Lele Kristi Ẹkwoma Edhesẹ Adhẹẹ
1. Ẹvẹ uzoẹme okokohọ ubrotọ ukpe nana u ro wobọ kpahe edhesẹ adhẹẹ?
1 Ebaibol na i dhesẹ Osu Ehrugbakpọ na, Jihova, inọ ọ rọ adhẹẹ ruru oma riẹ. (Ol. 104:1) Ẹsikpobi Jesu ọ jẹ ta, je ru eware evaọ edhere nọ o rẹ wha orro se Ọsẹ riẹ gbe ọruẹrẹfihotọ Ọsẹ riẹ. (Jọn 17:4) Mai kpobi ma ti wo uvẹ nọ ma te rọ raro kele Jesu jẹ wha orro se Jihova evaọ Okokohọ Ubrotọ “Lele Kristi!” nọ ọ be tha na.
2. Ẹvẹ oma nọ ma rẹ ruẹrẹ kpahe re ma jariẹ evaọ abọ okokohọ na kpobi o rẹ rọ wha orro se Jihova?
2 Egagọ Nọ I Wo Ọghọ: Ma rẹ sae rọ ọghọ kẹ Jihova ẹkwoma ọruẹrẹfihotọ nọ ma re ru re ma jariẹ kẹ ehaa abọ-ẹzi nọ ọ ruẹrẹ họ k’omai na. Kọ who mi ọga-iruo ra uvẹ no jẹ ruẹrẹ omaa ra họ no re whọ jariẹ evaọ edẹ okokohọ na kpobi, kugbe Edisoi-Oka? Kọ whọ ma omaa no nọ who ti ro te obei ẹruoke re whọ ruẹrẹ oria ẹkeria họ je kuomagbe ẹsuọ ole emuhọ gbe olẹ? Kọ whọ ma omaa emu uvo nọ whọ rẹ sae re kugbe inievo na evaọ ogege okokohọ na no? Evaọ emuhọ abọ kpobi, nọ ikporakporo i te muhọ no nọ ohwo-agbara na o te zizie omai re ma keria, ma re ku ẹmeọta kpobi nọ ma bi lele inievo na ta họ ma vẹ keria kẹ emuhọ ọruẹrẹfihotọ na.
3. Ẹvẹ ezọ nọ ma rẹ gaviẹ ziezi kẹ ọruẹrẹfihotọ na o rẹ rọ wha ọghọ fihọ egagọ mai?
3 Ezọ nọ ma rẹ gaviẹ ziezi kẹ eme nọ a be ta o rẹ wha adhẹẹ se Ọsẹ obọ odhiwu mai re. Nọ ọzae jọ ọ ruẹ oghẹrẹ nọ okokohọ ubrotọ mai jọ ọ jọ, o te kere inọ u re gbe ohwo nọ o bi rri ughe unu nọ ọ tẹ ruẹ “emamọ uruemu ahwo nọ a rrọ okokohọ na, epanọ a be rọ gaviezọ rirẹ avọ uruemu nọ u dhesẹ nọ a se eware abọ-ẹzi gboja.” Ọ tẹ jẹ ta kpahe “emaha buobu nọ e roma kpotọ ziezi . . . , nọ i bi rovie Ebaibol rai lele ahwo nọ a bi ru ẹme, oware nọ a rẹ kake ruẹ evaọ oria ofa ha.” Rekọ, u yoma gaga inọ, evaọ eria ikokohọ jọ evaọ ukpe nukpo, a ruẹ izoge jọ nọ e jẹ jọ akotọ itẹwọ nya kpenẹ avọ enẹ je bi ru iruemu etọtọ. A ruẹ emezae avọ emetẹ jọ nọ i kru ohwohwo obọ jẹ rọ abọ kpahe eku gbe ẹkoko ohwohwo. Onana u fo kẹ Ileleikristi vievie he. Nọ ọruẹrẹfihotọ na o te muhọ no, oke yena o gbẹ rrọ oke nọ a rẹ rọ tẹme kẹ ahwo nọ ma gbẹ keria ha, hayo rọ ifonu vi uwou se ahwo ho, re-emu, hayo mu nya evaọ ogege okokohọ na ha. Emọ e rẹ keria kugbe esẹgbini rai re esẹgbini na a sai fiobọhọ kẹ ae gaviezọ kẹ eme ọruẹrẹfihotọ na. (Izie. 31:12; Itẹ 29:15) Omodawọ utioye na u re dhesẹ adhẹwẹ nọ ma wo kẹ amọfa, je dhesẹ inọ ma wo ovuhumuo kẹ emu abọ-ẹzi nọ o wuzou gaga nọ a be k’omai.
