Yọrọ Uruemu Ezi Evaọ Udevie Erẹwho Na

1. Fikieme o rọ roja nọ ma rẹ yọrọ uruemu ezi evaọ okokohọ nọ ma be te nya na?

¹ Ahwo a re muẹrohọ omai nọ ma te bi kpohọ ikokohọ ubrotọ mai kukpe kukpe, fikiere o roja nọ uruemu mai u re dhesẹ nọ ma be gọ Ọghẹnẹ. (Izerẹ 20:26) Emamọ uruemu mai avọ ẹgọ gbe osẹ mai nọ ọ rrọ kpatiẹ u re dhesẹ nọ mai yọ uvi ilele Jesu. Nọ ma bi ti kpohọ ikokohọ ubrotọ gbe erọ akpọ-soso mai na, ẹvẹ ma sae rọ “yọrọ uruemu ezi” evaọ udevie ahwo erẹwho na re ma rọ ere wha orro se Ọsẹ obọ odhiwu mai?—1 Pita 2:12.

2. Idhere vẹ ma sai ro dhesẹ uruemu Oleleikristi evaọ etoke okokohọ na?

² Dhesẹ Uruemu Oleleikristi: Uyoyou nọ ma bi dhesẹ kẹ ohwohwo gbe oghẹrẹ nọ ma bi yeri kugbe “ahwo nọ a rọ ukoko-Kristi hi,” u wo ohẹriẹ gaga no ẹzi akpọ na. (Kọl. 3:10; 4:5; 2 Tim. 3:1-5) O gwọlọ nọ ma re dhesẹ uwowou gbe odiri kẹ ahwo nọ a rrọ oria nọ ma wohọ gbe oria nọ a rẹ jọ zẹ emu, o tẹ make rọnọ ẹbẹbẹ jọ ọ romavia. Otẹrọnọ ohwo jọ o fiobọhọ kẹ owhẹ wọ ewha ra, hwere je ririe ubruwou ra gbe eware itieye efa, whọ sae rọ umugho jọ ru ei ọghọ nọ u te j’owhẹ.

3. Eme o gwọlọ nọ esẹgbini a re ru, kọ fikieme?

³ Esẹgbini a rẹ rẹrote emọ rai evaọ ọgwa okokohọ na, eria nọ a rẹ jọ zẹ emu, gbe oria nọ a wohọ. (Itẹ 29:15) Ohwo nọ o wuzou ehọtẹle jọ ọ ta kẹ ọsẹgboni jọ nọ: “Wha were omai kẹhẹ. Whai kpobi gbe emọ rai wha wo emamọ uruemu jẹ rrọ wolẹ. Ahwo kpobi nọ a be jọ etenẹ ru iruo a be ta emamọ ẹme rai, dodokọ wha rẹ nyaze te rria etenẹ koka koka.”

4. Ẹvẹ u fo nọ ẹgọ mai ọ rẹ jọ evaọ ẹwho nọ ma te jọ ru okokohọ na?

⁴ Ẹgọ nọ Ọ Rrọ Kpatiẹ: Ẹgọ mai evaọ etoke okokohọ na o rẹ jọ kpatiẹ, orọnikọ o rẹ jọ ẹgọ ọwhọwhọhọ akpọ na ha. (1 Tim. 2:9) Makọ oke nọ ma be rueva hayo no oria nọ ma wohọ hayo evaọ oke ofa kpobi, u fo nọ ẹgọ mai ọ rẹ jọ kpatiẹ. Onana u ti ru nọ oma o gbẹ te rọ vo omai hi re ma sa ebaje mai mu jẹ ta usiuwoma nọ uvẹ na u te rovie. Emamọ uruemu mai gbe ẹgọ nọ ọ rrọ kpatiẹ evaọ etoke okokohọ na o te ta usiuwoma kẹ ahwo evezi jẹ lẹliẹ eva were Jihova.—Zef. 3:17.

Ekareghẹhọ Kpahe Okokohọ Ubrotọ 2014

◼ Oke Okokohọ Na: Okokohọ na o ti muhọ evaọ 8:20 a.m. Ikporakporo e te hai muhọ evaọ 8:20 a.m. evaọ edẹ esa na. Nọ ikporakporo i te muhọ no, mai kpobi ma rẹ keria ọvuọ oria riẹ re ọruẹrẹfihotọ na ọ ruẹsi muhọ kpatiẹ. Ọruẹrẹfihotọ Edisoi-Oka gbe Ẹdẹ-Ọmaha i ti kuhọ evaọ 3:55 p.m., orọ Ẹdoka u ve ti kuhọ evaọ 2:50 p.m.

