Ru Ewoma re A Jiri Owhẹ!

¹ “A wo ẹwolẹ jọ evaọ udevie rai nọ mẹ te ruẹ evaọ udevie amọfa ha.” “O rrọ omawere re ma wo ẹko ahwo nana.” Enana yọ iriruo erọ emamọ eme nọ iriughe e ta kpahe omai nọ ma ru okokohọ ubrotọ ukpe n’ukpo no, nọ u fiẹgba họ emamọ uruemu nọ ma wo wọhọ ukoko. (Itẹ 27:2; 1 Kọr. 4:9) Maero, ujiro utioye na o rẹ nyabru Jihova. (Mat. 5:16) Uvẹ obọdẹ ofa nọ ma re ro jiri Ọghẹnẹ u rovie fihọ k’omai no evaọ Okokohọ Ubrotọ “Otu-Iwuhrẹ Ẹme Ọghẹnẹ” ọrọ en’ukpe ọnana.

² K’ukpe k’ukpe ma re wo ekareghẹhọ ẹwo kpahe uruemu nọ u fo evaọ obọ okokohọ na. Fikieme? Keme nọ uruemu gbe ẹgọ akpọ na o bi dhe eyeyoma na, ma se nọ ma rẹ raro kele uruemu rai. Ma gwọlọ gbe emamọ uruemu mai ku hu. (Ẹf. 2:2; 4:17) J’oma fi unuovẹvẹ obotọ na h’iroro.

³ Ru Ewoma—Eva Iwou gbe Ehọtẹle nọ Ma Wohọ: A riẹ omai wọhọ ahwo oruọzewọ. (Hib. 13:18) Fikiere, ma re there emu evaọ ubruwou na ha otẹrọnọ a kuvẹ kẹ onana ha. Ọga ehọtẹle jọ ọ ta nọ o ru unuigho ibruwou kpotọ kẹ Isẹri Jihova keme ọ riẹ nọ a te rẹrote ekwakwa na ziezi. Evaọ uzẹme ma rẹ rehọ eware nọ e rrọ emai hi no uwou hayo ehọtẹle nọ ma wohọ na ha. Ukpoye, dhesẹ ovuhumuo kẹ iruo nọ a ru k’owhẹ. Je dhesẹ adhẹẹ gbe odiri ẹsikpobi evaọ eyerikugbe amọfa nọ a rọ uwou nọ who wohọ na.

⁴ O rẹ were iriughe evaọ okenọ a tẹ ruẹ emoha mai nọ i bi dhesẹ uruemu uwowolẹ gbe orọ ẹmeoyo. (Ẹf. 6:1, 2) Eyewọ, iviena wha kpọ emọ rai re a siọ amọfa ba ekpokpo. Ohwo kpobi ọ rẹ whaha ẹthẹ osigbe gaga hayo edo oruo, maero evaọ aso.

⁵ Ru Ewoma—Eva Oria Okokohọ Na: Ma muẹrohọ no inọ ahwo jọ nọ a rọ okokohọ na a re yoẹme kẹ eruẹrẹahwohọ họ, a rẹ tubẹ t’ẹme kẹ ae evaọ edhere nọ o kiehọ uruemu Oleleikristi hi. Fikinọ a nya lele uthubro inievo na ha a jẹ dhẹ imoto fihọ oria nọ a k’uvẹ riẹ hẹ, onana u di edhere no. Evaọ uzẹme, uruemu ọ mẹ-rẹ-karo u re dhesẹ ohwo wọhọ ọnọ o bi ru ewoma ha, yọ o rẹ wha ajiri se Jihova Ọghẹnẹ hẹ. Fikiere j’oma dhesẹ uyoyou, odiri, gbe ẹmeoyo.—Gal. 5:22, 23, 25.

⁶ Nọ a jiroro nọ ma wha emuore ovovori mai ze nọ ma rẹ re evaọ oke uvo na, u fo ho re ma re emu ọgbẹgbẹdẹ nọ ọ rẹ sae lẹliẹ omai wezẹ evaọ okenọ abọ uvo na ọ tẹ be nyaharo. Onana u re dhesẹ ababọ ovuhumuo kẹ etoke obọdẹ otiọye na.

⁷ Ru Ewoma—Ẹkwoma Ẹgọ gbe Osẹ Mai: Nọ a ru okokohọ ubrotọ ukpe n’ukpo na jọ no, okere obe-usi okpẹwho ologbo jọ o kere nọ: “Vi eware kpobi, uruemu Isẹri na omarai họ oware nọ o mai kpomahọ omẹ. Ẹvẹ o rọ omosasọ te re a ruẹ ahwo buobu nọ a mu-ọghọ gbe adhẹẹ k’oma rai enẹ. Avọ ẹgọ rai nọ ọ mai woma kpaobọ, iviuwou udhusoi buobu nọ i no uyẹ gbe erua kpobi ze a bi zurie rueva ọgwa na ababọ edo. Uruemu rai u wo ohẹriẹ gaga no orọ ogbotu buobu nọ e rẹ nya kpohọ ọgwa ọyena. Evaọ uzẹme, Isẹri na i wo ohẹriẹ no ogbotu buobu jọ gaga. O rọ oware nọ o d’eria kpobi fia re a ruẹ uruemu orivo evaọ ẹgbede. . . . Evaọ uzẹme, ogbotu Isẹri na a rẹ kẹ omosasọ.” Ma rẹ kuvẹ vievie he re ẹgọ gbe osẹ mai hayo uruemu mai u si iroro ahwo no uyero abọ-ẹzi okokohọ na evaọ oghẹrẹ jọ.—Fil. 1:10; 1 Tim. 2:9, 10.

⁸ Ru Ewoma—Eva Etoke Ame-Ọhọ Na: Enọ e be te họ-ame na a re ru etoke nana wọhọ ọrọ ọghọ nọ ọ mae rro kpobi. Ẹwhẹhọ ẹgọ nọ ọ rọ kpatiẹ u re dhesẹ ovuhumuo kẹ ẹfuọ etoke na. O te mae kẹ erere re iwuhrẹ ọ obe uwuhrẹ Ebaibol a kiẹ “Enọ Ahwo nọ A s’Ebe” nọ o rọ ukere ọ Uwou-Eroro Na ọrọ April 1, 1995 (ọrọ Oyibo), riwi kugbe emọ-uwuhrẹ rai taure a te kpohọ okokohọ na.

⁹ Oma-ọghọ gbe uruemu ohwo Ọghẹnẹ mai u re se isẹri kpahe ẹrọwọ Oleleikristi mai yọ u re ru ei lọhọ kẹ ahwo udu oruọzewọ re a vuhu uzẹme na mu. Fikiere, j’oma ruabọhọ ‘ewoma oruo’ re a jiri omai nọ ma ti kpohọ Okokohọ Ubrotọ “Otu-Iwuhrẹ Ẹme Ọghẹnẹ” na.—Rom 13:3.