Uruemu Ezi nọ O rẹ Wha Orro Se Ọghẹnẹ

1. Fikieme ahwo buobu a re ro muẹrohọ Isẹri Jihova evaọ oke okokohọ ubrotọ rai?

¹ Nọ ma te bi ru okokohọ ubrotọ, ahwo buobu a re muẹrohọ onana. Evaọ ewho buobu nọ a rẹ jọ ru ikokohọ, otu nọ e rẹ niyẹrẹ a re woro kẹ ahwo inọ Isẹri Jihova a ziọ ẹwho rai. Ahwo nọ a ziọ okokohọ na a rẹ vọ ehọtẹle gbe eria nọ a rẹ jọ zẹ emu, yọ ahwo nọ a be rria okegbe na a rẹ ruẹ inievo buobu nọ e sa ebaje mu. Eware nọ ma fodẹ evaọ obotọ na i ti fi obọ họ kẹ omai kẹ Ọghẹnẹ orro nọ ma ti kpohọ okokohọ na.—1 Pita 2:12.

2. Ẹvẹ ma sae rọ rehọ ẹgọ mai wha orro se Ọghẹnẹ evaọ etoke okokohọ na?

² Ẹgọ nọ Ọ Rrọ Kpatiẹ: Ahwo a re muẹrohọ emamọ ẹgọ mai nọ ma te bi kpohọ okokohọ na. Ghele na, oghẹrẹ osẹ nọ ma rẹ sẹ nọ ma tẹ be kpahe oria nọ ma wohọ, nọ ma tẹ nyae dẹ emu, hayo nyae dẹ oware ofa kpobi oye o rẹ mai dhesẹ oghẹrẹ nọ amọfa a re rri omai. Dede nọ ma rẹ sai nwene iwu mai nọ okokohọ okpẹdoke na o te kuhọ no, ẹgọ mai ọ rẹ jọ kpatiẹ evaọ ẹsikpobi. U fo re amọfa a ruẹ nọ ma wo ohẹriẹ no ahwo nọ a be gọ Jihova ha. (Rom 12:2) U te no ere no, u fo re ma sa ebaje mai mu keme onana u re ru nọ ahwo a rẹ rọ riẹ kpahe okokohọ na, rovie uvẹ nọ ma rẹ rọ ta usiuwoma, jẹ lẹliẹ inievo efa nọ e ziọ okokohọ na vuhu omai.

3. Ẹvẹ ma sai ro dhesẹ odiri gbe emamọ uruemu?

³ Odiri gbe Emamọ Uruemu: Evaọ akpọ nana nọ ahwo buobu a je you omobọ rai ọvo jẹ kare uyere na, emamọ uruemu gbe odiri nọ ma re dhesẹ o rẹ were amọfa, wọhọ ahwo nọ ma wohọ iwou rai hayo eria nọ a rẹ jọ zẹ emu. (2 Tim. 3:1-5) Nọ ma tẹ be rawo oria ẹkeria hayo rehọ ebe nọ a siobọno, ma rẹ gwọlọ ewoma amọfa orọnikọ orọ obọmai hi. (1 Kọr. 10:23, 24) Nọ ọzae jọ o no okokohọ ọsosuọ riẹ ze, ọ ta nọ: “Mẹ rẹ sae gbẹ kareghẹhọ eware nọ a wuhrẹ evaọ ẹdẹ yena ha, rekọ emamọ uruemu nọ Isẹri Jihova a dhesẹ o rẹ thọrọ omẹ ẹro ho.”

4. Nọ o tẹ lọhọ, fikieme ma rẹ rọ fialoma via kẹ iruo evaọ okokohọ na?

⁴ Iruo Unevaze: Unevaze nọ a re ro ru iruo yọ uruemu jọ nọ a re ro vuhu uvi Ileleikristi. (Ol. 110:3) Kọ whọ sae fialoma via kẹ iruo evaọ okokohọ na? Evaọ okokohọ jọ, inievo nọ i bu te egba ezeza (600) a fialoma via re a ru oria na fo taure okokohọ na o te ti muhọ. Ohwo jọ nọ ọ be jọ etẹe ru iruo ọ ta nọ: “Ma re ruẹ oware utiona ẹdẹvo ho. U gbunu gaga inọ ahwo nana kpobi a fialoma via kẹ iruo na.” Ma bi rẹro oke nọ ma ti ro kpohọ okokohọ ubrotọ 2013 na gbe uvẹ nọ ma te rọ gaviezọ re ma wuhrẹ mi Ọghẹnẹ, re ma jẹ wha orro sei.