◼ Ikokohọ Akpọ-Soso: A te jọ erẹwho jọ ru ikokohọ akpọ-soso. Kareghẹhọ nọ unu egbara, eria nọ a rẹ dhẹ imoto fihọ, gbe iwou nọ ahwo a re wohọ nọ e riẹ a roro ro zizie ikoko gbe inievo erẹwho efa kpohọ ikokohọ akpọ-soso na. Otẹrọnọ inievo nọ a zizie he a kpohọ ikokohọ akpọ-soso itieye na, ahwo a ti bu hrọ. Otẹrọnọ oware jọ o wha riẹ ze nọ whọ gbẹ sai ro kpohọ okokohọ ra ha, whọ sai kpohọ ofa rekọ o rẹ jọ okokohọ akpọ-soso ho.

◼ Eria nọ A rẹ Dhẹ Imoto, Emẹshini, gbe Idhighere Fihọ: Evaọ eria ikokohọ kpobi, inievo jọ e te jariẹ nọ e te kpọ ahwo evaọ eria nọ a rẹ dhẹ fihọ. Iviena ru lele ọkpọvio rai.—1 Kọr. 13:4, 5.

◼ Ẹrawo Oria Ẹkeria: Ahwo nọ wha gbẹ ruọ omoto ọvona ze, enọ wha gbẹ rrọ uwou ovona gbe emọ-uwuhrẹ Ebaibol ra ọvo whọ rẹ sae rawo ekpala kẹ. Eria jọ e riẹ nọ a ruẹrẹhọ kẹ ahwo nọ e kpako no gbe enọ oma o rrọ họ. Fikinọ ekpala nana i bu tere he, o gwọlọ nọ omọvo hayo imava nọ e be rẹrote ọkpako na hayo ọnọ ọ be mọ na ọvo a rẹ keria kugbei.

◼ Edrama: O rẹ jọ oware ororokẹ re inievo-emetẹ nọ e fare ithọfọ nọ e rrọ gegerege a si ai no evaọ oke edrama, re ahwo nọ a rrọ emu rai a sae ruẹ obaro lọlọhọ.

◼ Emu Uvo: Iviena wha emu uvo lele oma ukpenọ who re no Ọgwa Okokohọ na kpohọ otafe nyae gwọlọ emu dẹ evaọ etoke eriosehọ uvo. Whọ rẹ sae rehọ ikula osese nọ who re fihọ otọ akpala rọ wha emu ra ze. Wha rẹ wha ikula ilogbo, eglase, gbe imidhe nọ i re whu ziọ okokohọ na ha.

◼ Okẹ Unevaze: Ma rẹ sai dhesẹ nọ ọruẹrẹfihotọ okokohọ na o da omai ẹro ẹkwoma ugho nọ ma re ro ru unevaze evaọ obọ okokohọ na rọ tha iruo akpọ-soso na uke. Whọ tẹ be rehọ echẹke ru unevaze, kere fihọ iẹe nọ a hwa ugho na kẹ “Watch Tower,” yọ who re kere iei eme ivẹ.

◼ Imu-Oyibo: Otẹrọnọ umu jọ o riẹ nọ whọ be hae rehọ, iviena wha enọ i re te owhẹ lọ lele oma kpohọ okokohọ na, keme umu utioye o te jọ obọ okokohọ na ha. Wha re fi iguede nọ a rẹ rọ kẹ uduwo họ ikete erara evaọ oria okokohọ na hayo iwou nọ wha wohọ họ, wha re ku ai fiẹ thabọ.

◼ Oma-Oyọrọ: Iviena yọroma kpahe oware kpobi nọ o rẹ sai gele owhẹ kie nọ o rẹ wha enwoma ze. Kukpe kukpe ahwo a be hae nwa oma fiki oghẹrẹ eviẹ nọ a kuhọ, maero kọ eviẹ ikpekpehru. Re ohwo ọ siọ oma ba ẹnwa, o rẹ mai woma re ọ wha eviẹ nọ e rẹ jae nya onya.

◼ Eware nọ A re ro Ghelie Emọ gbe Egbara: A rẹ wha eware nọ a re ro ghelie emọ hayo egbara lele oma ziọ okokohọ na ha. Rekọ a rẹ sae wha eghẹrẹ enọ a rẹ wọ ọmọ fihọ nọ a rẹ sa mu egbara okokohọ na.

