kpemu evaọ edhere jọ họ. Kọ otẹrọ ere, eme họ ẹjiroro iweze ẹruorote?
3 Pọl ọ ta nọ ọ gwọlọ weze bru inievo na re ‘ọ riẹ epanọ a rọ.’ (Iruẹru 15:36) Ẹhẹ, wọhọ ithuru-igodẹ iyoyou, ekpako na a wo isiuru gaga kpahe oghẹrẹ nọ whọ rrọ. A gwọlọ kẹ uketha abọ-ẹzi nọ o rẹ sae jọ obufihọ gbe ọbọga k’owhẹ. Oghẹrẹ ẹruọsa otiọye na họ oware nọ Othuru-Igodẹ oyoyou mai Jihova ọ gwọlọ nọ mai omomọvo o re wo.—Izik. 34:11.
4 Dede Iweze Ekpako na Rehọ: Ute Pọl evaọ eweze bru inievo riẹ họ re ọ ‘ruẹse ghale okẹ Ẹzi Ẹri na kẹ ae re ọ ruẹsi ru ai ga rite urere; a ve je wo omosasọ kugbe.’ (Rom 1:11, 12) Mai kpobi ma gwọlọ uduotahawọ abọ-ẹzi evaọ edẹ urere ebẹbẹ nana, yọ ma gwọlọ obufihọ re ma gbẹ jọ gaga evaọ ẹrọwọ na. Ababọ avro, emamọ uruemu ra kẹ iweze ẹruorote o te wha obọdẹ uduotahawọ ohwohwo ze.
5 Dhesẹ ovuhumuo kẹ irere buobu nọ a re wo no iruo iweze ekpako na ze. Otẹrọnọ ẹme hayo onọ jọ o rọ owhẹ udu, kareghẹhọ nnọ ekpako na a rọ ukoko na re a fiobọhọ. T’ẹme kpobi nọ o bi kpomahọ ewoma abọ-ẹzi ra kẹ ae ababọ okioraha. Dhesẹ ovuhumuo kẹ ọruẹrẹfihọ oyoyou Jihova nana, jẹ ghọghọ evaọ eghale nọ iweze itieye na e rẹ sae wha ze.