4. Fikieme ma jẹ g’ẹgọ kpatiẹ nọ ma tẹ rrọ obọ okokohọ?
4 Ẹgọ nọ Ọ Rrọ Kpatiẹ: Ahwo buobu a dhesẹ ovuhumuo kẹ eware nọ a kareghẹhọ omai evaọ ẹme nọ uzoẹme riẹ o ta nọ “Dhesẹ Adhẹẹ Oleleikristi eva Oke Kpobi” evaọ okokohọ ubrotọ ukpe nukpo, nọ u fiẹgba họ iẹe inọ idibo Ọghẹnẹ a rẹ daoma dhesẹ adhẹẹ evaọ ẹgọ gbe osẹ rai. Evaọ ukpe nana, u fo re ma daoma wariẹ se ẹme ẹgọ gbe osẹ mai gboja ziezi. Ẹgọ mai o re dhesẹ adhẹẹ nọ ma wo kẹ Jihova gbe uvẹ-ọghọ mai nọ ma rọ rrọ Isẹri riẹ. Ma rẹ g’ẹgọ nọ o fo kẹ enọ e be gọ Ọghẹnẹ.—1 Tim. 2:9, 10.
5. Fikieme u je fo re ma jọ ẹwho okokohọ na g’ẹgọ kpatiẹ evaọ oke-kpobi?
5 Kọ okenọ ma te bi kpohọ ọgwa okokohọ na ọvo ma jẹ g’ẹgọ kpatiẹ? Kareghẹhọ inọ ahwo buobu a ti muẹrohọ omai nọ ma tẹ sa ebaje okokohọ mai mu evaọ ẹwho okokohọ na. Jọ ẹgọ mai u ru omai wo ohẹriẹ no ahwo obọ akpọ. Fikiere, makọ evaọ oke ofa kpobi, wọhọ okenọ ma tẹ be nyae dẹ emu re nọ ọruẹrẹfihotọ okpẹdoke na o te kuhọ no, ma rẹ g’ẹgọ nọ o fo kẹ ahwo nọ e ziọ ẹwho na ti ru okokohọ Isẹri Jihova, yọ u fo ho re ma wha iwu wọhọ jeans, inika, hayo T-shirts. Onana u re se emamọ isẹri kẹ ahwo ẹwho na. Eva e rẹ were Jihova nọ ẹgọ mai o te dhesẹ omai wọhọ uvi egbodibo.
