Kọ Whọ Ruẹrẹ Oma họ Kẹ Ehaa Emuore Abọ-Ẹzi na No?
1. Didi oghẹrẹ omaruẹrẹkpahe ehaa emuọriọ o gwọlọ?
1 Ehaa emuọriọ o gwọlọ omaruẹrẹkpahe ziezi. A re wo ekwakwa emu-othere t’obọ, there emu na ziezi, a vẹ wọe kẹ ahwo nọ a te riẹe. O gwọlọ nọ a rẹ ruẹrẹ oghẹrẹ nọ a rẹ rọ wọ emu na ze họ. Ofariẹ, a rẹ ruẹrẹ oria nọ a jẹ te re emu na họ ziezi. Ahwo nọ a bi zizie ze te re emu na a rẹ jẹ ruẹrẹ oma kpahe re, maero otẹrọnọ a te dhẹ ugbothabọ. Dede nọ ẹruẹrẹhọ emu na ọ rẹ rehọ oke, emamọ emu nọ a rẹ re kugbe egbẹnyusu gbe ahwo uviuwou u fo oware nọ a re ru. Kẹle na, Isẹri Jihova wariẹ akpọ na họ a ti kuomagbe evaọ eria sa-sa re a re emu abọ-ẹzi nọ a bi rẹro riẹ evaọ Okokohọ Ubrotọ nọ uzoẹme riẹ o ta nọ “Wha Jaja Aro Vi Ẹsikpobi!” Re a sae ruẹrẹ eme okokohọ na gbe eware efa nọ i kpomahọ okokohọ na họ, o rehọ oke gaga. A zizie omai no. Re ma sae jariẹ, je wo erere vọvọ no okokohọ na ze, o gwọlọ nọ mai omomọvo ma rẹ ruẹrẹ oma kpahe.—Itẹ 21:5.
2. Re ma jariẹ evaọ edẹ esa okokohọ na, eme o gwọlọ mi omai?
2 Wo Erere Noi Ze Vọvọ: Kọ who ku omaa ra kpobi họ no re whọ sae jariẹ evaọ edẹ esa okokohọ na kpobi? Mi ọga-iruo ra uvẹ nọ whọ sai ro kpohọ okokohọ na, evaọ edẹ esa na kpobi. Kọ who ru ọruẹrẹfihotọ ofa ra gbe oria nọ who ti wohọ no? Ekpako ukoko a re muẹrohọ nọ a ru ọruẹrẹfihotọ kẹ ekpako na, ahwo nọ oma o ga ha, gbe amọfa kpobi nọ a te gwọlọ obufihọ.—Jeri. 23:4; Gal. 6:10.
3. Fikieme ma gbe kpohọ okokohọ akpọ-soso nọ a jo zizie omai hi?
3 A te jọ eria jọ ru ikokohọ akpọ-soso. Woi họ iroro inọ u wo ikoko gbe ahwo erẹwho efa nọ a zizie kpohọ ikokohọ nana. Nọ uwou ogha u je ru ọruẹrẹfihotọ na, a jiroro unu ahwo nọ a gwọlọ zizie no, keme a kele unu egbara gbe ibrikpẹ ehọtẹle nọ ahwo a ti wohọ no. Otẹrọnọ iwhowho-uvie jọ a kpohọ okokohọ akpọ-soso yọ a zizie i rai hi, o rẹ lẹliẹ oria na vọ kiọkọ.
4. Ekareghẹhọ vẹ i ti fi obọ họ k’omai ruẹrẹ oma kpahe kẹ abọ emuhọ okokohọ na kẹdẹ kẹdẹ?
4 Hae kaki te oria okokohọ na re whọ ruẹrẹ oria ẹkeria ra họ taure ọruẹrẹfihotọ na o te ti muhọ. Rehọ iminiti jọ kakao ro rri iprogramo ra taure abọ ọruẹrẹfihotọ na o te muhọ. Onana u ti fi obọ họ k’owhẹ fi iroro ra họ eme nọ a te ta. (Ẹzra 7:10) Nọ ohwo-agbara abọ okokohọ na ọ tẹ ta nọ ikporakporo i bi ti muhọ, reawere rai, jẹ ruẹrẹ oma kpahe re who kuomagbe ẹsuọ ole emuhọ gbe olẹ na.
