Emuhọ Iwuhrẹ Evaọ Ibroshọ Gwọlọ Na
1 Iyẹrẹ nọ i bi no akpọ na soso ze i dhesẹ nnọ ibroshọ Eme Ọghẹnẹ Ọ Gwọlọ Mi Omai? na yọ obọdẹ okwakwa nọ a re ro wuhrẹ ahwo uzẹme na. Iwuhrẹ Ebaibol nọ a bi muhọ evaọ k’oka k’oka evaọ ibroshọ nana i bu te idu buobu. Kọ who bi wo obokparọ evaọ emuhọ gbe ewuhrẹ ọ uwuhrẹ Ebaibol evaọ ibroshọ Gwọlọ na?
2 Nọ o rẹ jọ lọlọhọ k’ahwo buobu re a fi ibroshọ na họ ada na, o rẹ jọ bẹbẹ k’ahwo jọ re a riẹ ẹme nọ a rẹ ta ro muọ uwuhrẹ na họ. Didi edhere amọfa jọ a ruẹ nọ u ruiruo no evaọ emuhọ iwuhrẹ Ebaibol ẹkwoma ibroshọ Gwọlọ na? Ẹjiroro enana e sai fiobọhọ.
3 Fodẹ nọ Whọ Gwọlọ Dhesẹ Uwuhrẹ Na: Okenọ ma tẹ rọ iweze ọsosuọ hayo ozihebro, ukpenọ ma rẹ fodẹ uwuhrẹ Ebaibol kẹ ọnọ o wo uwou gheghe, ma rẹ sai ru odhesẹvia epanọ uwuhrẹ Ebaibol na o rẹ jọ. Onana u ti si ebi gbe awa nọ enọ i wo iwou a re wo kpahe ubiẹme na “uwuhrẹ.” Nọ ma tẹ riẹ epanọ a re ru odhesẹvia na no, ma te ruẹ nọ ẹkwoma emuhọ-ẹme ọlọlọhọ, ma rẹ sae rueva uwuhrẹ na.
4 Omaruẹrẹ-Kpahe Họ Usiavẹ Na: Ọwhọ mai kẹ emuhọ iwuhrẹ Ebaibol u w’obọ kugbe epanọ ma ruẹrẹ oma kpahe te. Oma nọ a rẹ kake ruẹrẹ kpahe u re fiobọhọ k’omai whaha ehoo kpobi nọ ma sai wo evaọ iruo uwuhrẹ Ebaibol na. Ẹkwoma edhere ẹmeọta mai nọ ma re wuhrẹ unuẹse buobu, unu mai u ti muẹme viere, dhesẹ ẹme vevẹ ziezi evaọ eme obọ mai. Orọnikọ onana u ti fiobọhọ k’omai dhomamu ọvo ho rekọ o te jẹ mae lẹliẹ ọnọ o wo uwou na dhomamu re.
5 Nọ who te bi wuhrẹ ẹmeọta ra, u re fiobọhọ re who fi umuo oke họ kẹ ẹme ra na re whọ sae vuẹ ọnọ o wo uwou na epanọ odhesẹvia na o ti kri te. Nọ o dhesẹ oma riẹ no, oniọvo ọmọzae jọ ọ tẹ ta nọ: “Mẹ wẹriẹ ze re me dhesẹ omaa ọ uwuhrẹ Ebaibol ọvọvẹ mai k’owhẹ. O rẹ rehọ ole iminiti isoi re me dhesẹ iẹ k’owhẹ. Kọ who wo uvẹ iminiti isoi?” A rẹ sai dhesẹ Uwuhrẹ 1 orọ ibroshọ Gwọlọ na evaọ ole iminiti isoi. Uzẹme inọ, umutho ikereakere jọ ọvo a rẹ sai se evaọ oke onana, rekọ nọ a te ru uwuhrẹ ọsosuọ na reno evaọ umutho iminiti, ọnọ o wo uwou na ọ rẹ sai wo erere ọ uwuhrẹ ọsosuọ riẹ. Kẹsena whọ vẹ jae riẹ inọ okenọ who te zihe ze kẹ Uwuhrẹ avọ 2, o te rehọ iminiti 15 ọvo.
