Okokohọ Edesa nọ Ma Te Jọ Wo Omosasọ Abọ-Ẹzi
1. Eme ma ti wo no okokohọ ubrotọ ukpe nana ze?
1 Evaọ akpọ Setan nana nọ uruame abọ-ezi u bi jo kpe ahwo na, Jihova ọ be kẹ idibo riẹ ame nọ ọ be kẹ ae omosasọ. (Aiz. 58:11) Edhere jọ nọ Jihova o bi ro ru omai oma ga họ okokohọ ubrotọ. Nọ okokohọ ubrotọ ukpe nana ọ be kẹle na, ẹvẹ ma sae rọ thoma kpahe re ma sae jariẹ wo omosasọ, ma vẹ jẹ sasa amọfa oma re?—Itẹ 21:5.
2. Eme u fo nọ ma rẹ ruẹrẹhọ enẹna?
2 Jọ enẹna mu ọruẹrẹfihotọ họ eru re whọ sae jọ okokohọ na evaọ edesa na kpobi. Re whọ kaki te ọgwa okokohọ na jẹ gwọlọ oria nọ whọ te keria re a te ti muhọ, kọ whọ riẹ oke nọ whọ te hae rọ ruọ edhere no? Ma gwọlọ nọ abọ ọvuọvo ọrọ emu abọ-ẹzi obọdẹ nọ Jihova ọ ruẹrẹ họ kẹ omai na o vrẹ omai hi! (Aiz. 65:13, 14) Kọ who ru ọruẹrẹfihotọ oria nọ who ti wohọ gbe epanọ who ti ro te obei no?
3. Eware jọ vẹ te omai te uviuwou mai ma re ru re ma wo erere no okokohọ na ze ziezi?
3 Eme whọ sai ru re iroro ra e siọ eware efa ba ekpohọ nọ a te bi ru ẹme? O tẹ lọhọ, wezẹ ziezi evaọ aso edẹ nọ wha te jọ okokohọ na. Tẹrovi oruẹme na kiọkiọkiọ. Rovie ikere kpobi nọ oruẹme na o bi se. Kere eme jọ fihotọ. U fo re iviuwou a keria kugbe re esẹgbini a sai fi obọ họ kẹ emọ rai gaviezọ ziezi. (Itẹ 29:15) Evaọ owọwọ kpobi, uviuwou o rẹ sae ta ẹme kpahe eme nọ a yo. Re uviuwou rai o gbe wo erere nọ wha te no okokohọ na kpozi no, wha sae rehọ abọjọ oke Egagọ Uviuwou rai rọ ta kpahe igogo-eme jọ nọ wha rẹ sai fihọ iruo evaọ uviuwou na.
4. Ẹvẹ ma sai ro fi obọ họ kẹ amọfa evaọ ukoko mai re a kpohọ okokohọ na?
4 Fi Obọ Họ kẹ Amọfa Wo Omosasọ: Ma gwọlọ nọ amọfa a wo omosasọ no okokohọ na ze re. Kọ iwhowho-uvie nọ e kpako no hayo amọfa a rrọ ukoko rai nọ e gwọlọ obufihọ re a sai kpohọ okokohọ na? Kọ whọ sai fi obọ họ kẹ ae? (1 Jọn 3:17, 18) Ekpako, maero esẹro utu a rẹ daoma fi obọ họ kẹ iwhowho-uvie itieye na.
5. Ẹvẹ ma te rọ ghale ebe-uzizie okokohọ na? (Rri ẹkpẹti nọ ọ rrọ obehru na re.)
5 Wọhọ epaọ anwẹdẹ, eka esa taure okokohọ na o te ti te, ma ti zizie ahwo re a kpohọ okokohọ na. Ikoko kpobi a rẹ ghale ebe-uzizie rai reno jẹ ghale ae evaọ ekwotọ rai kpobi nọ o tẹ lọhọ. Rekọ, otẹrọnọ uviuwou ra o ghale enọ a kẹ rai re he, wha whae ziọ okokohọ na re wha rehọ ae zizie ahwo nọ wha te nyaku. A te jọ okokohọ na kẹ evuẹ efa kpahe onana evaọ Edisoi-Oka. Wha te roro nọ wha te sae rehọ ebe-uzizie nọ i kiọkọ owhai obọ kẹ ahwo re he evaọ ẹwho okokohọ na, wha rẹ rehọ ae kẹ ọruẹrẹahwohọ jọ nọ wha te te okokohọ na. Iviena who re kru ọjọ kẹ oma ra, keme a te ta kẹ owhẹ nọ whọ tọlọ iẹe lahwe evaọ ẹme urere Ẹdoka.