5. Ẹvẹ uviuwou mai o sai ro wo erere vọvọ no eme ọ okokohọ na ze?
5 Nọ ahwo uviuwou a tẹ keria kugbe evaọ okokohọ na, u re fi obọ họ kẹ esẹgbini muẹrohọ nnọ emọ rai a be gaviezọ ziezi kẹ eme nọ a bi ru na. (Izie. 31:12) Ma be ta udu họ ahwo kpobi awọ re a hai rovie Ebaibol rai lele ohwo kpobi nọ o bi ru ẹme. Eme nọ who re kere fihotọ e sai fi obọ họ k’owhẹ gaviezọ ziezi. Nọ okokohọ na o te kuhọ no, eme nọ who kere na i ti fi obọ họ k’owhẹ kareghẹhọ igogo-eme okokohọ na. Who gbiku evaọ okenọ a bi ru ẹme he, hayo mu kpama no oria ẹkeria ra ha. Otẹrọnọ whọ wha ifonu, furie ei no hayo ru ei re o siọ iroro ra hayo erọ amọfa ba ereghe no ẹme nọ a bi ru. Nọ a te ku abọ okokohọ na jọ họ no, daoma rehọ igogo-eme jọ nọ e were owhẹ ro lele amọfa gbiku?
6. Oware jọ vẹ ma rẹ reawere riẹ evaọ ikokohọ ubrotọ mai, kọ ẹvẹ ma sae rọ reawere riẹ vọvọ?
6 Ma rẹ jọ okokohọ ubrotọ wo uvẹ nọ ma rẹ rọ reawere usu ọbọga kugbe inievo-emezae gbe erọ emetẹ mai, oware nọ whọ rẹ sae jọ akpọ Setan ruẹ hẹ. (Ol. 133:1-3; Mak 10:29, 30) Evaọ etoke eriosehọ uvo na, daoma dhesẹ oma ra kẹ ahwo nọ a keria kẹle owhẹ, je lele ae t’ẹme sasa. Onana yọ erere jọ nọ ma re wo nọ ma tẹ wha emu no obọ uwou ze nọ ma rẹ re oke uvo ukpenọ ma re no ọgwa okokohọ na kpohọ otafe nyae dẹ emu re. Daoma re whọ rehọ uvẹ utioye nọ a sae rọ tuduhọ ohwohwo awọ na ro ruiruo ziezi.—Rom 1:11, 12.
7. Eme o gwọlọ nọ ma re ru kpahe iwu nọ ma te wha?
7 Ẹgọ: Jihova o juzi kẹ ahwo Izrẹl inọ a re ko iluelue fihọ akọ iwu rai, a vẹ jẹ rehọ ufi iburu mu iluelue na wariẹ. (Ik. 15:37-41) Onana yọ oware nọ ahwo Izrẹl a rẹ rọ ẹro ruẹ nọ o rẹ kareghẹhọ ae inọ, ae yọ ahwo nọ a be gọ Jihova. Nẹnẹ, ẹgọ ọkpakpatiẹ nọ o wo ọghọ nọ ma rẹ gọ nọ ma te kpohọ okokohọ u re ru omai wo ohẹriẹ no ahwo akpọ Setan. Makọ nọ okokohọ na ọ tẹ fa no nọ ma je kpohọ otafe nyae dẹ emu re, ẹgọ ọkpakpatiẹ mai u re dhesẹ kẹ amọfa nọ ma wo ohẹriẹ no akpọ na. Fikiere, roro ziezi kpahe oghẹrẹ iwu nọ whọ te wha.
8. Ẹvẹ ma sae rọ ta usiuwoma kẹ amọfa evaọ ẹwho okokohọ na?
8 Ta Usiuwoma: Nọ ma tẹ ma omaa mai ziezi, ma rẹ sae ta usiuwoma kẹ ahwo evaọ ẹwho okokohọ na. Oniọvo ọmọzae jọ avọ aye riẹ nọ a kpohọ oria nọ a jẹ dẹ emu re nọ okokohọ ọ fa no, ọ riobọhọ ebaje riẹ jẹ nọ ohwo nọ ọ be zẹ emu na nọ: “Kọ whọ ruẹ ahwo buobu nọ a be wha ebaje nana no?” Ohwo na ọ tẹ ta nọ o muẹrohọ no, rekọ ọ riẹ oware nọ o lẹliẹ e rae be whae he. Onana u su kpohọ ẹmeọta nọ o lẹliẹ oniọvo na zizie ohwo na kpohọ okokohọ na.