◼ Isialẹ nọ A rẹ Nẹ Fihọ Oma: O rẹ jọ oware ororokẹ re ma siọ isialẹ nọ i re gbore gaga ba ẹnẹ vọ oma, keme oghẹrẹ isialẹ jọ e rẹ kẹ ahwo jọ uye.—1 Kọr. 10:24.

◼ Efọmo Please Follow Up (S-43): A rẹ rehọ efọmo Please Follow Up ro kere evuẹ kpahe ohwo kpobi nọ a ta usiuwoma kẹ nọ o dhesẹ isiuru evaọ etoke okokohọ na. O gwọlọ nọ owhowho-uvie kpobi ọ rẹ wha efọmo S-43 na ọvo hayo ivẹ lele oma ziọ okokohọ na. A rẹ rehọ efọmo nọ a kere eme fihọ no kpohọ Book Room (Oria nọ A rẹ Jọ Rehọ Ebe) hayo rehọ iẹe kẹ okere-obe ukoko nọ wha te te uwou no.

◼ Oria nọ A rẹ Jọ Zẹ Eware Evaọ Otafe Ọgwa Okokohọ Na: Wha orro se odẹ Jihova ẹkwoma uruemu uwoma ra. Jọ ẹgọ ra u dhesẹ nọ whẹ yọ uvi Oleleikristi. U fo ho re whọ nyae dẹ eware evaọ okenọ a bi ru ẹme.

◼ Iwou nọ A re Wohọ:

Iviena whọ jọ uwou hayo ehọtẹle nọ who wohọ rehọ ibriwou bu hrọ họ, yọ who fi ahwo họ ubruwou bu vi unu nọ a kẹ uvẹ riẹ hẹ.
Otẹrọnọ whọ jọ ehọtẹle hayo oria jọ rehọ uwou, whọ kpairoro vrẹ riẹ hẹ ajokpanọ ẹbẹbẹ jọ ọ romavia idudhe, yọ whọ rẹ vuẹ ọnọ ọ be rẹrote uwou na re a sae rọ uwou na kẹ omọfa. (Mat. 5:37) Whọ gbẹ kake vuẹ ohwo na ha, ẹsejọhọ o ti zihe ugho nọ who ro bru osa kẹ owhẹ hẹ.
There emu evaọ oria nọ a fihọ kẹ emu-othere. Who there emu hu evaọ okenọ a bi ru ẹme, keme onana u dhesẹ edẹro kẹ eware nọ ma bi wuhrẹ vievie he.
Nọ Ẹko-Iruo Iwou na a tẹ be kẹ omai iwou nọ ma re wohọ evaọ ogege okokohọ na hayo obọ otafe, u fo re ma dhesẹ ubi ẹzi na. Ahwo nọ e rẹ gwọlọ obufihọ rai a rẹ jọ buobu. Fikiere o rẹ were ae nọ ma te dhesẹ ẹwo, ithihakọ, gbe ororokẹ.
Esẹgbini, wha rẹrote emọ rai ẹsikpobi evaọ oria kpobi nọ wha wohọ, makọ evaọ Ọgwa Okokohọ na hayo obọ otafe.
Who wohọ uvumọ uwou evaọ Ọgwa Okokohọ na ha otẹrọnọ Ẹko-Iruo Iwou na o rehọ e riẹ kẹ owhẹ hẹ. Oria nọ a kẹ owhẹ ọvo who re wohọ. U fo ho re inievo-emezae e jọ oria nọ inievo-emetẹ a wohọ te udevie aso hayo tubẹ wezẹ etẹe dede, yọ inievo-emetẹ a re ru ere gbe he.
Otẹrọnọ ẹbẹbẹ jọ ọ romavia evaọ oria nọ who wohọ, vuẹ Ẹko-Iruo Iwou na ababọ oke oraha re a sai fiobọhọ kẹ owhẹ.

◼ Iruo Unevaze: Ohwo kpobi nọ ọ gwọlọ ru iruo unevaze o re kpohọ Ẹko-Iruo Unevaze okokohọ na. Emọ nọ i ri te ikpe 16 ha a rẹ sai ru iruo evaọ otọ ọsẹ hayo oni rai hayo ohwo nọ a be rria kugbe hayo omọfa nọ ahwo nana a kẹ uvẹ.