Ikokohọ Ubrotọ—Oke Egagọ nọ O rẹ Kẹ Evawere
1. Ẹvẹ ehaa nọ a je ru evaọ Izrẹl e rọ wọhọ ikokohọ ubrotọ mai inẹnẹ?
1 Josẹf, Meri, emọ rai, gbe amọfa a jẹ hai kpohọ Jerusalẹm fiki ehaa sa-sa nọ a jẹ hai ru ẹsiẹvo ẹgbukpe. Evaọ etoke nana, a rẹ daoma kpairoro vrẹ awaọruọ ikẹdẹ kẹdẹ rai a vẹ tẹrovi eware abọ-ẹzi. A rẹ rọ oke ehaa na roro jẹ ta ẹme kpahe ewoma Jihova je wuhrẹ kpahe izi riẹ. Ikokohọ ubrotọ nọ e be tha na e te kẹ omai uvẹ nọ ma te rọ gọ Jihova avọ evawere.
2. Eme ma re ru rọ ruẹrẹ oma họ kẹ okokohọ nọ ọ be tha na?
2 O Gwọlọ Omaruẹrẹhọ: Re uviuwou Jesu a no Nazarẹt kpohọ Jerusalẹm u dhesẹ nọ a rẹ nya oria nọ u thabọ no Oleh rite Sapẹlẹ je zihe kpozi. Dede nọ ma riẹ unu inievo Jesu hu, ma riẹ nọ erẹ na o gwọlọ omaruẹrẹhọ ziezi mi Josẹf avọ Meri. Kọ whọ ruẹrẹ oma kpahe no re whọ jariẹ evaọ edẹ esa okokohọ ubrotọ na? Onana o sae gwọlọ nọ who re mi uvẹ evaọ oria iruo ra hayo jọ obọ isukulu mi uvẹ kẹ ọmọ ra. Otẹrọnọ ehọtẹle who ti wohọ, kọ whọ nyonya riẹ kpahe no? Kọ whọ sae rehọ iroro obọra fi obọ họ kẹ ohwo jọ nọ ọ rrọ ukoko ra nọ o wo ẹgwọlọ obọdẹ re ọ sai kpohọ okokohọ na?—1 Jọn 3:17, 18.
3. Ẹvẹ ehaa ahwo Ju e rọ jọ etoke omakugbe nọ o rẹ kẹ ọbọga?
3 Omakugbe nọ O rẹ Kẹ Ọbọga: Ehaa ahwo Ju na o jẹ hai rovie uvẹ kẹ eg’Ọghẹnẹ nọ a jẹ hae rọ bọ ohwohwo ga. Ababọ avro, uviuwou Jesu o jẹ hai rẹro epanọ a ti ro kuomagbe egbẹnyusu rai evaọ etoke nana. A jẹ hae jọ etoke ehaa na mu egbẹnyusu ekpokpọ evaọ udevie ahwo Ju gbe erara nọ i kurẹriẹ ziọ egagọ ahwo Ju nọ e rrọ ehaa na.
4. Ẹvẹ ma sai ro dhesẹ nọ ma rri okugbe inievo mai ghaghae?
4 Re ma sai kuomagbe bọ ohwohwo ga họ ẹjiroro jọ nọ ọrigbo nọ o wo ẹrọwọ avọ areghẹ na o ro ru ọruẹrẹfihotọ nọ ma re ro kuomagbe gaviezọ kẹ eme evaọ ikokohọ ubrotọ viukpenọ a re kere eme na fihọ ebe kẹ omai se ọvo. (Hib. 10:24, 25) Fikiere, ru epanọ whọ rẹ rọ kaki te ọgwa okokohọ na kẹdẹ kẹdẹ re whọ reawere omakugbe amọfa taure ikporakporo i te ti muhọ nọ u re dhesẹ nọ oke u te no nọ whọ rẹ rọ nyae keria. Ukpenọ ma re no ọgwa okokohọ na evaọ oke uvo nyae dẹ emu, a tuduhọ omai awọ re ma wha emu ovovori nọ ma rẹ sae re evaọ oke eriosehọ na re ma sai wo uvẹ nọ ma rẹ rọ ta ẹme kugbe ahwo nọ ma gbẹ keria. Okugbe inievo mai yọ okẹ oghaghae nọ u no obọ Jihova ze nọ ma re rri vo ho.—Mae. 2:12.
