A rẹ Sae Ruẹ nnọ Ma Wo Ohẹriẹ
1 Evaọ ukpe n’ukpo, ahwo ọkpokpọ nọ a kuomagbe omai ẹkwoma ame-ọhọ a bu vi 300,000. Eme ahwo nana a ruẹ evaọ oma ọ Isẹri Jihova nọ a rọ gwọlọ jọ abọ ukoko Ọghẹnẹ? Fikieme ma je wo ohẹriẹ no egagọ efa kpobi? Iyo ivevẹ jọ ena:
—Ma be nya lele Ebaibol na orọnikọ ẹjiroro obọ mai hi: Ma be gọ Jihova Ọghẹnẹ avọ “ẹzi gbe uzẹme,” wọhọ epanọ Jesu Kristi ọ ta nọ ma ru. Onana o gwọlọ ẹsiọ erue egagọ gbe ẹria lele Ẹme Ọghẹnẹ nọ a kere.—Jọn 4:23, 24; 2 Tim. 3:15-17.
—Ma rẹ nyabru ahwo viukpenọ ma rẹ hẹrẹ nnọ a nyabru omai ze: Ma jẹ iruo usiuwoma ota gbe ewuhrẹ nọ Kristi ọ k’omai rehọ no, yọ ma be rọ aro kele oriruo riẹ evaọ ẹkiẹvia ahwo udu oruọzewọ. Ma rẹ gwọlọ ai evaọ obọ iwou rai, evaọ iyẹrẹ, hayo oria kpobi nọ a jẹ sai duku ai.—Mat. 9:35; 10:11; 28:19, 20; Iruẹru 10:42.
—Ma rẹ rehọ ithubro Ebaibol k’ahwo kpobi ababọ ugho: Ma bi siobọno ekwakwa gbe ẹgba mai ọvọvẹ, be raha euwa nọ i bu vi ima-odu kukpe kukpe kẹ iruo Ọghẹnẹ. Ababọ ọriẹwẹ, ma bi wuhrẹ Ebaibol na kugbe oghẹrẹ ahwo kpobi.—Mat. 10:8; Iruẹru 10:34, 35; Evia. 22:17.
—A wuhrẹ omai ziezi re ma fiobọhọ kẹ ahwo evaọ abọ-ẹzi: Ẹkwoma uwuhrẹ omobọ mai orọ Ebaibol na gbe ithubro nọ a be kẹ eva iwuhrẹ ukoko, ikokohọ esese gbe ilogbo, a be k’omai uwuhrẹ oghaghae ọ Ọghẹnẹ nọ u rre re he, onọ o rẹ lẹliẹ omai kẹ amọfa otoriẹ abọ-ẹzi.—Aiz. 54:13; 2 Tim. 2:15; 1 Pita 3:15.
—Ma se uzẹme na gboja, bi fi ei họ iruo evaọ izuazọ ekẹdẹ kẹdẹ mai: Fiki uyoyou mai kẹ Ọghẹnẹ, ma bi ru inwene, ru izuazọ mai rọwokugbe oreva riẹ. Uruemu okpokpọ mai nọ o wọhọ orọ Kristi u bi si amọfa ziọ uzẹme na.—Kọl. 3:9, 10; Jem. 1:22, 25; 1 Jọn 5:3.
—Ma be daoma rria je ruiruo kugbe amọfa evaọ udhedhẹ: Ekwakwa Ọghẹnẹ i re fiobọhọ k’omai sẹro uruemu gbe ẹmeọta mai. Ma rẹ ‘gwọlọ udhedhẹ je lei’ kugbe ahwo kpobi.—1 Pita 3:10, 11; Ẹf. 4:1-3.
2 Iriruo uzuazọ Oleleikristi nọ ahwo a be ruẹ evaọ ukoko Jihova o be wọ ahwo buobu re a jẹ uzẹme na rehọ. Jọ oriruo mai o wo okpomahọ ọvona evaọ oma ahwo nọ a riẹ omai jẹ be ruẹ omai.