9. Ẹvẹ ma re ro dhesẹ ovuhumuo kẹ Jihova nọ o zizie omai kẹ okokohọ na?
9 Dede nọ inievo mai a ti ru eme, ekiẹriwo, gbe idhesẹvia evaọ okokohọ na, Jihova, Ọsẹ obọ odhiwu mai họ Ọnọ ọ be hae k’omai emu abọ-ẹzi nana kukpe kukpe. (Aiz. 65:13, 14) Ma rẹ sai dhesẹ ovuhumuo kẹ Jihova nọ o zizie omai na ẹkwoma edẹ esa na nọ ma rẹ jariẹ, jẹ gaviezọ ziezi kẹ ẹme kpobi nọ a ti ru. Kọ whọ ma omaa ra no re who ru ere?
Ekareghẹhọ Okokohọ Ubrotọ
◼ Oke Ọruẹrẹfihotọ: Ọruẹrẹfihotọ okokohọ na ọ te hai muhọ eva 9:20 a.m. evaọ edẹ esa na. Nọ ikporakporo emuhọ na i te muhọ no, mai kpobi ma rẹ keria ọvuọ oria riẹ re ọruẹrẹfihotọ na ọ ruẹsi muhọ evaọ edhere ọkpakpatiẹ. Ọruẹrẹfihotọ Edisoi-Oka gbe Ẹdẹ-Ọmaha i ti kuhọ eva 4:55 p.m., ọrọ Ẹdoka o ve ti kuhọ eva 4:00 p.m. Rọkẹ ikokohọ akpọ-soso, ọruẹrẹfihotọ Edene-Oka u ti muhọ eva 1:20 p.m., je ti kuhọ eva 4:45 p.m.
◼ Edrama: O rẹ jọ oware uyoyou re inievo-emetẹ e siọ idhọfọ irereghe hayo nọ e rrọ gegerege ba ẹfare evaọ uvo Ẹdoka nọ a ti ru edrama na, keme idhọfọ ilogbo itieye na i re di ude ahwo nọ a rrọ obemu. Onana o mae rrọ ere fiki oghẹrẹ Egwa Okokohọ gbe Egwa Uvie nọ a sae jọ ru ikokohọ re nọ a be bọ enẹna.—1 Kọr. 10:24.
◼ Efọmo ọ Follow-Up: A rẹ rehọ efọmo ọ Please Follow Up (S-43) na rọ kẹ evuẹ kpahe ohwo nọ ma lele t’ẹme nọ o dhesẹ isiuru kpahe ovuẹ Uvie na evaọ etoke okokohọ na. Jọ iwhowho-uvie a wha efọmo nana ọvo hayo ivẹ lele oma ziọ okokohọ na. Whọ sae rọ efọmo nana nọ who kere eme fihọ gbagba no kẹ ahwo ẹko-iruo Uwou-Ebe hayo okere-obe ukoko ra nọ wha te te uwou no.
◼ Emu Uvo: Iviena wha emu uvo lele oma viukpenọ who re no ogege okokohọ na kpohọ otafe nyae gwọlọ emu dẹ evaọ etoke eriosehọ uvo na. Whọ rẹ sae rehọ orawo-emu osese nọ who re fihọ otọ akpala rọ wha emu ra ze. Ma kuvẹ orawo-emu ulogbo, eglase, ilolo, imidhe nọ i re whu, gbe idi nọ i re mu evaọ ogege okokohọ na ha.
◼ Eria nọ A rẹ Dhẹ Imoto, Emẹshini, gbe Idhighere Fihọ: Evaọ eria ikokohọ kpobi, eruẹrẹahwohọ e te jariẹ nọ e te kẹ ọkpọvio. Iviena ru lele ọkpọvio rai.—1 Kọr. 14:40.
◼ Eware nọ A rẹ Wọ Ọmọboba Fihọ Ghelie: A rẹ wha eware nọ a rẹ wọ ọmọboba fihọ ghelie ziọ okokohọ na ha. Rekọ, a sae wha oware nọ a rẹ wọ ọmọ fihọ evaọ oria nọ ọsẹgboni na a keria na.