5. Eme o ti fi obọ họ kẹ omai wo erere vọvọ no okokohọ na ze?
5 Oke nọ A re ro Wuhrẹ: No emaha ze, Jesu ọ jẹ hai ro kpohọ ehaa na re o wuhrẹ kpahe Ọsẹ obọ odhiwu riẹ. (Luk 2:41-49) Eme o ti fi obọ họ kẹ omai gbe uviuwou mai wo erere vọvọ no eme nọ a ti ru na ze? Nọ a te mu ẹme họ no, daji oria ẹkeria ra, jẹ whaha ikuigbe. Ru ifonu ra, ipeja, hayo eware itieye efa fihọ oghẹrẹ nọ i gbe ro kpokpo owhẹ hayo amọfa ha. Tẹrovi oruẹme na, je kere igogo eme fihọ otọ. Whai uviuwou na soso wha keria oria ọvo re whọ sai muẹrohọ inọ emọ ra e be gaviezọ. Evaọ owọwọ, wha raha omoke jọ ta kpahe eme nọ a ta.
6. Eme ma re wo họ iroro kpahe ẹgọ gbe osẹ mai?
6 Ẹgọ gbe Osẹ: Ehreki erẹwho efa nọ e jẹ nya edhere ọvona a re vuhu uviuwou Jesu gbe ahwo Ju efa nọ i je kpohọ ehaa na fiki iluelue nọ a ko fihọ akọ iwu rai gbe ufi uburu nọ a ro mu iluelue na. (Ik. 15:37-41) Dede nọ Ileleikristi a rẹ wha oghẹrẹ iwu sa ha, a riẹ omai wọhọ ahwo nọ a rẹ gẹgọ kpatiẹ, jẹ jọ fuafo. Ma rẹ romatotọ gẹgọ maero nọ ma te bi kpohọ okokohọ na je kpozi, gbe okenọ ma tẹ be nya evaọ ẹwho okokohọ na. O tẹ make rọnọ ma ba iwu nọ ma wha kpohọ okokohọ na no nọ okokohọ ọ tẹ fa no, ma rẹ gbẹ wha ẹgọ nọ ọ rrọ kpatiẹ, jẹ sa ebaje okokohọ mai mu. Enẹ oruo ma ti ro wo ohẹriẹ no amọfa nọ a rrọ ukoko na ha, je wo emamọ odẹ evaọ aro ahwo.
7. Fikieme ma je roro kpahe oma nọ ma rẹ fialọ via kẹ iruo okokohọ?
7 Ma Gwọlọ Ahwo nọ A rẹ Fialoma Via: Re okokohọ na ọ sae nya kpatiẹ, o gwọlọ iruiruo nọ e rẹ fialoma via. Kọ whọ sae fialoma via kẹ iruo? (Ol. 110:3) Iruo nọ a rẹ jọ ikokohọ ubrotọ ru yọ abọjọ egagọ mai, yọ i re se uvi isẹri. Iruo erufuọ nọ enọ e fialoma via a ru evaọ oria okokohọ jọ o wọ ohwo nọ o wuzou oria na ta nọ: “Me bi yere owhai gaga kẹ okokohọ nana, mẹ re ruẹ obọ riẹ hẹ. U kri no nọ me bi yo inọ oke kpobi nọ Isẹri Jihova a tẹ jọ oria nana ru okokohọ a re ru ei fihọ fuafo vi epanọ a di rie họ. Wha ru oria nana woma vi epaọ anwẹdẹ kẹ ẹwho nana no, yọ whai họ ahwo nọ a mai wo udhedhẹ gbe okugbe nọ ma muẹrohọ no.”
8. Uvẹ usiuwoma ota vẹ o rẹ sai rovie kẹ omai evaọ ẹwho okokohọ na?
8 Uvẹ Usiuwoma Ota: Ibuobu nọ e rrọ ẹwho okokohọ na a ti muẹrohọ omai nọ ma gẹgọ kpatiẹ, jẹ sa ebaje okokohọ na mu, yọ onana o sae lẹliẹ ae nọ omai enọ, ma vẹ rọ uvẹ yena ta kẹ ae kpahe okokohọ na. Ọmọzae ikpe ene jọ ọ wha obe okpokpọ nọ a siobọno kpohọ ehọtẹle, o te dhesẹ iẹe kẹ aye nọ ọ be zẹ emu na. Onana u rovie uvẹ fihọ kẹ ọsẹgboni ọmọ na nọ a ro zizie aye na ziọ okokohọ na.
9. Ẹvẹ ma sae rọ rehọ aro kele edẹro nọ uviuwou Jesu u wo kẹ eruẹrẹfihotọ abọ-ẹzi Jihova?