[Ẹkpẹti nọ o rrọ ẹwẹ-obe avọ 4]

Ekareghẹhọ Kpahe Okokohọ Ubrotọ 2013

◼ Oke Okokohọ Na: Ikporakporo e te hai muhọ evaọ 9:20 a.m. evaọ edẹ esa na. Nọ ikporakporo i te muhọ no, mai kpobi ma rẹ keria ọvuọ oria riẹ re ọruẹrẹfihotọ na ọ ruẹsi muhọ kpatiẹ. Ọruẹrẹfihotọ Edisoi-Oka gbe Ẹdẹ-Ọmaha i ti kuhọ evaọ 4:50 p.m., orọ Ẹdoka u ve ti kuhọ evaọ 3:35 p.m.

◼ Eria nọ A rẹ Dhẹ Imoto, Emẹshini, gbe Idhighere Fihọ: Evaọ eria ikokohọ kpobi, inievo jọ e te jariẹ nọ e te kpọ ahwo evaọ eria nọ a rẹ dhẹ fihọ. Iviena ru lele ọkpọvio rai.—1 Kọr. 13:4, 5.

◼ Ẹrawọ Oria Ẹkeria: Ahwo nọ wha gbẹ ruọ omoto ọvona ze, enọ wha gbẹ rrọ uwou ovona gbe emọ-uwuhrẹ Ebaibol ra ọvo whọ rẹ sae rawo ekpala kẹ.—1 Kọr. 13:5.

◼ Emu Uvo: Iviena wha emu uvo lele oma viukpenọ who re no Ọgwa Okokohọ na kpohọ otafe nyae gwọlọ emu dẹ evaọ etoke eriosehọ uvo. Whọ rẹ sae rehọ ikula osese nọ who re fihọ otọ akpala rọ wha emu ra ze. Wha rẹ wha ikula ilogbo, eglase, gbe imidhe nọ i re whu ziọ okokohọ na ha.

◼ Okẹ Unevaze: Ma rẹ sai dhesẹ nọ ọruẹrẹfihotọ okokohọ na o da omai ẹro ẹkwoma ugho nọ ma re ro ru unevaze evaọ obọ okokohọ na rọ tha iruo akpọ-soso na uke. Whọ tẹ be rehọ echẹke ru unevaze, kere fihọ iẹe nọ a hwa ugho na kẹ “Watch Tower,” yọ who re kere iei eme ivẹ.

◼ Omonwa gbe Eware-Idudhe: Nọ ohwo ọ tẹ nwa oma hayo kie ẹyao idudhe evaọ ogege okokohọ na, iviena vuẹ omọvo enọ e be ruẹrẹ ahwo họ nọ ọ kẹle owhẹ re o fi obọ họ rehọ ohwo na kpohọ First Aid Department (Ẹko-Iruo Obufihọ Ọsosuọ) na, re inievo nọ e rrọ etẹe na a sai fi obọ họ kẹ ohwo na.

◼ Imu-Oyibo: Otẹrọnọ umu jọ o riẹ nọ whọ be hae rehọ, iviena wha enọ i re te owhẹ lọ lele oma kpohọ okokohọ na, keme umu utioye o te jọ obọ okokohọ na ha. Wha re fi iguede nọ a rẹ rọ kẹ uduwo họ ikete erara evaọ oria okokohọ na hayo iwou nọ wha wohọ họ, wha re ku ai fiẹ thabọ.

◼ Eviẹ: Kukpe kukpe ahwo a be hae nwa oma fiki oghẹrẹ eviẹ nọ a kuhọ, maero kọ eviẹ ikpekpehru. Re ohwo ọ siọ oma ba ẹnwa, o rẹ mai woma re ọ wha eviẹ nọ e rẹ jae nya onya ababọ omonwa.

◼ Eware nọ A re ro Ghelie Emọ gbe Egbara: A rẹ wha eware nọ a re ro ghelie emọ hayo egbara lele oma ziọ okokohọ na ha. Rekọ a rẹ sae wha eghẹrẹ enọ a rẹ wọ ọmọ fihọ nọ a rẹ sa mu egbara okokohọ na.