6 Edhere ẹmeọta enana i ruiruo no: “Mẹ gwọlọ ru odhesẹvia obe uwuhrẹ Ebaibol k’owhẹ, onọ o rrọ lọlọhọ, orọ oke okpẹkpẹ ẹkwoma ibroshọ nana Eme Ọghẹnẹ Ọ Gwọlọ Mi Omai? Ahwo buobu a ruẹ no inọ evaọ umutho iminiti 15 ẹkpoka evaọ eka 16 ọvo, a rẹ sai duku iyo Ikereakere nọ e rẹ v’eva kpahe enọ Ebaibol enana nọ i w’uzou na.” Dhesẹ etehe eme nọ e rrọ eva riẹ kẹe kpẹkpẹ. Rovie kpohọ Uwuhrẹ 1, whọ vẹ ta nọ: “Otẹrọnọ whọ k’ezọ evaọ ole iminiti isoi, ma ti dhesẹ epanọ o rẹ jọ k’owhẹ. Uzoẹme Uwuhrẹ 1 na họ ‘Epanọ Whọ Sai ro Duku Oware nọ Ọghẹnẹ Ọ Gwọlọ.’ ” Who ve se enọ esa na, jẹ f’otọ inọmba nọ a si usi wariẹ họ na kẹe. Se edhe-ẹme 1, je dhesẹ epanọ a rẹ rọ gwọlọ uyo na kẹ ọnọ o wo uwou na. Whọ sae ta kẹ ọnọ o wo uwou na re o se edhe-ẹme avọ 2. Whọ vẹ ta nọ: “Ro no ovuẹ onana ze, ẹvẹ whọ rẹ k’uyo onọ onana? [Wariẹ nọ onọ na, jẹ kẹ ọnọ o wo uwou na uvẹ re ọ kuyo.] Whọ rẹ sai muẹrohọ inọ a fi ikereakere họ edhe-ẹme kpobi. Enana e rẹ kpọ iroro mai kpohọ iyo Ebaibol na kpahe enọ enana. Wọhọ oriruo, joma se 2 Timoti 3:16, 17 re ma ruẹ sọ o rọwo kugbe uyo nọ whọ kẹ na kpahe ohwo nọ o wo eme Ebaibol na.” Nọ who te se edhe-ẹme avọ 3 no, nọ onọ na no, je se Jọn 17:3 no, si iroro ọnọ o wo uwou na kpohọ eriariẹ nọ o wo no ẹkwoma ẹkiẹriwo ọ Uwuhrẹ 1 na. Eva oke onana whọ sai rovie kpohọ Uwuhrẹ avọ 2 who ve se onọ urere na, “Idhere ivẹ e vẹ ma sai ro wuhrẹ kpahe Ọghẹnẹ?” Whọ vẹ nọ inọ: “Kọ okevẹ who ti wo ole iminiti 15 re ma sai wuhrẹ Uwuhrẹ avọ 2 nọ ma je ti duku uyo na?”
7 O r’oja re who ru ẹmeọta na lọlọhọ yọ oke kpobi nọ o tẹ lọhọ who ve je jiri ọnọ o wo uwou na. Nọ who te bi ru ọruẹrẹfihọ kẹ iweze efa, ukpenọ whọ rẹ nọ ọnọ o wo uwou na sọ ọ gwọlọ wuhrẹ haro, tudu họ iẹ awọ re o lele edhere ọvo na evaọ uwuhrẹ ofa na. Vuẹe nnọ who ti zihe ze. Whọ sae jẹ tudu họ ọmọ-uwuhrẹ na awọ re o fi ibroshọ na họ emamọ oria, oria nọ ọ sae jọ rue riẹ tọlọ ze evaọ iweze efa.
8 Jọ U No Owhẹ Eva Ze: Nọ usiavẹ kẹ obokparọ o rọ omaruẹrẹ-kpahe na, u re no omai eva ze hrọ re ma lele ei te oka. Re a wuhrẹ evaọ umutho iminiti jọ o rẹ sae jọ use-abọ, fikiere jọ u no owhẹ eva ze re who wuhrẹ ẹme nọ whọ te ta unuẹse buobu re o seba ẹjẹhọ evaọ okenọ who ti ru odhesẹvia uwuhrẹ na. Daoma ru odhesẹvia uwuhrẹ kugbe ohwo kpobi nọ whọ ruẹ evaọ isẹri-ise unuẹthẹ hayo ọnọ whọ nyaku. Otẹrọnọ o rọ bẹbẹ k’owhẹ re who muọ uwuhrẹ Ebaibol họ, jọ oma o r’owhẹ hẹ. Obokparọ evaọ emuhọ iwuhrẹ Ebaibol o gwọlọ ọtamuo gbe ẹgwọlọ nọ o n’evaze re a kẹ amọfa uzẹme na.—Gal. 6:9.
9 Ẹkwoma efihiruo iroro-ejẹ enana, whọ sai wo uvẹ ọ obufihọ kẹ ohwo jọ re ọ nya ruọ edhere uzuazọ na, ẹkwoma emuhọ gbe ewuhrẹ ọ uwuhrẹ Ebaibol jọ evaọ ibroshọ Gwọlọ na.—Mat. 7:14.