6. Idhere vẹ ma sae rọ jọ obọ okokohọ na dhesẹ emamọ uruemu?
6 Emamọ Uruemu O rẹ Bọ Amọfa Ga: Evaọ oke nana nọ ahwo buobu a jo “you oma-obọrai” yọ a be daezọ oware nọ o rẹ dha amọfa eva ha na, o rẹ kẹ omosasọ kẹhẹ re ma jọ udevie ibe ileleikristi nọ e be daoma dhesẹ emamọ uruemu! (2 Tim. 3:2) Ma re dhesẹ emamọ uruemu ẹkwoma edo gbe ugidi nọ ma re ru hu nọ ma tẹ be rueva je no ọgwa okokohọ na; yọ ahwo nọ ma rẹ rawo eria ẹkeria kẹ ọvo họ, enọ ma gbe no uwou ọvona ze, enọ ma gbẹ ruọ omoto ze, hayo emọ-uwuhrẹ Ebaibol mai. Nọ ohwo-agbara abọ okokohọ na ọ tẹ ta nọ ma kpohọ oria ẹkeria mai re ma gaviezọ kẹ ikporakporo nọ a bi ti kporo, ma re ru ere. Nọ ma te ru ifonu mai oghẹrẹ nọ i gbe ro kpokpo amọfa ha yọ emamọ uruemu. Ma rẹ jẹ whaha ikuigbe, emuọriọ, ifonu nọ ma re ro vi uwou se amọfa, hayo omunya nọ a te bi ruẹme.
7. Ẹvẹ ma sai ro wo omosasọ jẹ sasa amọfa oma nọ ma te jọ kugbe inievo mai na?
7 Omakugbe nọ O rẹ Kẹ Omosasọ: Ikokohọ i re rovie uvẹ kẹ omai ziezi nọ ma rẹ rọ reawere okugbe nọ o rrọ udevie mai. (Ol. 133:1-3) Kọ whọ gbẹ daoma rọ uvẹ yena riẹ inievo nọ i no ikoko efa ze? (2 Kọr. 6:13) Whọ sai fi utee họ inọ o tẹ kawo, kẹdẹ kẹdẹ whọ te daoma riẹ ohwo hayo uviuwou jọ nọ whọ riẹ vẹre he. Ma rẹ sae rehọ oke eriosehọ uvo na ru onana. Fikiere, wha emu ovovori ze nọ whọ rẹ sae re evaọ oke eriosehọ uvo na re whọ sai wo uvẹ ta ẹme kugbe amọfa viukpenọ who re kpobọ otafe nyae dẹ emu re. Whọ sae rọ enẹ mu uvi egbẹnyusu ekpokpọ.
8. Fikieme ma rẹ rọ fialoma via kẹ iruo evaọ okokohọ na, kọ ẹvẹ ma re ro ru onana?
8 Ma te kuomagbe ibe Ileleikristi mai bi ru iruo Ọghẹnẹ, o rẹ were kẹhẹ! Kọ whọ sae fialoma via re who kuomagbe ẹko-iruo jọ hayo lele ukoko ra ru iruo nọ a kẹ owhai? (Ol. 110:3) Otẹrọnọ a dhe iruo ọvo kẹ owhẹ nọ who re ru vẹre he, iviena who te te okokohọ na no, kpohọ oria Ẹko-Iruo Unevaze na. Iruiruo i te bu, u re ru iruo na were oma je vori.
9. Fikieme ma je dhesẹ emamọ uruemu jẹ gọ emamọ ẹgọ evaọ obọ okokohọ na?
9 Emamọ Uruemu Mai U re Duobọte Enọ I bi Rri Omai: Orọnikọ okenọ a bi ruẹme ọvo ma re ro dhesẹ nọ okokohọ ma nyaze he, rekọ evaọ edesa na kpobi. U fo re amọfa nọ i bi rri omai a ruẹ ohẹriẹ ulogbo nọ o rrọ udevie mai avọ egagọ efa. (1 Pita 2:12) Jọ ẹgọ gbe osẹ mai evaọ ọgwa okokohọ na, oria nọ ma wohọ, gbe oria nọ a rẹ jọ dẹ emu re o wha orro se Jihova. (1 Tim. 2:9, 10) Ma tẹ be sa ebaje okokohọ na mu u re ru ahwo riẹ inọ mai yọ Isẹri Jihova. Onana o sai rovie uvẹ fihọ nọ ma rẹ rọ ta kpahe okokohọ na je se isẹri.