◼ Eware nọ I re Gbore Isialẹ nọ A rẹ Nẹ Fihọ Oma: O rẹ jọ oware uyoyou re ma siọ isialẹ nọ i re gbore gaga ba ẹ nẹ vọ oma, keme oghẹrẹ isialẹ jọ e rẹ kẹ ahwo jọ uye.—Fil. 2:4.
◼ Ẹrawo Oria Ẹkeria: Ahwo nọ wha gbẹ ruọ omoto ọvona ze hayo enọ wha gbẹ rrọ uwou ovona ọvo whọ rẹ sae rawo ekpala kẹ.
◼ Iwou nọ A re Wohọ: (1) Dhesẹ ubi ẹzi na evaọ okenọ a be k’owhẹ uwou nọ who te te ogege okokohọ na no. (2) Who re wohọ uvumọ uwou evaọ ogege okokohọ na ha otẹrọnọ Ẹko-Iruo Uwou na o gbẹ rehọ iẹe kẹ owhẹ hẹ. Wohọ oria nọ a k’owhẹ. (3) U fo gbe he re inievo-emezae a jọ oria nọ a rọ kẹ inievo-emetẹ te udevie aso hayo tubẹ wezẹ etẹe dede, yọ inievo-emetẹ a re ru ere gbe he. (4) Otẹrọnọ ẹbẹbẹ jọ ọ roma via evaọ oria nọ who wohọ, ruẹ nọ whọ vuẹ ẹko iruo iwou na ababọ oke-oraha nọ whọ tẹ nwani te obọ okokohọ na. (5) Otẹrọnọ ehọtẹle who wohọ, nya lele ekpọvio ahwo nọ a be rẹrote ehọtẹle na. (6) There emu evaọ oria nọ a jọ kẹ uvẹ riẹ ọvo. (7) Ofariẹ, emu othere evaọ okenọ ẹmeọta ọ be nyaharo u dhesẹ ovuhumuo kẹ eware abọ-ẹzi vievie he.—Luk 10:38-42.
◼ Omonwa gbe Eware-Idudhe: Ẹyao hayo omonwa idudhe o tẹ romavia evaọ ogege okokohọ na, iviena vuẹ omọvo eruẹrẹahwohọ nọ ọ kẹle owhẹ re o fi obọ họ rọ ohwo nọ ọ be mọ na kpohọ Ẹko-Iruo Obufihọ Ọsosuọ na, re ahwo ẹko-iruo obufihọ ọsosuọ nọ e riẹ iruo na ziezi nọ e rrọ ogege na a sae rọ ẹro te ẹbẹbẹ na.
◼ Oria nọ A jẹ Zẹ Emu/Ahwo nọ A rẹ Zẹ Eware Evaọ Otafe Ogba Okokohọ Na: Rọ uruemu uwoma nọ who re dhesẹ evaọ oria nọ a jẹ zẹ emu rọ wha ọghọ se odẹ Jihova. U fo ho re whọ nyae dẹ eware evaọ okenọ abọ okokohọ ọ be nyaharo. Whọ tẹ gwọlọ dẹ oware jọ, o rẹ mai woma re whọ dẹe taure ọruẹrẹfihotọ na o te ti muhọ hayo nọ o te kuhọ no.
◼ Unevaze: Ma rẹ sai dhesẹ ovuhumuo mai ẹkwoma azọhọ unevaze nọ ma re ru kẹ iruo akpọ-soso na evaọ obọ Ọgwa Uvie mai hayo obọ okokohọ na. Echẹke kpobi (obe nọ a rẹ rọ rehọ igho evaọ ebanke) nọ a ro ru unevaze fihọ itehe unevaze nọ e rrọ okokohọ na, a re kere fihọ iẹe nọ, a wha ugho na kẹ “Watch Tower,” yọ a re kere iei eme ivẹ.
◼ Whọ tẹ be Rekọdo Ẹme: A re dhe uvumọ oware nọ a rẹ rọ rekọdo ẹme hayo ro vidio eware fihọ ekwakwa ẹlẹtriki hayo erọ ẹmeọta nọ e rrọ ogege na vievie he, yọ a rẹ rehọ ekwakwa yena ruiruo evaọ oghẹrẹ nọ i gbe kpokpo amọfa ha.