Ekareghẹhọ Kpahe Okokohọ Ubrotọ
Oke Okokohọ Na: Evaọ edẹ esa na, ikporakporo e te hai muhọ evaọ 8:20 a.m evaọ Nigeria. Nọ ikporakporo i te muhọ no, mai kpobi ma rẹ keria ọvuọ oria riẹ re ọruẹrẹfihotọ na ọ ruẹsi muhọ kpatiẹ. Ọruẹrẹfihotọ Edisoi-Oka gbe Ẹdẹ-Ọmaha i ti kuhọ evaọ 3:55 p.m., orọ Ẹdoka u ve ti kuhọ evaọ 2:45 p.m.
‘Rehọ Ole Jiri Jihova’: Idibo Ọghẹnẹ oke anwae a jẹ hae suile jiri Jihova, yọ ma gbẹ be rehọ ile jiri iei re evaọ egagọ mai nẹnẹ. (Ol. 28:7) Ma rẹ rọ ikporakporo mu abọ okokohọ mai kpobi họ. Orọnikọ a kporo ile na re oma o were omai ọvo ho, rekọ re e lẹliẹ omai wuhrẹ kpahe Jihova jẹ gọe. Fikiere, nọ ohwo-agbara na ọ tẹ ta nọ a bi ti mu ikporakporo họ, o gwọlọ nọ ohwo kpobi ọ rẹ keria jẹ gaviezọ kẹ ile na ziezi orọnikọ oke yena ma rẹ rọ ta ẹme he. Ma te ru ere, u dhesẹ nọ iruo egbile ukoko na e da omai ẹro fia. Isiava ẹgbukpe inievo nana a rẹ rehọ igho obọrai jẹ ofa kpobọ ehri ukoko na evaọ obọ Patterson, New York, re a kporo emamọ ile nana kẹ omai. Nọ ma tẹ romatotọ gaviezọ kẹ ikporakporo na no, mai kpobi ma ve kuomagbe so ile ujiro kẹ Jihova.
Eria nọ A rẹ Dhẹ Imoto, Emẹshini, gbe Idhighere Fihọ: Inievo jọ e te jariẹ nọ e te kpọ ahwo evaọ eria nọ a rẹ dhẹ imoto, emẹshini, gbe idhighere fihọ. Iviena ru lele ọkpọvio rai.—1 Kọr. 13:4, 5.
Ẹrawo Ekpala: Iviena roro kẹ amọfa, who rowo oma ha, fi ewoma inievo ra họ aro. Nọ ma tẹ rọ ewoma inievo mai karo, u re dhesẹ omai fihọ Ileleikristi uzẹme, jẹ lẹliẹ ahwo obọ otafe jiri Ọghẹnẹ. (Jọn 13:34, 35; 1 Kọr. 13:5; 1 Pita 2:12) Ahwo nọ wha gbẹ ruọ omoto ọvona ze, enọ wha gbẹ rrọ uwou ovona gbe emọ-uwuhrẹ Ebaibol ra ọvo whọ rẹ sae rawo ekpala kẹ. Whọ gbẹ be rawo akpala kẹ ohwo ho, who fi eware họ iẹe he. Onana u ti ru nọ amọfa a rẹ rọ riẹ nọ ohwo ọvo ọ re keria etẹe na ha. Eria jọ e riẹ nọ a ruẹrẹhọ kẹ ahwo nọ e kpako no gbe enọ oma o rrọ họ. Fikinọ ekpala nana i bu tere he, o gwọlọ nọ omọvo hayo imava nọ e be rẹrote ọkpako na hayo ọnọ ọ be mọ na ọvo a rẹ keria kugbei.
Ẹgọ nọ Ọ Rrọ Kpatiẹ: Ẹgọ mai evaọ etoke okokohọ na ọ rẹ jọ kpatiẹ, orọnikọ o rẹ jọ ẹgọ ọwhọwhọhọ akpọ na ha. (1 Tim. 2:9) Makọ oke nọ ma be ro hayo no oria nọ ma wohọ hayo evaọ oke ofa kpobi, u fo nọ ẹgọ mai ọ rẹ jọ kpatiẹ. Onana u ti ru nọ oma o gbẹ te rọ vo omai hi re ma sa ebaje mai mu jẹ ta usiuwoma nọ uvẹ na u te rovie. Emamọ uruemu mai gbe ẹgọ nọ ọ rrọ kpatiẹ evaọ etoke okokohọ na o te ta usiuwoma kẹ ahwo evezi jẹ lẹliẹ eva were Jihova.—Zef. 3:17.
Dhesẹ Emamọ Uruemu nọ Whọ tẹ Wha Ifonu Hayo Etablẹte: Ma te ru ifonu hayo etablẹte mai fihọ oghẹrẹ nọ u gbe ro kpokpo amọfa ha nọ a te mu ẹme họ no, u re dhesẹ nọ ma bi dhesẹ emamọ uruemu. Ma tẹ be rehọ ifoto hayo rekọdo, joma roro kẹ amọfa, ma di ude rai hi. U re je dhesẹ nọ ma wo emamọ uruemu otẹrọnọ ma gbẹ be rehọ ifonu hayo etablẹte mai vi uwou se amọfa ha.
Emu Uvo: Iviena wha emu uvo lele oma ukpenọ who re no Ọgwa Okokohọ na nyae gwọlọ emu dẹ evaọ etoke eriosehọ uvo. Whọ rẹ sae rehọ ikula osese nọ who re fihọ otọ akpala wha emu ze. Wha rẹ wha ikula ilogbo, eglase, gbe imidhe nọ i re whu ziọ okokohọ na ha.