10. Eme ma re ru re iruiruo ehọtẹle nọ ma wohọ hayo be jọ dẹ emu re a rehọ emamọ ubiẹro rri okokohọ mai?
10 Ẹvẹ ma sai ro dhesẹ uruemu nọ o rẹ were iruiruo ehọtẹle nọ ma ti wohọ hayo be jọ dẹ emu re? Ma rẹ jọ ehọtẹle rawo ibruwou bu vi enọ ma ginẹ gwọlọ họ, keme onana o rẹ sai ru ei bẹbẹ kẹ inievo efa re a ruẹ iwou, je ru eki kiekpe enọ i wo ehọtẹle na. Ehọtẹle na o te bi zurie okenọ ma ro te etẹe hayo be gwọlọ no eva riẹ, ma re dhesẹ ithihakọ jẹ roma kpotọ ta ẹme. (Kọl. 4:6) Otẹrọnọ o gwọlọ nọ ma rẹ hwosa umugho jọ kẹ enọ i bi ru iruo evaọ ehọtẹle, enọ i lele omai wọ ewha mai, hwere je ririe ubruwou mai gbe eware itieye efa, u fo re ma ru ere.
11. Iriruo vẹ i dhesẹ nọ emamọ uruemu mai u re se isẹri?
11 Ẹvẹ emamọ uruemu mai evaọ okokohọ na u re ro kpomahọ amọfa? Ohwo jọ nọ o wuzou oria nọ a re jo ru ikokohọ ọ ta evaọ obe-awhusi inọ: “Ahwo na a wou uruemu kẹhẹ. Eva rai e rẹ were omai kukpe kukpe nọ a tẹ nyaze.” Ukpe nukpo ẹmẹkpa ugho ohwo jọ nọ a zizie ziọ okokohọ mai o kie vru. Nọ a rehọ iẹe se ọnọ o wuzou ehọtẹle na avọ eware nọ e riẹe eva kọkọ, ọ tẹ ta kẹ ọnọ o wo rie inọ: “Who wou uzou gaga inọ Isẹri Jihova a ziọ okokohọ kẹle etenẹ, yọ ibuobu rai a wohọ ehọtẹle nana. Ogbẹrọ ere he, whọ hae gbẹ rue riẹ hẹ.”
12. Nọ okokohọ na o bi totọ na, eme o rẹ jọ ọtamuo mai, kọ fikieme?
12 Ikokohọ enukpe nana i totọ no. A raha oke ruẹrẹ eme nọ a ti ru gbe eria nọ a ti jo ru ikokohọ na kpahe no. Jọ o jọ ọtamuo ra inọ whọ te jariẹ edesa na kpobi, jẹ ruẹrẹ oma kpahe re whọ reawere emu abọ-ẹzi nọ Jihova ọ rehọ ukoko riẹ ruẹrẹhọ kẹ owhẹ. Gbaemu inọ whọ rẹ sasa amọfa oma ẹkwoma emamọ uruemu, gbe ẹme nọ who re lele ae ta sasasa. Kẹsena te owhẹ te amọfa a vẹ te ta wọhọ epanọ oniọvo jọ nọ o kpohọ okokohọ ukpe nukpo ọ ta inọ: “Mẹ re ruẹ obọ riẹ hẹ!”
[Ẹme nọ a fi ẹgba họ nọ ọ rrọ ẹwẹ-obe avọ 1]
Wọhọ epaọ anwẹdẹ, eka esa taure okokohọ na o te ti te, ma ti zizie ahwo kẹ okokohọ na
[Ẹme nọ a fi ẹgba họ nọ ọ rrọ ẹwẹ-obe avọ 3]
Jọ ẹgọ gbe osẹ mai evaọ ọgwa okokohọ na, oria nọ ma wohọ, gbe oria nọ a rẹ jọ dẹ emu re o wha orro se Jihova
[Ẹme nọ a fi ẹgba họ nọ ọ rrọ ẹwẹ-obe avọ 4]
Gbaemu inọ whọ rẹ sasa amọfa oma ẹkwoma emamọ uruemu, gbe ẹme nọ who re lele ae ta sasasa
[Ẹkpẹti nọ o rrọ ẹwẹ-obe avọ 2-4]
Ekareghẹhọ Okokohọ Ubrotọ 2011
◼ Oke Ọruẹrẹfihotọ: Ọruẹrẹfihotọ okokohọ na ọ te hai muhọ evaọ 9:20 a.m. evaọ edesa na. Nọ ikporakporo i te muhọ no, mai kpobi ma rẹ keria ọvuọ oria riẹ re ọruẹrẹfihotọ na ọ ruẹsi muhọ kpatiẹ. Ọruẹrẹfihotọ Edisoi-Oka gbe Ẹdẹ-Ọmaha i ti kuhọ evaọ 4:55 p.m., ọrọ Ẹdoka o ve ti kuhọ evaọ 3:40 p.m.