6. Emamọ iyẹrẹ vẹ i re noi ze nọ ma te dhesẹ adhẹẹ Oleleikristi?
6 Emamọ Iyẹrẹ: Adhẹẹ Oleleikristi nọ ma re dhesẹ evaọ ikokohọ mai u re rovie uvẹ fihọ nọ ma re ro se isẹri oke-gheghe, jẹ lẹliẹ ahwo nọ a ruẹ omai wo emamọ eriwo kpahe omai. Nọ a ru okokohọ jọ kuhọ no, ọzae jọ ọ ta nọ: “Ma re ruẹ ahwo nọ a wo emamọ uruemu te enẹ ẹdọvo ho. Oghẹrẹ nọ Ọghẹnẹ ọ gwọlọ nọ ahwo kpobi a jọ wha rrọ na.” Adhẹẹ nọ ma re dhesẹ u re dhesẹ nọ ma wo uyoyou kẹ ohwohwo, yọ o rẹ wha ujiro se Jihova. (1 Pita 2:12) U re dhesẹ nọ ma wo ozodhẹ Ọghẹnẹ je wo ovuhumuo kẹ uvẹ-ọghọ nọ Jihova o bi ro wuhrẹ omai. (Hib. 12:28) Joma daoma dhesẹ adhẹẹ nọ ma bi rẹro Okokohọ Ubrotọ “Lele Kristi!” evaọ ukpe nana.
[Box on page 5]
Ekareghẹhọ Okokohọ Ubrotọ
◼ Oke Ọruẹrẹfihotọ: Ọruẹrẹfihotọ okokohọ na ọ te hai muhọ eva 9:00 a.m. evaọ edẹ esa na. Iminiti jọ kakao re a te ti muhọ, ohwo-agbara na ọ te keria eplatfọmo na nọ a bi kporo ikporakporo na. Mai kpobi ma rẹ keria evaọ oke yena re ọruẹrẹfihotọ na ọ ruẹsi muhọ evaọ edhere ọkpakpatiẹ. Ọruẹrẹfihotọ Edisoi-Oka gbe ọrọ Ẹdẹ-Ọmaha i ti kuhọ eva 4:35 p.m, ọrọ Ẹdoka o ve ti kuhọ eva 3:40 p.m.
◼ Ẹrawo Oria Ẹkeria: Ahwo nọ wha gbẹ ruọ omoto ọvona ze hayo enọ wha gbẹ rrọ uwou ọvona ọvo whọ rẹ sae rawo ekpala kẹ.
◼ Emu Uvo: Iviena wha emu uvo lele oma viukpenọ who re no ogege okokohọ na kpohọ otafe nyae gwọlọ emu dẹ evaọ etoke eriosehọ uvo na. Whọ rẹ sae rehọ orawo-emu osese nọ who re fihọ otọ akpala rọ wha emu ra ze. Ma kuvẹ orawo-emu ulogbo, eglase, ilolo, gbe imidhe nọ i re whu evaọ ọgwa nọ ahwo a be keria jọ gaviezọ na ha. Ma kuvẹ kẹ idi nọ i re mu gbe he.
◼ Unevaze: O rẹ rehọ araha igho buobu re a ru ọruẹrẹfihotọ okokohọ ubrotọ. Ma rẹ sai dhesẹ ovuhumuo mai ẹkwoma azọhọ unevaze nọ ma re ru kẹ iruo akpọ-soso na evaọ obọ Egwa Uvie mai hayo obọ okokohọ na. Echẹke kpobi (obe nọ a rẹ rọ rehọ igho evaọ ebanke) nọ a ro ru unevaze fihọ itehe unevaze nọ e rrọ okokohọ na, a re kere fihọ iẹe nọ, a wha ugho na kẹ “Watch Tower,” yọ a re kere iei eme ivẹ.
◼ Omonwa gbe Eware-Idudhe: Ẹyao hayo omonwa idudhe o tẹ romavia evaọ ogege okokohọ na, iviena vuẹ omọvo eruẹrẹahwohọ nọ ọ kẹle owhẹ re o fiobọhọ rọ ohwo nọ ọ be mọ na kpohọ Ẹko-Iruo Obufihọ Ọsosuọ na, re ahwo ẹko-iruo obufihọ ọsosuọ nọ e riẹ iruo na ziezi nọ e rrọ ogege na a sae rọ ẹro te ẹbẹbẹ na.