Okẹ Unevaze: Ma rẹ sai dhesẹ nọ ọruẹrẹfihotọ okokohọ na o da omai ẹro ẹkwoma ugho nọ ma re ro ru unevaze evaọ obọ okokohọ na rọ tha iruo akpọ-soso na uke. Whọ tẹ be rehọ echẹke ru unevaze, kere fihọ iẹe nọ a hwa ugho na kẹ “Watch Tower Society of Jehovah’s Witnesses.” Ohwo ọ sae jẹ rọ ekade ATM ro ru unevaze re.
Imu-Oyibo: Otẹrọnọ umu jọ o riẹ nọ whọ be hae rehọ, iviena wha enọ i re te owhẹ lọ lele oma, keme umu utioye na o te jọ okokohọ na ha. Wha re fi iguede nọ a rẹ rọ kẹ uduwo họ ikete erara evaọ oria okokohọ na hayo iwou nọ wha wohọ họ, wha re ku ai fiẹ thabọ.
Oma-Oyọrọ: Iviena yọroma kpahe oware kpobi nọ o rẹ sai gele ohwo kie nọ o rẹ wha enwoma ze. Kukpe kukpe ahwo a be hae nwa oma fiki oghẹrẹ eviẹ nọ a kuhọ, maero eviẹ ikpekpehru. Re ohwo ọ siọ oma ba ẹnwa, o rẹ mai woma re ọ wha eviẹ nọ e rẹ jae nya onya evaọ oria kpobi.
Eware nọ A re ro Ghelie Emọ gbe Egbara nọ A re Kpiri: A rẹ wha eware nọ a re ro ghelie emọ hayo egbara nọ a re kpiri lele oma ziọ okokohọ na ha. Rekọ, ma kẹ uvẹ kẹ eghẹrẹ enọ a rẹ wọ ọmọ fihọ nọ a rẹ sa mu akpala kẹle oria nọ ọsẹgboni na a keria.
Isialẹ nọ A rẹ Nẹ Fihọ Oma: O rẹ jọ oware ororokẹ re ma siọ isialẹ nọ i re gbore gaga ba ẹnẹ vọ oma, keme oghẹrẹ isialẹ jọ e rẹ kẹ ahwo jọ uye.—1 Kọr. 10:24.
Efọmo Please Follow Up (S-43): A rẹ rehọ efọmo Please Follow Up na ro kere evuẹ kpahe ohwo nọ a ta usiuwoma kẹ nọ o dhesẹ isiuru evaọ etoke okokohọ na. A rẹ rehọ efọmo nọ a kere eme fihọ no kpohọ Oria nọ A rẹ Jọ Rehọ Ebe hayo rehọ iẹe kẹ okere-obe ukoko nọ wha te te uwou no.
Oria nọ A rẹ Jọ Zẹ Emu: Wha orro se odẹ Jihova ẹkwoma uruemu uwoma ra evaọ eria itienana. Jọ ẹgọ ra u dhesẹ nọ whẹ yọ uvi Oleleikristi.
Iwou nọ A re Wohọ gbe Ehọtẹle:
Iviena whọ jọ uwou hayo ehọtẹle nọ who wohọ rehọ ibriwou bu vi enọ whọ gwọlọ họ, yọ who fi ahwo họ ubruwou bu vi unu nọ a kuvẹ riẹ hẹ.
Otẹrọnọ whọ jọ ehọtẹle hayo oria jọ rehọ uwou, whọ kpairoro vrẹ riẹ hẹ ajokpanọ ẹbẹbẹ jọ ọ romavia idudhe, yọ whọ rẹ vuẹ ọnọ ọ be rẹrote uwou na re a sae rọ uwou na kẹ omọfa. (Mat. 5:37) Whọ gbẹ kake vuẹ ohwo na ha, ẹsejọhọ o ti zihe ugho nọ who ro bru osa kẹ owhẹ hẹ.
There emu evaọ oria nọ a fihọ kẹ emu-othere.
Nọ Ẹko-Iruo Iwou na a tẹ be kẹ omai iwou nọ ma re wohọ evaọ ogege okokohọ na hayo obọ otafe, u fo re ma dhesẹ ubi ẹzi na. Ahwo nọ e rẹ gwọlọ obufihọ rai a rẹ jọ buobu. Fikiere o rẹ were ae nọ ma te dhesẹ ẹwo, ithihakọ, gbe ororokẹ
Esẹgbini, wha rẹrote emọ rai ẹsikpobi evaọ oria kpobi nọ wha wohọ, makọ evaọ Ọgwa Okokohọ hayo obọ otafe gbe edhere nọ a rẹ fa vrẹ.
Who wohọ uvumọ uwou evaọ Ọgwa Okokohọ na ha otẹrọnọ Ẹko-Iruo Iwou na o rehọ e riẹ kẹ owhẹ hẹ keme o te lẹliẹ oria na jọ kekeke. Oria nọ a kẹ owhẹ ọvo who re wohọ. U fo ho re inievo-emezae e jọ oria nọ inievo-emetẹ a wohọ te udevie aso hayo tubẹ wezẹ etẹe dede, yọ inievo-emetẹ a re ru ere gbe he.
Otẹrọnọ ẹbẹbẹ jọ ọ romavia evaọ oria nọ who wohọ, vuẹ Ẹko-Iruo Iwou na ababọ oke oraha re a sai fiobọhọ kẹ owhẹ.
Iruo Unevaze: Ohwo kpobi nọ ọ gwọlọ ru iruo unevaze o re kpohọ Ẹko-Iruo Unevaze okokohọ na. Emọ nọ i ri te ikpe 16 ha a rẹ sai ru iruo evaọ otọ ọsẹ hayo oni rai hayo ohwo nọ a be rria kugbe hayo omọfa nọ ahwo nana a kẹ uvẹ.