Dhesẹ Uruemu Ezi nọ O rẹ Kẹ Ọghẹnẹ Orro
1 Evaọ oria kpobi nọ ma rrọ, uruemu, ẹgọ, gbe osẹ mai i re se isẹri kpahe omai gbe Ọghẹnẹ nọ ma be gọ. A rẹ mae ruẹ onana vevẹ eva ikokohọ ilogbo erọ ahwo Ọghẹnẹ, oria nọ ahwo buobu a re jo muẹrohọ omai. Okenọ ma te dhesẹ emamọ oriruo, o rẹ kẹ odẹ Jihova orro. (1 Pita 2:12) Rekọ, ekpehre uruemu hayo owojẹ nọ o kare iroro orọ umutho ahwo jọ o rẹ sae wha ekela se odẹ Ọghẹnẹ gbe ahwo riẹ. (Ọtausi. 9:18b) Ma tẹ kareghẹhọ nọ ahwo obọ otafe a rẹ rehọ uruemu mai gu ukoko mai gbe Ọghẹnẹ nọ ma be gọ ẹdhọ u re ru omai yọrọ oma evaọ ‘eruo eware kpobi rọ kẹ Ọghẹnẹ oruaro.’—1 Kọr. 10:31.
2 Emamọ Uruemu eva Oria nọ Whọ Kpahe: Evaọ ẹsebuobu, ẹkpatiẹ, emamọ uruemu, gbe ẹfuọ Isẹri Jihova e rẹ were enọ i wo ighẹ oma. Ohwo jọ nọ o wo ighẹ, nọ ọ jẹ t’ẹme kpahe iviuwou Isẹri nọ e kpahe uwou riẹ, ọ ta nọ: “Emọ Isẹri Jihova họ emọ nọ e mai woma nọ mẹ ruẹ no! A rẹ sẹ kpatiẹ wọhọ uvi eyae gbe uvi ezae; a rọ wowolẹ, a wo adhẹẹ, je wo emamọ uruemu; a re wha ẹbẹbẹ ọvuọvo ze he. U fo re a ghine jiri owhai fiki izoge rai. Ma reawere emọ rai nọ e jọ etẹnẹ.” A rẹ ruẹ eme wọhọ enana ẹsibuobu keme enọ i bi lele omai ruiruo a rẹ ruẹ uyoyou gbe adhẹẹ nọ e rọ udevie ahwo Jihova.
3 Evaọ abọdekọ riẹ, eme nọ enọ i wo ighẹ efa e ta i dhesẹ nọ ebẹbẹ e gbẹ riẹ kpahe ejọ nọ e rẹ daezọ uruemu rai hi hayo enọ e rẹ rẹrote oria nọ a kpahe na ha. Onana o rẹ wha ebẹbẹ ze o vẹ jẹ lẹliẹ ahwo ta eme iyoma nọ i fo ho kpahe omai. Ejọ nọ i wo ighẹ a be ta nọ emọ gbe izoge na a re ru edo je veghe uzou, yọ esẹ gbe ini rai a vu rai wa.
4 Evaọ ẹsejọ, ahwo jọ a rẹ kpahe ehọtẹle. Ehọtẹle enana buobu i wo izi nọ erara e rẹ nya lele. Inievo jọ e thọ izi enana no ẹkwoma edo oruo hayo emu nọ a rẹ jọ ubrukpẹ rai there. Ahwo nọ a be rẹrote ehọtẹle na a ta k’omai nọ emu othere, evaọ oria nọ a k’uvẹ riẹ hẹ, o be hae raha ekwakwa rai. Orọnikọ o be raha ibrikpẹ na ọvo ho rekọ orre nọ o rẹ kaki noi hi o wha riẹ ze nọ a gbẹ sae haya ibrikpẹ na k’ahwo evaọ edẹ hayo eka jọ họ. A re there emu evaọ ubrukpẹ na ha, ajokpanọ a kuvẹ riẹ.
5 Ma rẹ daoma ziezi re ma yoẹme kẹ enọ i wo ighẹ gbe enọ e be rẹrote ehọtẹle na. Uzẹme, ma gwọlọ re ahwo a rehọ ekpehre ubiẹro rri ahwo Jihova ha. Wọhọ Ileleikristi ma rẹ jọ avọ oruọzewọ hrọ eva ẹsikpobi. Ma re keke aro fihọ rehọ ekwakwa amọfa no oria nọ ma kpahe na ababọ uvẹ-umio ho, keme oyena yọ uji-utho; yọ ma rẹ t’ọrue he evaọ okenọ ma tẹ be niyẹrẹ ekwakwa nọ e raha eva oria nọ ma kpahe na.
6 Emamọ Uruemu eva Okokohọ Na: Makọ oghẹrẹ oria nọ a jọ ru ei kpobi kẹhẹ, a re rri rie wọhọ Ọgwa Uvie ologbo eva etoke okokohọ na. Ma rẹ gọ emamọ ẹgọ jẹ sẹ ziezi wọhọ epanọ o rẹ jọ evaọ okenọ ma bi kpohọ iwuhrẹ ukoko mai. Te etoke nọ abọ okokohọ na jọ ọ tẹ be nyaharo gbe oke nọ o te kuhọ no, inievo emezae avọ emetẹ a rẹ gọ ekpehre ẹgọ họ, onọ u re dhesẹ ẹzi akpọ na je ru ei bẹbẹ re a vuhu omai mu wọhọ ahwo nọ a wo ohẹriẹ. Inievo emetẹ e rẹ yọroma hrọ re oghẹrẹ gbe uthethei eskẹte gbe iwu rai e jọ enọ e rọ kpatiẹ. (1 Tim. 2:9, 10) O tẹ make rọnọ ma rọ okokohọ na, oria nọ ma kpahe, be riemu evaọ ehọtẹle, hayo ma be dẹ eware evaọ uwou-eki, ma rẹ rehọ oke kpobi dhesẹ nọ mai yọ egbodibo Ọghẹnẹ, ababọ ezoruẹ nọ ma rẹ wha ze.—2 Kọr. 6:3.
7 Ame-ọhọ na ọ te jọ evaọ ohiohiẹ Ẹdẹ-Ọmaha ọrọ okokohọ na. Uwou-Eroro ọ April 1, 1995 (ọrọ Oyibo), ẹwẹ-obe avọ 30, u dhesẹ uruemu nọ ma re dhesẹ evaọ etoke ọyena. O ta nọ ma “re rri ame-ọhọ avọ osegboja ọgaga. O rọ oke nọ a re ro duola ha, oke ehaa iruo, hayo orọ edo. Dede na orọnikọ o rrọ oke ova-umuhọ hayo abọ-oromuoma ha.” U re fo ho re enọ e be họ-ame na a ku iwu nọ a rẹ ruẹ lafi họ, makọ ezae hayo eyae. Fikiere, ahwo kpobi a re dhesẹ aghare gbe oghọghọ ame-ọhọ Ileleikristi na via.
8 Pita ọ kareghẹhọ omai ‘oghẹrẹ ahwo nọ ma rẹ jọ eva uzuazọ ẹfuọ gbe orọ Ọghẹnẹ.’ (2 Pita 3:11) Jọ eme gbe owojẹ mai eva Okokohọ Ubrotọ “Enọ I Bi Ru Ẹme Ọghẹnẹ” na i fiobọhọ kẹ iriughe udu-oruọzewọ re a riẹ jẹ gọ Ọghẹnẹ ologbo mai, ọnọ o te kẹ ọghọ gbe orro kpobi na.—1 Kọr. 14:24, 25.