9 Ehaa ahwo Ju nana e jọ etoke evawere nọ ahwo Ju nọ i se Ọghẹnẹ ọgọ gboja a jẹ hai rẹro rai. (Izie. 16:15) Uviuwou Jesu a jẹ hae rọ evawere siobọno eware efa re a sai kpohọ ehaa yena je wo erere no ai ze vọvọ. Ma wo evawere evona kpahe ikokohọ ubrotọ mai, keme ma rri rai wohọ okẹ nọ u no obọ Osẹ oyoyou obọ odhiwu mai ze. (Jem. 1:17) Enẹna họ oke nọ ma rẹ rọ ruẹrẹ oma kpahe kẹ uvẹ ẹsiẹvo ẹgbukpe nana nọ ma rẹ rọ rehọ evawere gọ Jihova na!
[Ẹkpẹti nọ o rrọ ẹwẹ-obe avọ 6]
Ekareghẹhọ Okokohọ Ubrotọ
◼ Oke Ọruẹrẹfihotọ: Ọruẹrẹfihotọ okokohọ na ọ te hai muhọ eva 9:20 a.m. evaọ edẹ esa na. Nọ ikporakporo i te muhọ no, mai kpobi ma rẹ keria ọvuọ oria riẹ re ọruẹrẹfihotọ na ọ ruẹsi muhọ evaọ edhere ọkpakpatiẹ. Ọruẹrẹfihotọ Edisoi-Oka gbe Ẹdẹ-Ọmaha i ti kuhọ evaọ 4:55 p.m., ọrọ Ẹdoka o ve ti kuhọ evaọ 3:40 p.m.
◼ Eria nọ A rẹ Dhẹ Imoto, Emẹshini, gbe Idhighere Fihọ: Evaọ eria ikokohọ kpobi, eruẹrẹahwohọ e te jariẹ nọ e te kẹ ọkpọvio. Iviena ru lele ọkpọvio rai.—1 Kọr. 14:40.
◼ Ẹrawo Oria Ẹkeria: Ahwo nọ wha gbẹ ruọ omoto ọvona ze, hayo enọ wha gbẹ rrọ uwou ovona gbe emọ-uwuhrẹ Ebaibol ra ọvo whọ rẹ sae rawo ekpala kẹ.—1 Kọr. 13:5.
◼ Emu Uvo: Iviena wha emu uvo lele oma viukpenọ who re no ogege okokohọ na kpohọ otafe nyae gwọlọ emu dẹ evaọ etoke eriosehọ uvo. Whọ rẹ sae rehọ orawo-emu osese nọ who re fihọ otọ akpala rọ wha emu ra ze. Ma kuvẹ orawo-emu ulogbo, eglase, ilolo, imidhe nọ i re whu, gbe idi nọ i re mu evaọ ogege okokohọ na ha.
◼ Unevaze: Ma rẹ sai dhesẹ ovuhumuo nọ ma wo kẹ okokohọ na ẹkwoma azọhọ unevaze nọ ma re ru kẹ iruo akpọ-soso na evaọ obọ Ọgwa Uvie mai hayo obọ okokohọ na. Echẹke kpobi (obe nọ a rẹ rọ rehọ igho evaọ ebanke) nọ a re ro ru unevaze fihọ itehe unevaze nọ e rrọ okokohọ na, a re kere fihọ iẹe nọ, a wha ugho na kẹ “Watch Tower,” yọ a re kere iei eme ivẹ.
◼ Omonwa gbe Eware-Idudhe: Ẹyao hayo omonwa idudhe o tẹ romavia evaọ ogege okokohọ na, iviena vuẹ omọvo eruẹrẹahwohọ nọ ọ kẹle owhẹ re o fi obọ họ rọ ohwo na kpohọ Ẹko-Iruo Obufihọ Ọsosuọ na, re inievo nọ e rrọ etẹe na a sae rẹrote ẹbẹbẹ na.
◼ Whọ tẹ be Rekọdo Ẹme: A re dhe uvumọ oware nọ a rẹ rọ rekọdo ẹme hayo ro vidio eware fihọ ekwakwa ẹlẹtriki hayo erọ ẹmeọta nọ e rrọ ogege na vievie he, yọ a rẹ rehọ ekwakwa yena ruiruo evaọ oghẹrẹ nọ i gbe kpokpo amọfa ha.
◼ Eware nọ A rẹ Wọ Ọmọboba Fihọ Ghelie: A rẹ wha eware nọ a rẹ wọ ọmọboba fihọ ghelie ziọ okokohọ na ha. Rekọ, a sae wha oware nọ a rẹ wọ ọmọ fihọ evaọ oria nọ ọsẹgboni na a keria na.