◼ Eria nọ A rẹ Dhẹ Imoto, Emẹshini, gbe Idhighere Fihọ: Evaọ eria ikokohọ kpobi, eruẹrẹahwohọ e te jariẹ nọ e te kpọ ahwo evaọ eria nọ a rẹ dhẹ eware fihọ. Iviena ru lele ọkpọvio rai.—1 Kọr. 14:40.
◼ Ẹrawo Oria Ẹkeria: Ahwo nọ wha gbẹ ruọ omoto ọvona ze, hayo enọ wha gbẹ rrọ uwou ovona gbe emọ-uwuhrẹ Ebaibol ra ọvo whọ rẹ sae rawo ekpala kẹ.—1 Kọr. 13:5.
◼ Emu Uvo: Iviena wha emu uvo lele oma viukpenọ who re no ogege okokohọ na kpohọ otafe nyae gwọlọ emu dẹ evaọ etoke eriosehọ uvo. Whọ rẹ sae rehọ orawo-emu osese nọ who re fihọ otọ akpala rọ wha emu ra ze. Ma kuvẹ orawo-emu ulogbo, eglase, ilolo, gbe idẹro evaọ ogege okokohọ na ha.
◼ Unevaze: Ma rẹ sai dhesẹ nọ ọruẹrẹfihotọ okokohọ na o da omai ẹro ẹkwoma unevaze ugho nọ ma re ru evaọ obọ okokohọ na rọ tha iruo akpọ-soso na uke. Echẹke kpobi (obe nọ a rẹ rọ rehọ igho evaọ ebanke) nọ a bi ro ru unevaze, a re kere fihọ iẹe nọ, a hwa ugho na kẹ “Watch Tower,” yọ a re kere iei eme ivẹ.
◼ Omonwa gbe Eware-Idudhe: Ẹyao hayo omonwa o tẹ romavia idudhe evaọ ogege okokohọ na, iviena vuẹ omọvo eruẹrẹahwohọ nọ ọ kẹle owhẹ re o fi obọ họ rọ ohwo na kpohọ Ẹko-Iruo Obufihọ Ọsosuọ na, re inievo nọ e rrọ etẹe na a sae rẹrote ẹbẹbẹ na.
◼ Imu-Oyibo: Otẹrọnọ umu jọ o riẹ nọ whọ be hae rehọ, iviena wha enọ i re te owhẹ rehọ lele oma kpohọ okokohọ na, keme a te jọ obọ okokohọ na kẹ owhẹ umu utioye he.
◼ Eviẹ: Re ohwo ọ siọ oma ba ẹnwa, o rẹ mai woma re ọ wha eviẹ ekpakpatiẹ nọ e rẹ jẹ ohwo nyonya ababọ omonwa.
◼ Eware nọ A rẹ Wọ Ọmọboba Fihọ Ghelie: A rẹ wha eware nọ a rẹ wọ ọmọboba fihọ ghelie ziọ okokohọ na ha. Rekọ, a rẹ sae wha oware nọ a rẹ wọ ọmọ fihọ evaọ oria nọ ọsẹgboni na a keria na.
◼ Edrama: O rẹ jọ oware ororokẹ re inievo-emetẹ e siọ idhọfọ irereghe hayo nọ e rrọ gegerege ba ẹfare re o siọ ude ahwo nọ e keria obemu ba edi evaọ oke edrama. U fo re ahwo nọ a rrọ emu ra a ruẹ obaro lọlọhọ ababọ uriohọ nọ a re nyi, maero evaọ Egwa Okokohọ gbe Egwa Uvie nọ a sae jọ ru ikokohọ.—Fil. 2:4.