◼ Isialẹ nọ A rẹ Nẹ Fihọ Oma: O rẹ jọ oware ororokẹ re ma siọ isialẹ nọ i re gbore gaga ba ẹnẹ vọ oma, keme oghẹrẹ isialẹ jọ e rẹ kẹ ahwo jọ uye.—1 Kọr. 10:24.

◼ Efọmo Please Follow Up (S-43): A rẹ rehọ efọmo Please Follow Up ro kere evuẹ kpahe ohwo kpobi nọ a ta usiuwoma kẹ nọ o dhesẹ isiuru evaọ etoke okokohọ na. A rẹ rehọ efọmo nọ a kere eme fihọ no kpohọ Book Room (Oria nọ A rẹ Jọ Rehọ Ebe) hayo rehọ iẹe kẹ okere-obe ukoko rai nọ wha te te uwou no.

◼ Oria nọ A rẹ Jọ Zẹ Eware Evaọ Otafe Ọgwa Okokohọ Na: Wha orro se odẹ Jihova ẹkwoma uruemu uwoma ra. Jọ ẹgọ ra u dhesẹ nọ whẹ yọ uvi Oleleikristi. U fo ho re whọ nyae dẹ eware evaọ okenọ a bi ru ẹme.

◼ Iwou nọ A re Wohọ:

(1) Iviena whọ jọ uwou hayo ehọtẹle nọ a fi owhai họ rehọ ibriwou bu hrọ họ, yọ who fi ahwo họ ubruwou bu vi unu nọ a kẹ uvẹ riẹ hẹ.

(2) Otẹrọnọ whọ jọ ehọtẹle hayo oria jọ rehọ uwou, whọ kpairoro vrẹ riẹ hẹ ajokpanọ ẹbẹbẹ jọ ọ romavia idudhe, yọ whọ rẹ vuẹ ọnọ ọ be rẹrote uwou na re a sae rọ uwou na kẹ omọfa. (Mat. 5:37) Whọ gbẹ kake vuẹ ohwo na ha, ẹsejọhọ o ti zihe ugho nọ who ro bru osa kẹ owhẹ hẹ.

(3) There emu evaọ oria nọ a jọ kẹ uvẹ riẹ ọvo. Who there emu hu evaọ okenọ a bi ru ẹme, keme onana u dhesẹ edẹro kẹ eware nọ ma bi wuhrẹ vievie he.

(4) Nọ Ẹko-Iruo Iwou na a tẹ be kẹ omai iwou nọ ma re wohọ evaọ ogege okokohọ na hayo obọ otafe, u fo re ma dhesẹ ubi ẹzi na. Ahwo nọ e rẹ gwọlọ obufihọ rai a rẹ jọ buobu. Fikiere o rẹ were ae nọ ma te dhesẹ ẹwo, ithihakọ, gbe ororokẹ.

(5) Esẹgbini, wha rẹrote emọ rai ẹsikpobi evaọ oria kpobi nọ wha wohọ, makọ evaọ Ọgwa Okokohọ na hayo obọ otafe.

(6) Who wohọ uvumọ uwou evaọ Ọgwa Okokohọ na ha otẹrọnọ Ẹko-Iruo Iwou na o rehọ e riẹ kẹ owhẹ hẹ. Oria nọ a kẹ owhẹ ọvo who re wohọ. U fo ho re inievo-emezae e jọ oria nọ a rọ kẹ inievo-emetẹ te udevie aso hayo tubẹ wezẹ etẹe dede, yọ inievo-emetẹ a re ru ere gbe he.

(7) Otẹrọnọ ẹbẹbẹ jọ ọ romavia evaọ oria nọ who wohọ, vuẹ Ẹko-Iruo Iwou na ababọ oke oraha re a sai fi obọ họ kẹ owhẹ.

◼ Iruo Unevaze: Ohwo kpobi nọ ọ gwọlọ ru iruo unevaze o re kpohọ Ẹko-Iruo Unevaze okokohọ na. Emọ nọ i ri te ikpe 16 ha a rẹ sai ru iruo evaọ otọ ọsẹ hayo oni rai hayo ohwo nọ a be rria kugbe hayo omọfa nọ ahwo nana a kẹ uvẹ.