◼ Edrama: O rẹ jọ oware ororokẹ re inievo-emetẹ e siọ idhọfọ irereghe hayo nọ e rrọ gegerege ba ẹfare evaọ uvo Ẹdoka nọ a ti ru edrama na, keme i re di ude ahwo nọ a rrọ obemu. Onana o mae rrọ ere fiki oghẹrẹ Egwa Okokohọ gbe Egwa Uvie nọ a sae jọ ru ikokohọ nọ a be bọ enẹna.—1 Kọr. 10:24.
◼ Eware nọ I re Gbore Isialẹ nọ A rẹ Nẹ Fihọ Oma: O rẹ jọ oware ororokẹ re ma siọ isialẹ nọ i re gbore gaga ba ẹnẹ vọ oma, keme oghẹrẹ isialẹ jọ e rẹ kẹ ahwo jọ uye.—Fil. 2:4.
◼ Oria nọ A jẹ Zẹ Emu/Ahwo nọ A rẹ Zẹ Eware Evaọ Otafe Ogba Okokohọ Na: Wha ọghọ se odẹ Jihova ẹkwoma uruemu uwoma nọ who re dhesẹ evaọ oria nọ a rẹ jọ zẹ emu. U fo ho re whọ nyae dẹ eware evaọ okenọ a bi ruẹme. Whọ tẹ gwọlọ dẹ oware jọ, o rẹ mai woma re whọ dẹe taure ọruẹrẹfihotọ na o te ti muhọ hayo nọ o te kuhọ no.
◼ Iruo Unevaze: Ma tẹ fialoma via kẹ iruo u ti fiba oghọghọ nọ ma ti wo no okokohọ na ze. (Iruẹru 20:35) Ohwo kpobi nọ ọ gwọlọ ru iruo unevaze o re kpohọ Ẹko Iruo Unevaze okokohọ na. Emọ nọ e re vrẹ ikpe 16 ha a rẹ sai ru iruo evaọ otọ ọsẹ hayo oni rai hayo ohwo nọ a be rria kugbe hayo omọfa nọ ahwo nana a kuenu kẹ.
◼ Iwou nọ A re Wohọ: (1) Dhesẹ ubi ẹzi na evaọ okenọ a be kẹ owhẹ uwou nọ who te te ogege okokohọ na no. (2) Who wohọ uvumọ uwou evaọ ogege okokohọ na ha otẹrọnọ Ẹko-Iruo Uwou na o gbẹ rehọ iẹe kẹ owhẹ hẹ. Oria nọ a kẹ owhẹ ọvo who re wohọ. (3) U fo ho re inievo-emezae e jọ oria nọ a rọ kẹ inievo-emetẹ te udevie aso hayo tubẹ wezẹ etẹe dede, yọ inievo-emetẹ a re ru ere gbe he. (4) Otẹrọnọ ẹbẹbẹ jọ ọ romavia evaọ oria nọ who wohọ, vuẹ ẹko iruo iwou na ababọ oke-oraha. (5) Otẹrọnọ ehọtẹle who wohọ, nya lele ekpọvio ahwo nọ a be rẹrote ehọtẹle na. (6) There emu evaọ oria nọ a jọ kẹ uvẹ riẹ ọvo. (7) Who there emu hu evaọ okenọ ẹmeọta ọ be nyaharo keme onana u dhesẹ edẹro kẹ eware abọ-ẹzi vievie he.—Luk 10:38-42.
◼ Imoto nọ A rẹ Ro: Uzuazọ o rrọ ghaghae, fikiere wha gwọlọ omoto nọ ọ rẹ wọ owhai kpohọ okokohọ enukpe nana omakọkọ. Jọ ekpako a muẹrohọ inọ a rehọ emamọ omoto nọ etẹ, ibreki, gbe ikpẹ riẹ i bi ruiruo ziezi. Dede nọ re a rehọ omoto otiọnana o gwọlọ igho buobu, u woma vi onọ o rẹ sae wha ebẹbẹ ze. Wha gwọlọ edraeva nọ ọ rẹ rọwo ru eware enana: ọ rẹ keke ahwo fihọ omoto ho, ọ rẹ dhẹ ga hrọ họ, ọ rẹ wezẹ doma ziezi horiẹ ẹdẹ okokohọ na, yọ ọ rẹ da udi ogaga taure ọ tẹ te ruọ edhere he. Wha rehọ ẹme nana evevere he; wha whaha enwoma nọ a rẹ sae whaha.—Itẹ 22:3.