◼ Eware nọ I re Gbore Isialẹ nọ A rẹ Nẹ Fihọ Oma: O rẹ jọ oware ororokẹ re ma siọ isialẹ nọ i re gbore gaga ba ẹnẹ vọ oma, keme oghẹrẹ isialẹ jọ e rẹ kẹ ahwo jọ uye.—1 Kọr. 10:24.
◼ Efọmo Please Follow Up (S-43): A rẹ rehọ efọmo Please Follow Up ro kere evuẹ kpahe ohwo kpobi nọ o dhesẹ isiuru kpahe ovuẹ Uvie na evaọ etoke okokohọ na. Jọ iwhowho-uvie a wha ọvo hayo ivẹ lele oma kpohọ okokohọ na. A rẹ rehọ efọmo nọ a kere eme fihọ no kpohọ Book Room (Oria nọ A rẹ Jọ Rehọ Ebe) hayo rehọ iẹe kẹ okere-obe ukoko rai nọ wha te te uwou no.—Rri Odibọgba Uvie Mai ọrọ November 2009, ẹwẹ-obe avọ 4.
◼ Oria nọ A jẹ Zẹ Emu gbe Ahwo nọ A rẹ Zẹ Eware Evaọ Otafe Ogba Okokohọ Na: Wha ọghọ se odẹ Jihova ẹkwoma uruemu uwoma nọ who re dhesẹ evaọ oria nọ a rẹ jọ zẹ emu. U fo ho re whọ nyae dẹ eware evaọ okenọ a bi ruẹme. Whọ tẹ gwọlọ dẹ oware jọ, o rẹ mai woma re whọ dẹe taure ọruẹrẹfihotọ na o te ti muhọ hayo nọ o te kuhọ no.
◼ Iwou nọ A re Wohọ: (1) Dhesẹ ubi ẹzi na evaọ okenọ a be kẹ owhẹ uwou nọ who te te ogege okokohọ na no. (2) Who wohọ uvumọ uwou evaọ ogege okokohọ na ha otẹrọnọ Ẹko-Iruo Iwou na o gbẹ rehọ iẹe kẹ owhẹ hẹ. Oria nọ a kẹ owhẹ ọvo who re wohọ. (3) U fo ho re inievo-emezae e jọ oria nọ a rọ kẹ inievo-emetẹ te udevie aso hayo tubẹ wezẹ etẹe dede, yọ inievo-emetẹ a re ru ere gbe he. (4) Otẹrọnọ ẹbẹbẹ jọ ọ romavia evaọ oria nọ who wohọ, vuẹ Ẹko-Iruo Iwou na ababọ oke oraha. (5) Otẹrọnọ ehọtẹle who wohọ, nya lele ekpọvio enọ e be rẹrote ehọtẹle na. (6) There emu evaọ oria nọ a jọ kẹ uvẹ riẹ ọvo. (7) Who there emu hu evaọ okenọ ẹmeọta ọ be nyaharo keme onana u dhesẹ edẹro kẹ eware abọ-ẹzi vievie he.—Luk 10:38-42.
◼ Iruo Unevaze: Ma tẹ fialoma via kẹ iruo u ti fiba oghọghọ nọ ma ti wo no okokohọ na ze. (Iruẹru 20:35) Ohwo kpobi nọ ọ gwọlọ ru iruo unevaze o re kpohọ Ẹko-Iruo Unevaze okokohọ na. Emọ nọ e re vrẹ ikpe 16 ha a rẹ sai ru iruo evaọ otọ ọsẹ hayo oni rai hayo ohwo nọ a be rria kugbe hayo omọfa nọ ahwo nana a kuenu kẹ.
[Ẹkpẹti nọ o rrọ ẹwẹ-obe avọ 2]
Ẹvẹ Ma te rọ Rehọ Ebe-Uzizie na Zizie Ahwo?
Re ma sai ru ẹkwotọ mai re, u fo re ma ta ẹme kpẹkpẹe. Ma rẹ kaki yere ohwo na. Ma vẹ ta ẹme wọhọ: “Ma be ghale obe-uzizie nana wariẹ akpọ-soso họ ro zizie ahwo kpohọ okokohọ nọ ma ti ru. Ẹkẹra ọna. Sei re whọ riẹ eware nọ e riẹe eva.” Uke obe-uzizie na u siuru gaga, fikiere rehọ iẹe kẹ ohwo evaọ oghẹrẹ nọ ọ sae rọ rue riẹ. Ta ẹme avọ ajọwha. Nọ wha tẹ be ghale ebe-uzizie na evaọ urere-oka, wha re fi emagazini bae nọ u te kiehọ.