◼ Dhẹ Ẹrera: Iviena nọ whọ te dhẹ kpohọ okokohọ na je kpozi, dhẹ ẹrera, fiẹrohotọ, je lele izi edhere nọ a fihọ. Ileleikristi a rri uzuazọ ghaghae, fikiere a re koko izi kpobi nọ i re fiobọhọ whaha omonwa. (Ol. 36:9) Inievo nọ e rehọ imoto nọ e be wọ ae kpohọ okokohọ na, a rẹ vẹvẹ edraeva na unu re a dhẹ ẹrera avọ ẹro ofihotọ.
◼ Nọ Whọ tẹ be Rekọdo Ẹme: A re dhe uvumọ oware nọ a rẹ rọ rekọdo ẹme hayo ro vidio eware fihọ ekwakwa ẹlẹtriki hayo erọ ẹmeọta nọ e rrọ ogege na vievie he, yọ a rẹ rehọ ekwakwa yena ruiruo evaọ oghẹrẹ nọ i gbe kpokpo amọfa ha.
◼ Iwoho Erehọ: Whọ tẹ be rehọ iwoho eva okenọ abọ okokohọ na ọ be nyaharo, whọ rehọ eflashe ruiruo ho. U fo vievie he re ohwo jọ ọ kpama nyae rehọ iwoho nọ ẹme ọ be nyaharo. Ofariẹ, ma kuvẹ vievie he kẹ ahwo nọ a be rehọ iwoho-erehọ kokọ re a rueva ogba okokohọ na rehọ iwoho, a tẹ make rọ Isẹri Jihova.
◼ Efọmo ọ Follow-Up: A rẹ rehọ efọmo ọ Please Follow Up (S-43) na rọ kẹ evuẹ kpahe ohwo nọ ma lele tẹme nọ o dhesẹ isiuru kpahe ovuẹ Uvie na evaọ etoke okokohọ na. Jọ iwhowho-uvie a wha efọmo nana ọvo hayo ivẹ lele oma ziọ okokohọ na. Efọmo na e te jariẹ re evaọ Uwou-Ebe okokohọ na. Whọ sae rọ efọmo nana nọ who kere eme fihọ gbagba no kẹ ahwo ẹko iruo Uwou-Ebe na hayo okere-obe ukoko ra nọ wha te te uwou no.
◼ Edrama: O rẹ jọ oware uyoyou re inievo-emetẹ e siọ idhọfọ irereghe hayo nọ e rrọ gegerege ba ẹfare evaọ uvo Ẹdoka nọ a ti ru edrama na, keme idhọfọ ilogbo itieye na i re di ude ahwo nọ a rrọ obemu. Onana o mae rrọ ere fiki oghẹrẹ Egwa Okokohọ gbe Egwa Uvie nọ a sae jọ ru ikokohọ re nọ a be bọ enẹna.
◼ Iwou nọ A re Wohọ: Dhesẹ ubi ẹzi na evaọ okenọ a be k’owhẹ uwou nọ who te te ogege okokohọ na no. Who wohọ uwou ovo evaọ ogege okokohọ na ha otẹrọnọ Ẹko-Iruo Uwou na o gbẹ rehọ etẹe kẹ owhẹ hẹ. Wohọ oria nọ a rọ kẹ owhẹ. Evaọ ukpe nukpo ma muẹrohọ inọ t’ezae te eyae jọ, t’emezae te emetẹ jọ a jọ ọgwa okokohọ na te udevie aso, jẹ tubẹ wezẹ etẹe dede. Onana u fo vievie he. U fo gbe he re inievo-emezae a jọ oria nọ a rọ kẹ inievo-emetẹ te udevie aso hayo tubẹ wezẹ etẹe dede, yọ u fo re inievo-emetẹ a ru ere gbe he. There emu evaọ oria nọ a kẹ uvẹ riẹ ọvo. Evaọ oke nọ u kpemu, a ruẹ ahwo jọ nọ a je there emu nọ ẹme ọ be nyaharo. Onana u dhesẹ ovuhumuo kẹ eware abọ-ẹzi vievie he.—Luk 10:38-42.